Jak źbirajucca pijaryć «sajuznuju dziaržavu» siarod moładzi — pačytali prapanovy Ministerstva adukacyi
«Našaj Nivie» trapiŭsia dakumient, adpraŭleny ŭ Administracyju Łukašenki ź Minadukacyi ŭ kancy 2023 hoda. Heta biurakratyčnaja papiera ab vynikach «narady pa moładzievaj palitycy». Što ŭ jaje ŭvajšło?
07.03.2024 / 09:48
Dakumient, atrymany «Našaj Nivaj» z dapamohaj «Biełpoł», padpisany namieśnikam ministra adukacyi Alaksandram Kadłubajem.
Jon infarmuje Administracyju Łukašenki ab tym, što bolš za 180 čałaviek — «pradstaŭnikoŭ univiersitetaŭ, orhanaŭ pa spravach moładzi, dziciačych i moładzievych abjadnańniaŭ» — u lipieni 2023 hoda dumali, jak abstaić pytańnie z moładzievaj palitykaj u hetaj zvanaj «sajuznaj dziaržavie». I pryjšli da nastupnych vysnovaŭ:
1) Rabota ŭ śfiery moładzievaj palityki pavinna adkazvać na sučasnyja vykliki i pahrozy, ź jakimi sutykajecca h.zv. «sajuznaja dziaržava», bazavacca na kaštoŭnasnym i śvietapohladnym adzinstvie narodaŭ Biełarusi i Rasii […]
2) Pryjarytetnymi nakirunkami moładzievaj palityki źjaŭlajucca duchoŭna-maralnaje, patryjatyčnaje, pracoŭnaje, prafiesijnaje vychavańnie maładoha pakaleńnia.
3) Dziejnaść u śfiery moładzievaj palityki na sajuznym uzroŭni ažyćciaŭlajecca na placoŭcy «sajuznaj dziaržavy», a taksama na ŭzroŭniach profilnych ministerstvaŭ […]
Dakumient bahaty biurakratyčnymi pierłami z razradu «prapracavać raspracoŭku», ale voś jahonyja asnoŭnyja punkty, jakija prapanujecca ažyćciavić — vynik intelektualnaj dziejnaści 180 čałaviek.
— Raspracavać paradak udziełu pradstaŭnikoŭ moładzievych delehacyj u sumiesnych prajektach […].
— Akazvać na sistemnaj asnovie infarmacyjnuju padtrymku sumiesnym inicyjatyvam […]. Vieści siarod moładzi tłumačalnuju rabotu ab roli i značeńni sajuznaj dziaržavy dla Biełarusi i Rasii prapanujecca na płatformie «Mołodiež.bieł».
«Mołodiež.bieł» — heta resurs, jaki navat nie indeksujecca sistemami acenki naviedvalnaści sajtaŭ, nastolki jon małapapularny.
— Prapanujecca pabudavać «patryjatyčny centr» na terytoryi Bresckaj krepaści siłami rasijskich studenckich atradaŭ i za košt «sajuznaha biudžetu».
— Prapanujecca «zabiaśpiečvać adbor, uzhadnieńnie i padtrymku moładzievych inicyjatyŭ, nakiravanych na zachavańnie histaryčnaj pamiaci i supraćdziejańnie falsifikacyi historyi», a taksama «raspracavać pytańnie sumiesnaj realizacyi mierapryjemstvaŭ pa tematycy patryjatyčnaha vychavańnia dziaciej i moładzi».
Siarod inšych niebanalnych idej: pravieści studencki źlot, arhanizoŭvać sumiesnyja pošukavyja ekśpiedycyi, «sfarmiravać siarednieterminovy płan praviadzieńnia spartovych spabornictvaŭ pa alimpijskich vidach sportu», «vybudoŭvać uzajemadziejańnie pa raźvićci vidaŭ sportu, źviazanych z vysokimi technałohijami (kampjutarny sport, spartovaje prahramavańnie, łazierny boj) siarod vučniaŭ PTV i VNU».
Kaniečnie, składalniki dakumienta nie zabyli pra siabie: «Ažyćciaŭlać abmiennyja prahramy dla śpiecyjalistaŭ moładzievych abjadnańniaŭ i rehijanalnych orhanaŭ pa spravach moładzi dla vyvučeńnia vopytu raboty z moładździu na miescach».