Biełaruskaja skakucha pakazała najlepšy vynik na čempijanacie Polščy i moža pajechać na Alimpijadu
Biełaruskaja skakucha ŭ vyšyniu Maryja Žodzik vystupiła najlepš siarod usich spartsmienak na čempijanacie Polščy ŭ zakrytych pamiaškańniach. Heta daje joj mahčymaść udzielničać u Alimpijskich hulniach u Paryžy, kali spartsmienka paśpieje atrymać polski pašpart, piša Most.
19.02.2024 / 23:30
Maryja Žodzik
18 lutaha na čempijanacie Polščy spartsmienka vystupała pa-za konkursam. Žodzik ustanaviła asabisty rekord, uziaŭšy barjer 1 m 97 sm. Na siońniašni dzień heta vykanańnie alimpijskaha narmatyvu i najlepšy vynik u Polščy.
Bolš za toje, u 2024 hodzie heta treci vynik, pakazany ŭ hetaj dyscyplinie va ŭsim śviecie. Lepš skoknuli tolki ŭkrainka Jarasłava Mahučych z vynikam 2 m 04 sm i aŭstralijka Nikoła Aliślejdžers (2 m 03 sm).
U 2021 hodzie biełaruskaja skakucha ŭ vyšyniu ŭstanaviła asabisty rekord, uziaŭšy barjer 1 m 96 sm. Heta dało joj prava vystupać na Alimpijadzie ŭ Tokia ad Biełarusi, adnak funkcyjaniery Biełaruskaj fiederacyi lohkaj atletyki nie zabiaśpiečyli praceduru prachodžańnia dopinh-testaŭ u terminy, ustanoŭlenyja Mižnarodnaj fiederacyjaj. Tamu Žodzik nie trapiła na Alimpijadu ŭ Tokia.
Maryja Žodzik rodam z Baranavič, ale z 2022 hoda žyvie ŭ polskim Biełastoku. U adnym ź intervju biełaruska kazała, što ŭ jaje polskija karani. U 2020 hodzie ŭ Biełarusi spartsmienka padpisvała adkryty list spartoŭcaŭ, u jakim asudžalisia fakty falsifikacyi vybaraŭ u Biełarusi, a taksama hvałt z boku siłavikoŭ. Taksama spartoŭka asudziła vajnu Rasii suprać Ukrainy.
Maryja padała dakumienty na polskaje hramadzianstva ŭ kastryčniku 2023 hoda. Rašeńnie budzie prymać prezident Andžej Duda. Ciapier dziaŭčynu nazyvajuć najlepšaj u svajoj dyscyplinie ŭ Polščy. Ale ŭ World Athletics Maryja Žodzik pakul adznačanaja jak biełaruskaja spartsmienka.
Čytajcie taksama:
Na Alimpijadu ŭ Paryžy moža patrapić lohkaatletka ź Biełarusi. Ale nieabchodny dazvoł Dudy
Cimanoŭskaja zavajavała srebny miedal na čempijanacie ŭ Polščy
Prezientavali miedali Alimpijady. Jany pryhožyja i pieradajuć duch Francyi