Пачынаецца чарговы суд над журналістам за «экстрэмісцкую дзейнасць»
Гомельскі абласны суд сёння пачынае разглядаць справу палітзняволенага гомельскага журналіста-фрылансера Андрэя Толчына. 64-гадовага мужчыну абвінавачваюць ў садзейнічанні экстрэмісцкай дзейнасці (ч. 1 арт. 361-4 КК), дыскрэдытацыі Беларусі (арт. 369-1 КК) і паклёпе на Лукашэнку (ч. 2 арт.367 КК). Справу прызначаны разглядаць Дзмітрый Казлоў, піша «Вясна».
05.03.2024 / 09:27
Андрэй Толчын — даўні стваральнік гарадской газеты «Гомельскія ведамасці», журналіст-фрылансер, які супрацоўнічаў з некалькімі незалежнымі выданнямі. Толчына неаднаразова затрымлівалі і судзілі за журналісцкую дзейнасць з 2017 года. Пасля пратэстаў 2020 года журналіст вырашыў сысці з прафесіі.
Ён быў затрыманы 27 верасня 2023 года ў Гомелі, а на наступны дзень у кватэры Андрэя сілавікі правялі ператрус. У выніку следчыя забралі камп’ютарную тэхніку і іншыя лічбавыя носьбіты.
Андрэя Толчына перавялі ў СІЗА № 3 і супраць яго заведзена крымінальная справа.
Напрыканцы лістапада 2023 г. стала вядома, што крымінальную справу супраць Андрэя следчыя перадалі ў пракуратуру для накіравання ў суд.
Нагадаем, што па інфармацыі БАЖ, у зняволенні зараз знаходзяцца 33 прадстаўнікі беларускіх медыя.
Падтрымайце журналіста паштоўкай альбо лістом: СІЗА-3. 246003, г. Гомель, вул. Кніжная, 1А. Андрэй Мікалаевіч Толчын.
Чытайце таксама:
Журналіста Ігара Карнея будуць судзіць за «ўдзел у экстрэмісцкім фармаванні»
Мужчыну, якога затрымалі пасля вяртання з Польшчы, будуць судзіць за «здраду дзяржаве»