Прэзідэнт Байдэн — Пуціну і Трампу: Мы не кінем саюзнікаў
«Мы павінны спыніць Пуціна! — заявіў Байдэн у чацвер у штогадовай прамове перад у Кангрэсе ЗША.
08.03.2024 / 08:36
За Джо Байдэнам сядзяць віцэ-прэзідэнт Каміла Харыс і спікер Палаты прадстаўнікоў Кангрэса ЗША Майк Джонсан. Фота: Andrew Harnik / AP
Прэзідэнт ЗША Джо Байдэн выступіў з апошняй перад будучымі выбарамі штогадовай праграмнай прамовай, State of the Union, і пачатак прамовы прысвяціў расейскаму лідару Пуціну, развязанай ім вайне, а таксама крытыцы выказванняў Дональда Трампа аб NATO і саюзніках ЗША.
«Мой папярэднік, былы прэзідэнт-рэспубліканец, кажа Пуціну, што той можа рабіць што яму захочацца. Я лічу, гэта абуральна, гэта небяспечна і гэта непрымальна!» — заявіў Байдэн.
Патэнцыйны супернік Байдэна на выбарах у канцы гэтага года Дональд Трамп на адной з сустрэч з прыхільнікамі распавёў аб размове з лідарам нейкай еўрапейскай краіны НАТА, якая быццам бы здарылася ў яго падчас яго прэзідэнцтва. У гэтай размове Трамп быццам бы заявіў, што Амерыка не стане дапамагаць гэтай краіне, калі на яе нападзе Расія, паколькі гэтая краіна не выконвае прыняты ў НАТА нарматыў ваенных выдаткаў у 2% ВУП.
Байдэн адразу пасля гэтай прамовы Трампа назваў яе «бязмозглай і безадказнай».
«Мы павінны спыніць Пуціна! — заявіў Байдэн у чацвер у штогадовай прамове перад у Кангрэсе ЗША. — Калі Злучаныя Штаты кінуць Украіну, Украіна апынецца ў небяспецы, Еўропа апынецца ў небяспецы, свет апынецца ў небяспецы».
«Я хачу сказаць прэзідэнту Пуціну адну простую рэч: мы не кінем саюзнікаў. Мы не схілімся. Я не схілюся!» — працягнуў Байдэн.
Словам аб неабходнасці падтрымліваць Украіну стоячы апладзіравалі не толькі кангрэсмены і сенатары ад Дэмакратычнай партыі, але і некаторыя рэспубліканцы.
Аднапартыйцы Байдэна ўскоквалі і апладзіравалі стоячы практычна кожнай яго рэпліцы на працягу ўсёй прамовы.
Дональд Трамп адрэагаваў у сваім звычайным стылі.
«Ён не стаў супраць Пуціна, ён аддаў Пуціну Украіну!» — напісаў Трамп у сваёй сацсетцы Truth Social, не тлумачачы, што гэта ён мае на ўвазе.
Далей у сэрыі допісаў Трамп, не ўдаючыся ў падрабязнасьці, заявіў, што Байдэн хлусіць па ўсіх асноўных праграмных пунктах, а таксама абвінаваціў прэзідэнта ў тым, што ён не жадае вырашаць праблему паўднёвай мяжы і хоча напоўніць краіну імігрантамі.
Чытайце таксама:
Нікі Хэйлі аб'явіла аб выхадзе з выбарчай гонкі
«Усё цудоўна». 81-гадовы Байдэн здаровы і энергічны, заявіў яго лекар пасля медагляду