Łukašenka dazvoliŭ vajskoŭcam stralać u hramadzian biez papieradžalnaha strełu
Alaksandr Łukašenka ŭnios papraŭki va ŭkaz «Ab Ahulnavajskovych statutach Uzbrojenych sił Respubliki Biełaruś». Naprykład, źmieny adbylisia ŭ Statucie ŭnutranaj słužby, jakija tyčacca ŭžyvańnia vajskoŭcami zbroi suprać hramadzian.
05.02.2024 / 16:09
Kali raniej vajskoŭcy byli abaviazanyja nie tolki papiaredžvać ab užyvańni zbroi, ale i stralać u pavietra, to ciapier papieradžalny streł nie patrabujecca:
«Užyvańniu fizičnaj siły, śpiecyjalnych srodkaŭ, bajavoj i śpiecyjalnaj techniki, zbroi pavinna papiaredničać vyrazna vyjaŭlenaje i vidavočnaje dla asoby, suprać jakoj jany mohuć być užytyja, papiaredžańnie ab namiery ich prymianić z davańniem dastatkovaha času dla vykanańnia zakonnych patrabavańniaŭ, za vyklučeńniem vypadkaŭ, kali pramarudžvańnie ŭ ich užyvańni stvaraje niepasrednuju niebiaśpieku dla žyćcia vajskoŭca abo inšych hramadzian albo moža paciahnuć inšyja ciažkija nastupstvy».
Asobna dadadziena, što zbroja moža ŭžyvacca suprać tych, chto ździajśniaje administracyjnaje pravaparušeńnie. Ciapier artykuł hučyć tak: «Vajskoŭcy pry vykanańni ŭskładzienych na ich zadač majuć prava prymianiać fizičnuju siłu, śpiecyjalnyja srodki, bajavuju i śpiecyjalnuju techniku, užyvać i vykarystoŭvać zbroju z ulikam abstanoŭki, charaktaru złačynstva, administracyjnaha pravaparušeńnia i asoby pravaparušalnika, kirujučysia patrabavańniami ahulnavajskovych statutaŭ».
Akramia taho, raniej u statucie havaryłasia, što «ŭžyvańnie vajskoŭcami fizičnaj siły, śpiecyjalnych srodkaŭ, zbroi, bajavoj i śpiecyjalnaj techniki ź pieravyšeńniem paŭnamoctvaŭ ciahnie adkaznaść, ustanoŭlenuju zakanadaŭčymi aktami».
Ciapier, naadvarot, padkreślivajecca, što vajskoŭcy nie buduć nieści adkaznaść za škodu, pryčynienuju hramadzianinu, kali fizičnaja siła, śpiecsrodki abo zbroja ŭžyvalisia ŭ adpaviednaści sa statutami.
Samy viadomy vypadak zabojstva vajskoŭcami hramadzianskaha adbyŭsia 11 žniŭnia 2020 hoda — u toj dzień u Breście śmiarotna paranili Hienadzia Šutava. Zahad vykarystać uzbrojenych vajskoŭcaŭ padčas pratestaŭ addaŭ kamandujučy vojskami Siłaŭ śpiecyjalnych apieracyj Biełarusi hienierał-major Vadzim Dzienisienka.
Zabitaha Šutava na sudzie pryznali vinavatym, jahony siabra Alaksandr Kardziukoŭ atrymaŭ 10 hadoŭ kałonii ŭzmocnienaha režymu.
Vajskoŭcy z Marjinaj Horki — kapitan sił śpiecyjalnych apieracyj Raman Haŭryłaŭ i praparščyk Arsień Halicyn — byli pryznanyja paciarpiełymi.
Raniej Łukašenka dazvoliŭ supracoŭnikam KDB stralać u natoŭpie.
Čytajcie taksama:
Samy publičny kadebist Kanstancin Byčak pajšoŭ na pavyšeńnie
Tut vučylisia Patrušaŭ i Tozik. Što za napaŭsakretnaja ŭstanova, jakaja rychtuje kadry dla KDB