Ukraina ŭžo siońnia moža atrymać ad ZŠA vysokadakładnyja kiravanyja bomby GLSDB — Politico
Vydańnie Politico sa spasyłkaj na krynicy paviedamiła, što Pientahon paśpiachova vyprabavaŭ novuju vysokadakładnuju bombu vialikaj dalokaści GLSDB, jakaja moža prybyć va Ukrainu ŭžo ŭ sieradu, 31 studzienia.
31.01.2024 / 09:09
Amierykanski čynoŭnik na ŭmovach ananimnaści zajaviŭ Politico, što GLSDB (Ground Launched Small Diameter Bombs) z radyusam paražeńnia bolšym za 150 kiłamietraŭ stanuć «značnym patencyjałam dla Ukrainy» i dazvolać nanosić udary ŭ hłybokim tyle rasiejskich sił.
Ab pastaŭkach hetych kiravanych avijabombaŭ ZŠA abviaścili ŭ lutym 2023 hoda. Ale pakolki heta novaja zbroja, jakoj da hetaha času niama na ŭzbrajeńni navat u amierykanskaj armii, jana pavinna była prajści vyprabavańni. Tamu terminy pradastaŭleńnia GLSDB byli adkładzieny na pačatak 2024-ha.
GLSDB — heta bomba z naviadzieńniem z dapamohaj GPS, zdolnaja pieraadolvać elektronnyja pieraškody, vykarystoŭvacca pry lubych umovach nadvorja. Jaje taksama možna vykarystoŭvać suprać braniatechniki.
GLSDB pavinny dazvolić ukrainskim vajskoŭcam paražać celi na ŭdvaja bolšaj adlehłaści, čym rakiety, jakija ciapier vypuskajuć z artyleryjskich rakietnych sistem HIMARS, jakija pastaŭlajucca ZŠA. Heta moža prymusić Rasieju pieramiaścić svaju łahistyku jašče dalej ad linii frontu.
U Pientahonie zajavili, što Ukraina atrymaje amierykanskija bomby GLSDB zhodna z damoŭlenaściami, adnak nie ŭkazali kankretnych terminaŭ pieradačy zbroi.
«Jak było pryznana ŭ minułym hodzie, my damo Ukrainie GLSDB u ramkach našych namahańniaŭ pa akazańni dapamohi ŭ śfiery biaśpieki. Adnak ź mierkavańniaŭ biaśpieki našaj dziejnaści my nie možam paćvierdzić peŭnyja terminy», — skazaŭ pres-sakratar Pientahona Patryk Rajder.
Čytajcie taksama:
Hibiel A-50: jak USU mahli źniščyć rasijski latajučy radar?
Vajna va Ukrainie budzie biaskoncaj? Voś što miarkuje ekśpiert
Džonsan prahnazuje, što mienavita Tramp daść ukraincam toje, što treba dla pieramohi