Урад Літвы ўхваліў прапанову аб стражэйшым кантролі беларусаў на мяжы
Нашы суайчыннікі з шэнгенскімі візамі цяпер будуць падвяргацца дадатковай праверцы.
31.01.2024 / 15:32
Фота: Дзяржаўны памежны камітэт
У сераду ўрад Літвы ўхваліў прапанову падоўжыць абмежаванні, якія дзейнічаюць у дачыненні да грамадзян Расіі яшчэ на адзін год, а таксама пастрожыць праверку беларускіх грамадзян, якія перасякаюць мяжу, паведамляе LRT.
«У выпадках перасячэння мяжы грамадзянамі Рэспублікі Беларусь па шэнгенскай візе супрацоўнікі Дзяржаўнай памежнай службы абавязаны дадаткова ацаніць рызыкі і пры неабходнасці правесці больш дэталёвую праверку», — гаворыцца ў тлумачальнай запісцы да законапраекта.
Вясной мінулага года Сейм увёў нацыянальныя санкцыі супраць грамадзян Расіі і Беларусі. Законапраект аб абмежавальных мерах з-за ваеннай агрэсіі супраць Украіны зрабіў больш строгім парадак прадастаўлення пастаяннага або часовага дазволу на жыхарства, выдачы віз і забараніў перамяшчэнне грамадзян Расіі праз знешнюю мяжу Еўрапейскага саюза (ЕС).