Prapahandysty pakazali 14 zatrymanych — jany nibyta prajšli kurs lekcyj dla «Kadravaha rieziervu dla novaj Biełarusi»
Kadry dopytaŭ zatrymanych (ich, jak vyhladaje, 14) byli pakazanyja pa kanale ANT. Dokazaŭ taho, što hetyja ludzi realna naležali da inicyjatyvy i što źviestki pra ich byli atrymanyja praz atrymańnie dostupu da infarmacyi, jakaja jość u jaje arhanizataraŭ, pradstaŭlena pakul nie było.
15.02.2024 / 00:31
Prapahandyst Ihar Tur raskazaŭ, što słuchaj lekcyi razam z udzielničakami inicyjatyvy, paśla padklučyŭ i śledčyŭ i tak jany nibyta vyličyli niekatorych udzielnikaŭ.
Adkazny za «Kadravy rezierv» — pradstaŭnik Abjadnanaha pierachodnaha kabinieta Biełarusi Juraś Hubarevič. U kamientaryi «Lusterku» jon raskazaŭ, jak pracuje heta sistema, i zapeŭnivaje, što atrymać siłavikam niejkuju hatovuju infarmacyju pra ŭdzielnikaŭ adukacyjnaha kursu niemahčyma.
Jak patłumačyŭ Juraś Hubarevič, padać zajaŭku na ŭdzieł u prahramie moža luby achvotny, u tym liku i siłaviki dy prapahandysty. Pra siabie patencyjny navučeniec raskazvaje nie tak šmat: miesca pracy, uzrovień adukacyi, bačańnie svajho miesca ŭ sistemie budučaha dziaržkiravańnia Biełarusi.
Pryčym, pa słovach Hubareviča, paśla atrymańnia ankiety asabistyja danyja ŭdzielnika adździalajucca ad jaho bijahrafii i pohladaŭ na palityčnuju situacyju. Užo biezabličnaj ankiecie prysvojvajecca numar, i zatym ź joj pracujuć pradstaŭniki inicyjatyvy.
«Na hetym etapie praviarać ludziej pa pryncypie «ci nie źjaŭlajecca chtości ź ich sakretnym ahientam KDB» składana. Ale pry praviadzieńni anłajn-sieminaraŭ my vykarystoŭvajem sistemu zoom-vebinar, jakaja nie dazvalaje ŭdzielnikam pakazvać svajo videa i zadavać pytańni hołasam, — apisvaje miery biaśpieki surazmoŭca. —
Tak, možna atrymać dostup da lekcyj. Ale nie baču ničoha strašnaha, kali Tur albo niejki supracoŭnik Śledčaha kamiteta pasłuchaje ekśpiertaŭ pra alternatyŭnyja šlachi raźvićcia Biełarusi. Tym bolš, lekcyi pravodziacca vykładčykami, jakija nieadnarazova publična vykazvali svaju pazicyju».
Śpis udzielnikaŭ padčas zaniatkaŭ, pra što śćviardžaje Tur, atrymać technična prosta niemahčyma, zapeŭnivaje Hubarevič:
«Kali kazać pra sieminary, to ŭdzielniki tam znachodziacca pad numarami ankiet, i navat nie bačnyja ich proźviščy. Ale i hetyja numary bačyć tolki lektar. Tamu sistema prosta technična nie dazvalaje dałučycca da lekcyi i atrymać dostup da śpisa ŭdzielnikaŭ».
Što da zatrymanych, to jany mahli b, pa-pieršaje, być nieaściarožnymi i napisać u akaŭnt dla suviazi, paznačany ŭ fejkavym telehram-kanale prahramy.
«Jašče ŭvosień minułaha hodu źjaviŭsia fejkavy telehram-kanał, jaki całkam dubluje naš, ale kantakty dla suviazi tam paznačanyja inšyja. Tamu, kali buduć demanstravać zatrymanych ludziej, vybivać ź ich niejkija pakazańni, mahu dapuścić, što chtości pa nieaściarožnaści zajšoŭ na fejkavy akaŭnt i pakinuŭ svaje źviestki. Na žal, taki mietad pravakacyi daŭno viadomy», — havoryć Hubarevič.
Inšy mahčymy varyjant — vyličvańnie pa IP-adrasu. Reč u tym, što niekalki tydniaŭ tamu raniej niedastupny ź Biełarusi sajt «Kadravaha reziervu» pačaŭ adkryvacca dla karystalnikaŭ unutry krainy. I značyć, ludzi mahli zachodzić na jaho biez VPN. Surazmoŭca miarkuje, što razbłakavańnie mahło adbycca ź inicyjatyvy siłavikoŭ. Zaŭvažyŭšy heta, užo sami pradstaŭniki inicyjatyvy abmiežavali dostup, ale Hubarevič nie vyklučaje, što takim čynam siłaviki mahli paśpieć adsačyć ludziej.
«My zaŭsiody rekamiendujem našym udzielnikam, asabliva tym, chto znachodzicca ŭ Biełarusi, vykarystoŭvać VPN, začyščać pierapisku, vieści pierapisku tolki z aficyjnymi akaŭntami, nie vykarystoŭvać je-mejły, jakija majuć spasyłki na ich imia, proźvišča ci miesca pracy, — pieraličvaje jon. — Heta elemientarnyja miery biaśpieki, ale jany ŭžo na baku karystalnikaŭ».
Nahadajem, što 14 lutaha Śledčy kamitet paviedamiŭ, što raspačaŭ kryminalnuju spravu suprać udzielnikaŭ inicyjatyvy «Kadravy riezierv dla novaj Biełarusi». Im inkryminavana č. 3 art. 361-1 KK (stvareńnie abo ŭdzieł u ekstremisckim farmavańni).
Čytajcie taksama:
Zavuča ź Biarozaŭki, jakuju zatrymlivali na vačach šakavanych vučniaŭ, zvolnili
Maładuju mieniedžarku EPAM, jakaja viarnułasia z Hruzii, buduć sudzić za «finansavańnie vajny»
Rabotnika BMZ, jakoha abiacali adpuścić paśla zatrymańnia, pačynajuć sudzić pa kryminalnym artykule
Zatrymali viadomaha viciebskaha videabłohiera Vitala Uścinoviča
Zatrymali viadomaha viciebskaha videabłohiera Vitala Uścinoviča