Расійскія прапагандысты закрылі нямецкаму паслу дзверы ў МЗС і заблыталіся ў нямецкай мове
Сёння пасол Нямеччыны Расіі Аляксандр граф Ламбсдорф быў выкліканы ў МЗС РФ у сувязі з перахопам размовы нямецкіх афіцэраў.
04.03.2024 / 15:41
Скрыншот відэа ТАСС
Расійская прапаганда спрабуе выставіць гэта як «падрыхтоўку Нямеччынай вайны з Расіяй». Каля ўваходу ў гмах на Смаленскай плошчы пасла чакалі расійскія прапагандысты. Дзяўчына з мікрафонам тэлеканала «Расія 1» перакрыла яму ўваход у будынак, піша Bild.
Пасол паспрабаваў адчыніць іншую створку дзвярэй, але яна была зачыненая, а дзяўчына не адыходзіла. Тады нямецкія дыпламаты сілай адчынілі адзіныя дзверы, адціснуўшы дзяўчыну. «Ці можам мы прайсці ў міністэрства? У нас ёсць запрашэнне. Вялікі дзякуй», — ветліва сказаў Ламбсдорф.
Рэпарцёры крычалі яму па-нямецку адны і тыя ж фразы: «Чаму вы плануеце атакі на расійскія мэты?», «Вы зноў хочаце вайны з Расіяй?»
Адзін малады чалавек з мікрафонам заблытаўся ў нямецкай мове і сказаў бессэнсоўную фразу: «Чаму вы хочаце атакаваць нямецкія мэты?»
Як піша аглядальнік Bild, «гэта была прапагандысцкая атака на германскага пасла ў Маскве, якая абярнулася ганебнай развязкай».
«Расійская прапаганда хацела выкарыстоўваць прыезд галоўнага нямецкага дыпламата ў маскоўскае міністэрства, каб шантажаваць яго і зняць скандальныя кадры для дзяржтэлебачання, — адзначае аўтар. — Але прапагандысцкая пастка, якую расійскі рэжым зладзіў нямецкаму паслу, зусім не атрымалася».
Чытайце таксама:
Міністр абароны Германіі выказаўся наконт уцечкі размоў нямецкіх вайскоўцаў пра ракеты Taurus
Дэпутаты Бундэстага прагаласавалі супраць паставак Украіне ракет Taurus