Dačka «Jeŭraopta» pieratvaryłasia ŭ markietpłejs
Z 21 lutaha Emall pačynaje pracu ŭ novym farmacie.
21.02.2024 / 12:22
Ciapier Emall — heta nie tolki internet-krama, ale i handlovaja placoŭka, na jakoj mohuć pradavać svaje tavary roznyja pradaŭcy, paviedamlajecca na sajcie ŭstanovy.
Novy markietplejs prapanuje pradaŭcam nastupnyja ŭmovy: uznaharodžańnie placoŭki ŭ 4% ad prodažaŭ niezaležna ad tavaru i jaho cany i apłata dastaŭki pa fiksavanych nizkich taryfach Jeŭrapošty. Dastaŭka prachodzić biez składoŭ i nakładnych, a pradaŭcy pazbaŭlenyja vydatkaŭ na pierasoŭvańnie i zachoŭvańnie tavaraŭ na składach placoŭki.
Handal viadziecca amal usim, za vyklučeńniem niekatorych hrup, u tym liku praduktaŭ, jakija chutka psujucca. Časova ŭviedziena abmiežavańnie na bujnahabarytnyja tavary — vahoj bolš za 30 kh i daŭžynioj zvyš 250 sm. Ale, abiacajuć, što jaho nieŭzabavie źnimuć. U bližejšyja miesiacy taksama źjavicca adzieńnie, jakoje patrabuje prymierki. Dla hetaha adździaleńnia Jeŭrapošty ŭžo abstaloŭvajuć prymieračnymi.
Razam z pradaŭcami handlavać budzie i sam Emall, kab sa startu zabiaśpiečyć šyroki vybar tavaraŭ na placoŭcy. Były anłajn-dyskaŭnter fakusujuć na bakalei, bytavoj chimii i dziciačaj hihijenie.
Markietplejs papiaredžvaje, što z časam pakupniki buduć znachodzić na placoŭcy «dubli» — adnolkavyja tavary pa roznych cenach. Značyć, ich adnačasova pradajuć niekalki pradaŭcoŭ. Tamu rekamiendujecca vyvučać vodhuki ab tavarach i chutkaść dastaŭki dla pryniaćcia rašeńnia nakont vybaru.
Afarmleńnie zamovy
Košyk stanovicca miescam afarmleńnia zamovy, heta značyć bolš nie budzie pierachodu na dadatkovuju staronku. Usie nałady (vybar daty dastaŭki, sposabu apłaty i inšyja) ciapier u košyku.
Jość taksama škała, jakaja pakazvaje reštu sumy dla zamovy ŭ punkcie vydaču zamovy (PVZ) abo reštu sumy dla biaspłatnaj kurjerskaj dastaŭki.
Atrymańnie zamovy
Ciapier tavary z zamovy mohuć pastupać u PVZ častkami i pakupnika buduć infarmavać pra pastupleńnie kožnaj častki zamovy, a taksama možna adsočvać status pa kožnaj častcy ŭ asabistym kabiniecie ŭ detalizacyi zamovy. Termin zachoŭvańnia kožnaj častki zamovy ŭ PVZ 10 dzion.
- Praces identyfikacyi — heta vizualnaja źvierka danych u dakumiencie i ŭ asabistym kabiniecie;
- Emall nie źbiraje kopij, fatahrafij, skanaŭ pašpartoŭ;
- nie pierapisvaje i nie zachoŭvaje pašpartnyja źviestki;
- Jon zachoŭvaje imia i proźvišča, numar telefona i adras dla zabieśpiačeńnia pracesu zamovy i dastaŭki.
Apłata zakazaŭ
Na praciahu niavyznačanaha terminu nie prymajucca dla apłaty padarunkavyja siertyfikaty. Kali jość aktyŭny padarunkavy siertyfikat, prosiać vykarystoŭvać jaho na servisie edostavka.by.
Dla pryniaćcia anłajn-płaciažoŭ vykarystoŭvajecca dźvie apłatnyja sistemy. Praz heta ŭ niejki momant pry anłajn-apłacie sistema zapytaje ŭniasieńnie źviestak kartki, niahledziačy na toje, što jany ŭžo ŭniesieny. Zrabić heta treba budzie adzin raz. Paśla hetaha abiedźvie apłatnyja sistemy (staraja i novaja) zapomniać kartu.
Na praciahu niavyznačanaha terminu karystańnie kartami rasterminovak za košt kampanii rabicca nie budzie. Heta značyć, karty da apłaty prymajucca, ale abaviazacielstvy pa kredytnym pradukcie lažać na trymalniku karty.
Čytajcie taksama:
«Jedastaŭka» nie budzie pracavać u dvuch haradach
U internet-kramy «Jeŭraopt» znajšli parušeńni ŭ abaronie danych pakupnikoŭ