U vypadku dałučeńnia Ukrainy da Jeŭrasajuza, da ES dałučycca i Biełaruś, tam budzie revalucyja — Viktar Orban
Takimi prahnozami padzialiŭsia premjer Vienhryi na zakrytaj sustrečy z deputatami i pradstaŭnikami apazicyi krainy ŭ minułym hodzie, daviedaŭsia vienhierski rasśledavalnicki prajekt Direkt36 praz svaje krynicy. Tam ža Orban raskryŭ hałoŭnuju pryčynu svajho supraćdziejańnia ŭstupleńniu Ukrainy ŭ ES.
01.02.2024 / 07:00
Viktar Orban. Fota: AP
Pavodle krynic i infarmacyi vienhierskaha žurnalisckaha prajekta Direkt36, u sakaviku 2023 hoda Viktar Orban pravodziŭ zakrytuju naradu ź vienhierskimi deputatami, u tym liku i z apazicyjaj, dzie raskazvaŭ pra svajo bačańnie budučyni Ukrainy i Uschodniaj Jeŭropy ŭ cełym.
Pavodle jaho słoŭ, ustupleńnie Ukrainy ŭ ES stvoryć «novy centr siły» pad kantrolem ZŠA, jaki pieraškodzić jaho stratehičnym metam supracoŭnictva z krainami Uschodu, takimi, jak Kitaj, Rasija i Indyja.
«Dałučeńnie Ukrainy stvoryć novy centr siły ŭ ES, u jakim budzie daminavać ZŠA. Tam buduć krainy Bałtyi, Polšča i Rumynija, dzie amierykancy ciapier raźmiaščajuć bolš za ŭsio svajoj zbroi dla dapamohi Ukrainie.
Hety centr siły stanie jašče šyrejšym za košt Biełarusi. My bačym, što tam usio jašče mohuć adbycca adna ci dźvie kalarovyja revalucyi», — padkreśliŭ na zakrytaj naradzie Viktar Orban, pieradaje Direkt36.
Svaje prahnozy Orban dapoŭniŭ tym, što nie ličyć pravilnaj palityku ZŠA «zmahacca z rostam upłyvu Azii, bo heta tolki raskołvaje suśvietnuju ekanomiku i stavić jeŭrapiejskija krainy pierad vybaram zamiest supracoŭnictva z usimi bakami».
Hetymi ž aściarohami, pa słovach Orbana, toj dzialiŭsia z Francyjaj i Hiermanijaj, prasoŭvajučy naratyŭ «ab budučym pasłableńni ŭpłyvu Zachodniaj Jeŭropy z-za novaha centra siły ŭ asobie Ukrainy i inšych jeŭrapiejskich krain».
Vienhierski premjer navat prapanoŭvaŭ lidaram Francyi i Hiermanii abjadnacca ź Vienhryjaj, Polščaj, Čechijaj i Słavakijaj suprać upłyvu ZŠA, «ale tyja admovilisia», piša Direkt36.
«Pry hetym Orban na sustrečy adkryta pryznaŭ, što nijak nie zmoža pieraškodzić pracesu ŭstupleńnia Ukrainy ŭ ES, bo jon prasoŭvajecca adnosna chutka», — adznačaje prajekt Direkt36.
Nahadajem, što Vienhryja pry Orbanie źjaŭlajecca adzinaj krainaj ES, jakaja nie padtrymała dakłada ABSIE ab parušeńniach pravoŭ čałavieka ŭ Biełarusi. Vienhryja navat sprabavała ŭratavać kiraŭnika Biełaruskaj čyhunki Uładzimira Marozava ad jeŭrapiejskich sankcyj (ale biespaśpiachova).
Toj fakt, što vienhierskaje kiraŭnictva prasoŭvaje intaresy Łukašenki ŭ Jeŭropie, adkryta pryznavaŭ i pasoł Biełarusi ŭ Vienhryi.
Sam Orban byvaŭ u Biełarusi dvojčy: u 2020-m pierad prezidenckimi vybarami i ŭ 2018-m padčas futbolnaha matča pamiž nacyjanalnymi kamandami Biełarusi i Vienhryi.
Akramia taho, Biełaruś u minułym hodzie niekalki razoŭ naviedvaŭ ministr zamiežnych spraŭ Vienhryi Pieter Sijarta, jaki zajaŭlaŭ pra nieabchodnaść zachavańnia suviaziaŭ ź Minskam «dla dasiahnieńnia miru va Ukrainie».
Čytajcie taksama:
«Trajanski koń» Pucina. Chto taki Viktar Orban i čyj bok jon sapraŭdy zajmaje?