Žychara Kobryna zatrymali za numarnuju ramku z «Pahoniaj» na mašynie
Mužčynu aštrafavali za toje, što na jahonym aŭtamabili była numarnaja ramka z hierbam «Pahonia». Na dumku suda, mužčyna takim čynam pravodziŭ palityčny pikiet. Pastanova źjaviłasia ŭ banku sudovych rašeńniaŭ, adznačaje «Lusterka».
08.01.2024 / 14:04
Numarnyja ramki z hierbam «Pahonia» — mahčyma, takija byli i ŭ kobrynca. Malunak nosić ilustracyjny charaktar. Fota: Drive2.ru
Zhodna z materyjałami suda, aŭtamabil ź niesankcyjanavanaj ramkaj zaŭvažyli ŭ centry horada, kala haścinicy «Biełaruś» na vulicy Savieckaj. Jaho haspadar pracuje hałoŭnym śpiecyjalistam niejkaha AAT, mahčyma, Biełarusbanka, jaki znachodzicca ŭ susiednim budynku.
«Raźmiaściŭ dla ŭsieahulnaha ahladu i publičnaj demanstracyi na numarnoj ramcy transpartnaha srodku, jaki naležyć jamu, niezarehistravany va ŭstanoŭlenym paradku hierb P., čym pravioŭ adzinočny pikiet z metaj vykazvańnia svaich hramadska-palityčnych pohladaŭ», — havorycca ŭ pastanovie.
Sam kobryniec pryznaŭ vinu častkova (mabyć, nie admaŭlaŭ najaŭnaści takoj ramki, ale nie byŭ zhodny z tym, što heta pikiet). Adnak u suda znajšoŭsia śviedka, jaki paćvierdziŭ jaho «vinu».
Mužčynu dali štraf 40 bazavych vieličyń, abo 1480 rubloŭ.
U 1992-1995 hadach hierb «Pahonia», jaki byŭ tady dziaržaŭnym, raźmiaščaŭsia prosta na aŭtamabilnych numarach i byŭ ich abaviazkovaj častkaj — takim byŭ ustanoŭleny ŭzor rehistracyjnaha znaka.
Čytajcie taksama:
Nie vyjšaŭ na volu były mahiloŭski błohier Aleś Sabaleŭski
Palitźniavolenaja z Hrodna Alena Jahoryčava vyjšła na volu
U Hrodnie siłaviki zatrymali za kamientary supracoŭnika adnoj ź dziaržkampanij