«У нас не гнуткая, умоўна законная сістэма празаходніх талерастаў!» Гомельскі чыноўнік пракаментаваў марш расійскіх фанатаў
На ўчарашнія публікацыі незалежных СМІ аб масавым шэсці ў Гомелі расійскіх гандбольных фанатаў, якія яўна не атрымлівалі на яго дазволу ад уладаў, адрэагавалі мясцовыя ўлады. На канале, які кантралюе начальнік камітэта інфармацыйна-аналітычнай працы і маніторынгу Гомельскага аблвыканкама Дзмітрый Ісачанка, з'явіўся каментар ідэолага, заўважыў «Флагшток».
25.01.2024 / 16:48
Праўда, нічога канкрэтнага ідэолаг па гэтай справе не сказаў, абмежаваўшыся пафаснымі лозунгамі ў апраўданне парушальнікаў прынятых лукашыстамі драконаўскіх законаў.
Несанкцыянаванае шэсце па Гомелі ён назваў «праходкай спартыўных фанатаў з брацкай Расеі», якое, на яго думку, нельга параўноўваць «з шабашамі экстрэмістаў» беларусаў.
«У Беларусі спорт — гэта пра спорт, а не пра палітыку!», — заявіў ідэолаг, паведаміўшы, што і расейцы, маўляў, пераследаваліся — «тыя, хто паводзіў сябе супрацьзаконна».
Увогуле ж, як ён сцвярджае: «Закон у нас адзіны і моцны, а не гнуткая, умоўна законная сістэма празаходніх талерастаў!»
Акрамя шэсця, фанаты «Зеніта» пакінулі графіці на гарадскім Цэнтры культуры, а таксама пад афіцыйным чырвона-зялёным сцягам правялі «выставу» ультраправай сімволікі.
24 студзеня шумная калона заўзятараў расійскага гандбольнага клуба «Зеніт» прайшла шэсцем ад Прывакзальнай плошчы, праз праспект Леніна да спарткомплексу ў Гомелі на вуліцы Ірынінскай. У калоне былі прыезджыя расейцы з дымавымі шашкамі, барабанамі, фанаты скандавалі «крычалкі». Правядзенню няўзгодненага масавага шэсця ў цэнтры горада міліцыя не замінала і пра парушэнні правапарадку афіцыйна не паведамляла.
Чытайце таксама:
Па вуліцах Гомеля больш за сотню чалавек прайшлі дэманстрацыяй. Хто такі смелы?
Падчас хапуну ў Брэсце затрымалі 70 чалавек. Сярод затрыманых — адныя жанчыны
Смешны выпадак у Гомелі: са скульптуры Машы і мядзведзя знікла… Маша