U jakich restaranach adpačyvali minčuki ŭ 1980-ch — šmat nastalhičnych FOTA

Pakazvajem, jak vyhladali staličnyja kafe ŭ apošniaje dziesiacihodździe isnavańnia SSSR, i raspaviadajem, jakija dalikatesy tam možna było pakaštavać.

03.02.2024 / 17:20

Fota z suvienirnych kartak

Zdymki ŭziaty z suvienirnych kartak «Kafe, restarany, bary horada Minska», jakija słužyli svojesablivaj rekłamaj dla haściej stalicy. Akramia adrasu i fotazdymkaŭ, dla kožnaj ustanovy pryvodziŭsia pieralik firmovych straŭ, raskład pracy i numar telefona dla daviedak.

Najbolšaja kolkaść kartak była pryśviečana kafe i restaranam z varyjacyjami na temu biełaruskaj kuchni.

Kafe «Bulbianaja». Fota z suvienirnych kartak

Kafe «Bulbianaja» raźmiaščałasia na Leninskim praśpiekcie, 53 (siońnia praśpiekt Niezaležnaści, kala płoščy Jakuba Kołasa). Nad ŭvachodam visieŭ prykmietny znak — čyhunok na łancuhu.

Tut prapanoŭvali niekalki dziasiatkaŭ firmovych i nacyjanalnych stravaŭ ź lubimaj biełarusami bulbaj: «Smažanina» — bulba ź jałavičynaj, śvininaj i cybulaj, zapiečanaja na patelni; «Pražanina» — bulba sa śvininaj, hrybami harodninaj i čarnaślivam, jakaja padavałasia pad vinnym sousam; sałat «Smačny» — miasa, harodnina, cybula i hryby ŭ košyku sa smažanaj chrustkaj bulby, a taksam «Bulon z bulbiešnikami», «Poliŭka biełaruskaja», «Bulba ŭ mundzirach z ahurkom», asarci «Biełaruski bukiet», sałaty «Sialanski» i «Vostry».

Siońnia na miescy «Bulbianoj» pracuje Stolle.

Kafe «Nioman». Fota z suvienirnych kartak

Kafe «Nioman» pracavała pa Leninskim praśpiekcie, 22, nasuprać bistro «Chvilinka». U kafe možna było nie tolki smačna paśniedać, ale i pasłuchać stereamuzyku. U mieniu byli raznastajnyja zakuski, druhija stravy, u tym liku miasa pa-biełarusku, kurania tabaka. U «Chvilincy» častavali bulonam z hrenkami, šašłykami, buterbrodami i blinčykami.

Restaran «Leta». Fota z suvienirnych kartak

U restaranie «Leta» kruhły hod hatavali sałaty z harodniny, firmovyja zrazy i bitočki, faršyravanyja harodninaj i cybulaj, napoj ź jabłyčnaha soku. Pa viečarach u restaranie hraŭ arkiestr. «Leta» raźmiaščałasia pobač z parkam imia Horkaha, pa vulicy Pieršamajskaj, 18. Siońnia na jaho miescy pracuje restaran «Kamianica».

Restaran «Žuravinka». Fota z suvienirnych kartak

Znakamity restaran «Žuravinka» raźmiaščaŭsia va ŭłasnym budynku pa vulicy Janki Kupały, 25, pabudavany ŭ 1968 hodzie pa prajekcie architektaraŭ Aksany Tkačuk i Nuty Špihielmana. Hałoŭnym upryhažeńniem samaj vialikaj zały na 300 miescaŭ stała viasiołkavaje pano, na jakim była adlustravana biełaruskaje viasielle.

Tytulnuju jahadu žuravinu kulinary šyroka vykarystoŭvali ŭ samych roznych stravach, navat u aryhinalnaj firmovaj katlecie. Taksama mieŭsia napoj «Žuravinka», jaki musiŭ badzioryć i zdymać stomu.

U 2000 hodzie budynak byŭ da niepaznavalnaści rekanstrujavany, «Žuravinka» pieratvaryłasia ŭ kazino.

Trajeckaje pradmieście paśla rekanstrukcyi. Fota z suvienirnych kartak

Šerah biełaruskich restaracyj raźmiaščalisia ŭ śviežarekanstrujavanym Trajeckim pradmieści.

Pačniem z karčmy «Staravilenskaj». Tut u nievialikim bary z nazvaj «Astatni hroš» byŭ vialiki vybar napojaŭ i kaktejlaŭ, možna było zakazać kielich punša i hroha, kanape «Sustreča», buterbrody «Staradaŭni» i «Asoby». Vuzkaja draŭlanaja leśvica viała ŭ vinnuju zału «Uciecha» z dubovaj meblaj i damatkanymi pałavicami. Da stała padavali sałaty «Trajecki» i «Trajeckaja horka», blinny piroh, napoj «Staravilenski». Pad zastolli była adviedzienaja 14-miascovaja zała «Pahulanka», a ŭ kaviarni padavali kavu pa-ŭschodniamu.

Karčma «Trajeckaja» mieła zału na 60 miescaŭ, aformlenuju ŭ nacyjanalnym styli. Tut padavali strahaninu «Smačny kusočak», studzień «Dryhva», sałat «Paleski», kapustu «Piatroŭskuju».

Restaran «Na rostaniach». Fota z suvienirnych kartak

Nazva restarana «Na rostaniach», jaki raźmiaščaŭsia na płoščy Jakuba Kołasa (Leninski praśpiekt, 47), adsyłała da tryłohii kłasika. Unutry zała była abstaŭlena ŭ nacyjanalnym styli raźbianoj meblaj, habielenami na ścienach, śviacilniami z kavanaha žaleza i niomanskaha škła. Atmaśfieru stvarali napieŭnyja biełaruskija miełodyi.

Siarod straŭ hałoŭnaje miesca zajmali bliny, mačanka ź blinami, stravy z bulby dy źbicień. Firmiennyja stravy — sałat, poliŭka, katleta i napoj — nasili tuju ž nazvu, što i restaran.

Siońnia na miescy restarana krama «Elektrasiła».

Restaran «Śviciaź». Fota z suvienirnych kartak

Zały restarana «Śviciaź» pa Leninskim praśpiekcie, 90 byli aformleny ŭ troch vodnych kolerach — zialonym, załacistym i błakitnym. «Zialonaja zała» (hryl-bar) na pieršym paviersie prapanoŭvała śviežaje piva i duchmianyja šašłyki. Nievialikaja «Aranžavaja zała», dzie ładzilisia dyskateki, adroźnivałasia adździełkaj niajarkaha załacista-terakotavaha koleru. Pobač była bankietnaja zała ź letniaj vierandaj.

Samaja vialikaja «Błakitnaja zała» raźmiaščałasia na trecim paviersie i mahła pryniać adrazu 160 čałaviek.

U restaranie padavali rulet sa śvininy, piačonku, zapiečanuju pa-homielsku, poliŭku «Śviciaź», amlet pa-sialansku i dobra padsmažanyja draniki.

Siońnia ŭ budynku restarana raźmiaščajecca macoŭnia i inšyja ŭstanovy.

Restaran «Paparać-kvietka». Fota z suvienirnych kartak

Restaran «Paparać-kvietka» raźmiaščaŭsia ŭ davajennym budynku fabryki-kuchni pa vulicy Śviardłova, 2. U vialikaj abiedzienaj zale mahło źmiaścicca 270 čałaviek, a ŭ bankietnaj ładzilisia siamiejnyja śviaty, adznačalisia viasielli i jubilei. Niekatoryja firmovyja stravy nasili tuju ž nazvu, što i restaran.

Paśla apošniaj rekanstrukcyi tut raźmiaściłasia niekalki ŭstanoŭ, siarod jakich CoffeeMouse.

. Fota z suvienirnych kartak

Kafe «Viasna». Fota z suvienirnych kartak

U kafe «Viasna» pa Leninskim praśpiekcie, 18 zaŭsiody hučała estradnaja muzyka. U fanatecy sterea-bara «Zadyjak» byli najnoŭšyja zapisy savieckich i zamiežnych vykanaŭcaŭ. U mieniu ž stravy biełaruskaj kuchni: katleta pa-sialansku, mačanka ź blinami, draniki, jajka, faršyravanaje hrybami. U susiednim kafieteryi možna było zakazać kavu, pirožnaje i pyšnuju bułačku.

Siońnia na miescy kafe restaran «Šykary».

Restaran «Dniapro». Fota z suvienirnych kartak

Stravy inšych krain taksami byli pradstaŭleny ŭ mnohich staličnych restaranach.

Na bulvary Šaŭčenki, 26 raźmiaščaŭsia restaran, čyja nazva jadnała biełarusaŭ i ŭkraincaŭ — «Dniapro». Tut možna było pakaštavać ukrainskuju kuchniu: vareniki, boršč, katlety pa-pałtaŭsku, hałuški.

Siońnia ŭ hetym domie tolki kramy mebli.

Restaran «Patsdam». Fota z suvienirnych kartak

U prestyžnym «Patsdamie» na vulicy Lenina, 2, jak śćviardžajuć kartki, pracavali najlepšyja kulinary HDR. Restaran byŭ nazvany ŭ honar horada-pabracima Minska i śpiecyjalizavaŭsia na niamieckaj kuchni, tut padavali bulbiany sup z sasiskami, sałaty «Dalikatesny» i «Bierlinski», štek «Patsdam», «San-Susi», u jaki ŭvachodzili smažanaja śvinina, jałavičyna, kurycy, bulba i hryby. U bary mieŭsia vialiki vybar kaktejlaŭ, prachałodnych napojaŭ dy sokaŭ. Siońnia na miescy byłoha «Patsdama» pafasnaje Grand Cafe.

Darečy, u samim Patsdamie pracavaŭ restaran «Minsk», jaki paru hadoŭ tamu byŭ kapitalna rekanstrujavany.

Restaran «Vilnius». Fota z suvienirnych kartak

Litoŭskuju kuchniu možna było pakaštavać u restaranie «Vilnius» pa vulicy Kalinoŭskaha, 155. Dvuchuzroŭnievaja zała na 180 miescaŭ była aformlena ŭ nacyjanalnym styli z vykarystańniem draŭlanych stolaŭ, dekaratyŭnych rašotak i sučasnaj na toj momant mebli. Tut možna było zakazać zakusku «Vilnius», sałaty «Niarys» i «Dzidžulis». U kaktejl-bary z kaktejlem možna było pasłuchać stereamuzyku i pahladzieć pieradaču pa kalarovym televizary.

Restaran «Arbat». Fota z suvienirnych kartak

Mieŭsia ŭ Minsku i restaran ruskaj kuchni — «Arbat». Tut častavali zakuskaj «Ruskaj», napojem «Maskoŭskim», kapustaj i barščom, padavali dalikatnuju viandlinu i «rumiana-žoŭty» amlet z syram, kaŭbaski pa-arbacku i rybu, zapiečanuju ź jajkam. Restaran praciahvaje isnavać pad staroj nazvaj pa praśpiekcie Niezaležnaści, 143/1 na Uschodzie.

U biełaruskaj stalicy isnavaŭ i šerah kafe, u jakija možna było pryvodzić dziaciej.

Kafe «Kazačny zamak». Fota z suvienirnych kartak

«Kazačny zamak» pa Leninskim praśpiekcie, 83 mieŭ niezvyčajnuju cikavostku. Tut mieŭsia miechaničny krumkač z kazki Hansa Chryścijana Andersiena «Śniežnaja karaleva», jaki vitaŭ haściej, a taksama zabaŭlaŭ ich kazkami. Mienavita pa matyvach «Śniežnaj karalevy» byli aformleny interjery kafe, jaho mastackija rośpisy i raźba pa drevie. Pad rost naviedvalnikaŭ rehulavałasia vyšynia łaŭ.

Kafe zachavałasia da našaha času.

Kafe «Punsovieńkaja kvietačka». Fota z suvienirnych kartak

Kafe «Punsovieńkaja kvietačka» było aformlena pa matyvach adnajmiennaj kazki. Haściej sustrakali try siastrycy-aficyjantki Naścieńka, Hardzieja i Krasava. Dzieciam prapanoŭvałasia žele «Zamorskaje» i «Cud-vostraŭ», pirožnaje «Čaradziejny piarścionak», napoj «Cudatvornych». A jašče tut vystaŭlalisia dziciačyja malunki i vyraby. Siońnia pa adrasie praśpiekt Puškina, 52 tolki «Kapieječka» dy apteka.

Kafe «Dubravuška». Fota z suvienirnych kartak

Apošniaje dziciačaje kafe «Dubravuška» raźmiaščałasia pa Respublikanskaj vulicy, 26 (siońnia Ramanaŭskaja Słabada). Tut padavali zakuski «Zialony ahuročak» i «Zaječaja kapusta», śvinina advarnaja «Chruška», bulony «Zaječyja vuški» i «Pieŭnik — załaty hrabieńčyk».

Nie mienš papularnymi za inšyja byli restarany pry minskich haścinicach. Amal usie jany ŭ tym ci inšym vyhladzie zachavalisia da našaha času.

Restaran haścinicy «Jubilejnaj». Fota z suvienirnych kartak

Restaran pry haścinicy «Jubilejnaj» pa praśpiekcie Mašerava, 29 (siońnia praśpiekt Pieramožcaŭ) hatavaŭ stravy biełaruskaj, francuzskaj, polskaj i anhlijskaj kuchniaŭ. Tut možna było pakaštavać rulet sa śvininy, katletu «Jubilejnuju», file na ražnie, šnical pa-ministersku, žuljen ź miasa z hrybami, bifšteks pa-anhlijsku, file z sousam «Madera». Uviečary ŭ restaranie hraŭ estradny arkiestr, a ŭ kafe-bary — kamierny kvartet.

Restaran haścinicy «Spadarožnik». Fota z suvienirnych kartak

U restaranie haścinicy «Spadarožnik» pa vulicy Bryleŭskaj, 2 hanarylisia svaimi adnajmiennymi firmovymi katletami i kaŭbaskami. Taksama prapanoŭvali vialiki vybar zakusak, sałataŭ, napojaŭ i sokaŭ.

Haścinica «Turyst» z restaranam. Fota z suvienirnych kartak

Vialiki restaran uvachodziŭ i ŭ kompleks haścinicy «Turyst» pa Partyzanskim praśpiekcie, 81. Na pieršym paviersie raźmiaščalisia bankietnaja i asnoŭnaja zała, raźličanaja na 220 miescaŭ. Na druhim — kaktejl-bar na 50 miescaŭ. Asablivaje miesca ŭ mieniu zajmali nacyjanalnyja stravy: jajka, faršyravanaje hrybami, bulon z kałdunami, katlety pa-sialansku, bulbianyja piražki, faršyravanyja jajkam. Padavali taksama firmovy rulet, katlety «Turyst» i «Śviatočnaja». U restarana była svaja letniaja terasa z kalarovymi parasonami, dzie prapanoŭvali šašłyki, piva, achaładžalnyja napoi.

Restaran Minskaha aeraporta. Fota z suvienirnych kartak

Restaran staroha Minskaha aeraporta prapanoŭvaŭ ruladu z ptuški, sałat «Biełaruski», katlety pa-aerafłocku, napoj «U palot».

Restaran haścinicy «Płanieta». Fota z suvienirnych kartak

Biełaruskaja i jeŭrapiejskaja kuchni byli šyroka pradstaŭleny ŭ restaranie haścinicy «Płanieta» pa praśpiekcie Mašerava, 31 (siońnia praśpiekt Pieramožcaŭ). U azdableńni interjeraŭ byli vykarystany kieramika i mazaičnaje pano, jakija vobrazna adlustroŭvali historyju, kulturu i pobyt biełaruskaha naroda. Restaran mieŭ adrazu try zały — na 30, 50 i 100 miescaŭ. U dvuch barach prapanoŭvali kaktejli i soki, u letnim kafie, na dachu haścinicy, — maroziva i achaładžalnyja napoi. Vakalna-instrumientalny ansambl vykonvaŭ pieśni savieckich i zamiežnych kampazitaraŭ.

Kafe «Jaječnaje». Fota z suvienirnych kartak

U kafe «Jaječnym» pa vulicy Respublikanskaj, 26 (siońnia Ramanaŭskaja Słabada) pa ŭłasnych receptach hatavali dalikatesnyja zakuski i haračyja stravy ź jajek i ptuški: firmovy sałat «Fantazija», amlet, zapiečany z tvoraham, jajki zaliŭnyja i jaječnyja rombiki. Dla ich pryhatavańnia prosta ŭ abiedziennaj zale byŭ ustanoŭleny hryl-aparat.

Kafe «Ujut». Fota z suvienirnych kartak

U kafe «Ujut» dla naviedvalnikaŭ byli stvorany zručnyja kabiny, drapiravanyja ścieny byli ŭpryhožany karcinami, na stolach nizka visieli aryhinalnyja lustry, hučała muzyka. Adśviatkavać svoj jubilej u takoj utulnaści možna było pa Kamsamolskaj vulicy, 7.

Kafe «Teatralnaje». Fota z suvienirnych kartak

Pobač z Opiernym teatram pa vulicy Horkaha, 6 (siońnia vulica Maksima Bahdanoviča) možna było paśniedać u kafe ź niearyhinalnaj nazvaj «Teatralnaje». U viestybiuli kafe zaŭsiody visieła afiša z repiertuaram teatra. Tut časta byvali nie tolki amatary opiernaha i baletnaha mastactva, ale taksama i artysty, ładzilisia tvorčyja sustrečy. Interjer upryhožvali mastackija śviacilni i karciny, jakija adlustroŭvali raźvićcio teatra. U mieniu zaŭsiody byli firmovyja blinčyki «Premjera», jałavičyna pa-teatralnamu, desiert «Muza» i kava pa-teatralnamu.

Na miescy «Teatralnaha» siońnia pracuje restaran kitajskaj kuchni «Mis Li».

Fota z suvienirnych kartak

Restaran «Zialony łuh». Fota z suvienirnych kartak

U «Zialonym łuzie» pa vulicy Karbyšava, 13 ładzilisia sustrečy ź dziejačami biełaruskaha kino i teatra, papularnymi artystami estrady, naprykład, «Pieśniarami», viadomymi paetami. U volnyja viečary była kancertnaja prahrama. Naviedvalniki mahli zakazać firmovuju katletu «Łuhavuju», sałaty «Pikantny» i «Siurpryz», napitak «Załaty kołas».

Siońnia budynak restarana zajmaje «Biełarusbank».

Bar «Kachanaja». Fota z suvienirnych kartak

Bar šampanskich vinaŭ z pryhožaj biełaruskaj nazvaj «Kachanaja» znachodziŭsia pa vulicy Kirava, 11. Svajoj papularnaściu bar karystaŭsia dziakujučy interjeram, dla afarmleńnia jakich byli vykarystany roznakalarovyja vitražy, čakanka pa miedzi, lusterki dy chrustal.

Restaran «Sosny». Fota z suvienirnych kartak

Źziajučyja chvajovyja haliny na vyviescy sustrakali naviedvalnikaŭ restarana z paetyčnaj nazvaj «Sosny». Interjer byŭ aformleny drevam, a bludy adlustroŭvali jahonuju svojeasablivaść. Naprykład, nahadvali chvajovuju šyšku katlety «Sosny», pryhatavanyja z adbiŭnoj śvininy i načynienyja syram, śmietankovym masłam i rublenym časnykom. Taksama padavali miasa «Jubilejnaje» ź jałavičnaj vyrazki, zapiečanaje z cybulaj i ciortym syram. Restaran raźmiaščaŭsia pa Partyzanskim praśpiekcie, 70A.

Kafe «Palaŭničy». Fota z suvienirnych kartak

Jašče adna biełaruskamoŭnaja vyvieska — kafe «Palaŭničy». Tut hučali zapisanyja na mahnitafonnuju stužku poščaki sałaŭja i žaŭruka, ivałhi i stryža, klokat žuraŭloŭ, tajamničnaje vuchkańnie savy, daloki hołas ziaziuli dy pośvist knihaŭki. Svojeasablivaść kafe padkreślivaŭ interjer: try nievialikija ŭtulnyja zały — usiaho na 52 naviedvalniki, złučanyja miž saboj arkami. Ścieny z čyrvonaj cehły ŭpryhožvali skury, łasinyja rohi. U mieniu byli zakuski «Duplet» i «Palaŭničaja», firmovyja stravy «Trafiej palaŭničaha» i «Palaŭničyja kaŭbaski», pryhatavanyja ź miasa łasia i dzika, maroziva «Lasnaja kazka» i «Ranica». Kafe raźmiaščałasia ŭ centry horada pa Leninskim praśpiekcie, 46.

Bar kańjačnych i šampanskich vinaŭ. Fota z suvienirnych kartak

Bar kańjačnych i šampanskich vinaŭ pracavaŭ pa Leninskim praśpiekcie, 75. Tut možna było zakazać žuljen i jałavičynu z hrybami i cybulaj, kurycu, zapiečanuju ŭ śmiatannym sousie. Na desiert — maroziva «Krasa» ź likioram i šakaładam, z kaktejlaŭ — «Kalibry» abo «Iskrysty».

Kafe «Bryhancina». Fota z suvienirnych kartak

Interjer kafe «Bryhancina» nahadvaŭ karabiel: kruhłyja vokny-iluminatary, šturvał, sietki na ścienach, śviacilni-papłavy. U hetym śpiecyjalizavanym rybnym kafe možna było pakaštavać zrazy «Kapitanskija» i «Danskija», sałat «Marski», dalikatesnyja asarci. Raźmiaščałasia «Bryhancina» pa Leninskim praśpiekcie, 42.

Kafe «Mierydyjan». Fota z suvienirnych kartak

Narešcie, u maładziožnym kafe «Mierydyjan» pa vulicy Prytyckaha, 56 možna było smačna pajeści pad vystupleńnie vakalna-instrumientalnaha ansamblu, aznajomicca z prahramaj dyskakłuba.

F. Raŭbič