«Быццам прасіў дапамогі». У Віцебскім раёне выратавалі аленя, які выйшаў да дарогі ВІДЭА
Аперацыя цягнулася некалькі гадзін. У ёй узялі ўдзел неабыякавыя вяскоўцы, даішнікі і супрацоўнікі ветакадэміі.
28.01.2024 / 16:19
Гісторыю выратавання дзікай жывёлы расказваюць «Віцьбічы».
Кіроўца сяльгаспрадпрыемства Міхаіл Варанцоў пабачыў на абочыне каля вёскі Камары Віцебскага раёна аленя. Той ледзь стаяў на нагах і не ўцякаў, убачыўшы чалавека.
Фота «Віцьбічы».
Варанцоў адчуў, што нешта не тое. Падышоўшы да аленя, мужчына ледзь не расплакаўся — жывёла нібыта прасіла аб дапамозе. Вясковец не ведаў, што рабіць, але не хацеў пакідаць аленя, таму пазваніў ветэрынару сваёй гаспадаркі. А пасля пачалі звяртацца ў розныя службы.
Фота «Віцьбічы».
У Камары прыехалі інспектары ДАІ. Праз некалькі гадзін знайшлася магчымасць транспартаваць аленя, якога прынялі дактары кафедры тэрапіі Віцебскай ветакадэміі.
Па словах прарэктара па навуковай працы ветакадэміі Аляксандра Бялко, жывёла знаходзілася ў стрэсавым стане. Як мяркуюць дактары, хутчэй за ўсё алень адбіўся ад статка, перастаў есці, быў знясілены і не пражыў бы і некалькіх дзён.
Медыкі правялі чацвераногаму пацыенту дэтаксікацыйную тэрапію, «запусцілі» страўнік, пачалі падкормліваць. Каб не ствараць праблем з-за прывыкання да чалавека і цяпла, хутка яго выпусцяць у звыклае асяроддзе ў Лётчанскае лясніцтва.