U Brytanii na aŭkcyjon vystavili ŭstaŭnyja zuby Čerčyla
Hetyja skivicy byli nastolki važnyja, što Uinstan Čerčyl zaŭsiody mieŭ pry sabie zapasnyja kamplekty.
20.01.2024 / 08:53
Ser Uinstan Čerčyl i baraniesa Klemiencina Čerčyl u 1961 hodzie. Fota: Leonard «Buster» Brown / AP
U Brytanii z aŭkcyjonu budzie pradadzienaja ŭstaŭnaja skivica premjer-ministra Vialikabrytanii Uinstana Čerčyla, jakuju jon vykarystaŭ u časie svajoj znakamitaj pramovy «My budziem zmahacca na plažach», pramoŭlenaj u časie Druhoj suśvietnaj vajny, paviedamlaje Bi-bi-si.
«Ustaŭnyja zuby Čerčyla, mabyć, uvachodziać u lik samych niezvyčajnych pradmietaŭ, jakija my kali-niebudź pradavali», — kaža kiraŭnik aŭkcyjonnaha doma The Cotswold Auction Company Liz Puł.
Aŭkcyjon projdzie ŭ horadzie Čełtniem 6 lutaha.
Pratez u załatoj apravie pakul acenieny ad 5 da 8 tysiač funtaŭ, adnak ekśpierty ličać, što zuby znakamitaha premjer-ministra pradaduć za našmat bolšuju sumu. U 2010 hodzie na aŭkcyjonie ŭ Norfałku jany byli pradadzienyja za 15,2 tys. funtaŭ.
Hetyja vierchnija zubnyja pratezy — adzin ź niamnohich kamplektaŭ (mierkavana, ich było čatyry), jakija byli vyrableny dla Čerčyla.
Jany byli stvorany z ulikam jaho naturalnaj dykcyi — premjer trochi šapialaviŭ. Hetyja skivicy byli nastolki važnyja, što Uinstan Čerčyl zaŭsiody mieŭ pry sabie zapasnyja kamplekty.
Pratez ź niekalkimi vierchnimi zubami byŭ raspracavany jaho dantystam seram Uiłfredam Fišam. Jon byŭ zrobleny ŭ pačatku Druhoj suśvietnaj vajny, kali Čerčylu było 65 hadoŭ.
Čerčyl amal usio žyćcio adčuvaŭ prablemy z zubami, jon pazbaviŭsia niekalkich zuboŭ jašče ŭ maładości.
Z adnoj z ustaŭnych skivic Čerčyl byŭ pachavany, ale jašče adna, zapasnaja, była padoranaja muzieju Karaleŭskaha kaledža chirurhaŭ u Łondanie.
Fota: The Cotswold Auction Company
U podpisie na stendzie ŭ muziei adznačajecca, što «dobra padahnany zubny pratez byŭ najvažniejšaj fizičnaj i psichałahičnaj aporaj» dla Čerčyla.
«Heta dazvoliła jamu havaryć efiektyŭna — žyćciova važnaja jakaść dla luboha palityka, i asabliva dla taho, čyje pramoŭnickija navyki zhulali vyrašalnuju rolu ŭ jaho pośpiechu», — havorycca ŭ apisańni ekspanata.
Usio darosłaje žyćcio Čerčyla pieraśledavaŭ strach stracić zdolnaść havaryć.
Razam z zubnymi pratezami, na prodaž 6 lutaha budzie vystaŭleny mikrafon, jaki Čerčyl vykarystaŭ u časie abviaščeńnia ab zakančeńni Druhoj suśvietnaj vajny. Jaho aryjencirovačny košt składaje ad 5 da 8 tys.funtaŭ.
Zubnyja pratezy Čerčyla ŭvachodziać u lik samych dziŭnych pradmietaŭ, pradadzienych na aŭkcyjonie.
Jak adznačaje hazieta Guardian, na aŭkcyjonach taksama pradavalisia takija niezvyčajnyja rečy, jak unitaz Džona Lenana (9,5 tysiač funtaŭ u 2010 hodzie), cukrovaja hłazura ź viasielnaha torta prynca Čarlza i Dyjany (1,850 tys. funtaŭ u 2021 hodzie), i Biblija Ełvisa Preśli (59 tys. funtaŭ u 2012 hodzie).
Čytajcie taksama:
U miunchienskim aeraporcie zatrymali Arnolda Švarcenehiera
Na aŭkcyjon vystavili hadzińnik «Łuč» z vyjavaj Biełaha doma i pryśviačeńniem Biłu Klintanu
Na rasijskim aŭkcyjonie vystavili karcinu pendźla Ivana Chruckaha