Памёр былы гендырэктар МАЗа Аляксандр Бароўскі
Бароўскі стаяў ля руля МАЗа ў 2009-12 гадах. Пры ім быў створаны холдынг «БелаўтаМАЗ», а ААТ «МАЗ» стала яго кіроўнай кампаніяй.
13.02.2024 / 11:09
Памёр былы кіраўнік Менскага аўтазавода Аляксандр Бароўскі. Пра гэта паведаміла прэс-служба прадпрыемства.
Бароўскі стаяў ля руля МАЗа ў 2009-12 гадах. Пры ім быў створаны холдынг «БелаўтаМАЗ», а ААТ «МАЗ» стала яго кіроўнай кампаніяй.
«У гэты час на нашым заводзе пачаўся выпуск новага сямейства кабін, з'явіліся высокатэхналагічныя навінкі аўтобуснай, спецыяльнай і прычапной тэхнікі, быў створаны эксклюзіўны капотнік МАЗ-6440 РА», — паведамляе прэс-служба.
У 2007 годзе, калі ён быў кіраўніком Белнафтахіма, у дачыненні да яго была заведзеная крымінальная справа па падазрэнні ў злоўжыванні службовымі паўнамоцтвамі.
Вясной 2008 года Бароўскі быў асуджаны на 5 гадоў. Але ў канцы снежня 2008 года ён быў памілаваны Лукашэнкам і ўжо праз год стаў дырэктарам МАЗа.