Donald Tramp zajaviŭ, što mienavita jaho epizod u «Adzin doma 2» zrabiŭ film paśpiachovym
Režysior stužki ž śćviardžaje, što biznesmien litaralna prymusiŭ dadać siabie ŭ karcinu.
28.12.2023 / 12:22
U kancy śniežnia režysior filma «Adzin doma» Krys Kałambus raspavioŭ, što pieršapačatkova nie płanavaŭ dadavać u sikvieł kamiea biznesmiena i palityka Donalda Trampa. Adnak toj nastojvaŭ na svaim zjaŭleńni ŭ karcinie i nibyta nie dazvalaŭ kamandzie vieści zdymki ŭ budynku hatela Plaza, jaki naležaŭ jamu.
U vyniku epizod z Trampam źniali i vyrašyli pakinuć u karcinie, bo aŭdytoryi na testavych pakazach jon spadabaŭsia.
«Kali my pakazvali heta pieršy raz, adbyłasia samaja dziŭnaja reč: ludzi zaapładziravali, kali Tramp zjaviŭsia na ekranie. Tamu ja skazaŭ: «Pakińcie jaho ŭ filmie. Heta momant dla hledačoŭ».
Ale Kałambus havoryć, što Tramp «prakłaŭ sabie šlach u kino», vykarystoŭvajučy svaju suviaź z hatelem Plaza, kab atrymać epizod.
Tramp u svaju čarhu prakamientavaŭ vykazvańnie Kałambusa. Pa słovach palityka, jon nie prymušaŭ nikoha dadavać siabie ŭ film, a režysior i pradziusary stužki sami ŭprošvali jaho źniacca.
Tramp nibyta nie chacieŭ zdymacca ŭ «Adzin doma 2», ale aŭtary filma akazalisia «vietlivyja i nastojlivyja», tamu jon pahadziŭsia. Ciapier palityk upeŭnieny, što kamiea stała nie mienš viadomym, čym sam film, a sam jon dahetul atrymlivaje zvanki, kali film pakazvajuć na TB u zimovyja śviaty.
«Majo kamiea dapamahło zrabić film paśpiachovym. Ale kali aŭtary ličyli, što ich prymusili dadać scenu ci jany ŭvohule nie chacieli bačyć mianie ŭ «Adzin doma 2», to čamu jany za 30 hadoŭ ničoha nie zrabili? Bo ja ŭsio jašče prynošu karyść filmu!» — skazaŭ Tramp.
«Adzin doma 2» vyjšaŭ u 1992 hodu i zarabiŭ u prakacie 359 miljonaŭ dalaraŭ pry biudžecie ŭ 28 miljonaŭ.