Čamu Łukašenka pastajanna šturchaje Hałoŭčanku?
Sioleta Łukašenka ŭžo pahražaŭ adpravić Hałoŭčanku ŭ adstaŭku. Ciaham hoda jon vinavaciŭ urad u prablemach u adukacyi, mielijaracyi, cenach. Hałoŭčanka niaśmieła apraŭdvaŭsia.
22.12.2023 / 14:04
Raman Hałoŭčanka ŭ Łukašenki na naradzie. Ilustracyjnaje fota: belta.by
«Heta, Raman Alaksandravič, u vašym uradzie patanuła ideja»
U lutym 2023 hoda ŭradu pierapała za «kiepskuju prapracoŭku šeraha važnych rašeńniaŭ». Maŭlaŭ, adkaznyja asoby paviarchoŭna padychodziać da padrychtoŭki dakumientaŭ, a časam niedastatkova źviartajuć uvahu na dbajnaje raschodavańnie biudžetu.
26 červienia Łukašenka pahražaŭ Hałoŭčanku adstaŭkaj, kali pa vynikach hoda nie buduć vykananyja prahnoznyja pakazčyki. Jon aburaŭsia, što za pieršaje paŭhodździe nie zabiaśpiečany ekanamičny rost.
«Raman Alaksandravič, davajcie publična damovimsia tak… Nie vykanajecie sioleta pakazčykaŭ, jakija my daviali… Vy i pieršy vice-premjer (Mikałaj Snapkoŭ — «NN») idziacie ŭ adstaŭku»,
— zajaŭlaŭ Łukašenka.
Kali ž vykanajuć pakazčyki, paabiacaŭ «ordeny, uznaharody», a kali nie, to čynoŭniki musiać pastupić «pa-mužčynsku».
U žniŭni Łukašenka zahadaŭ vyklikać Hałoŭčanku z adpačynku, bo zastaŭsia niezadavolenym dakładami pra situacyju ŭ adukacyi i chacieŭ spynić «vakchanaliju pry arhanizacyi ŭstupnaj kampanii».
3 kastryčnika Łukašenka abrynuŭsia na ŭrad za niedachopy ŭ eksparcie biełaruskich tavaraŭ, u pryvatnaści prodažy kalijnych uhnajeńniaŭ.
Na hetaj naradzie Hałoŭčanka atrymaŭ za niedamovazdolnaść.
«Niekali my zamachvalisia, što stvorym adzinuju mahutnuju kampaniju, jakaja budzie zajmacca. Heta, Raman Alaksandravič, tak u vašym uradzie i patanuła ideja. Usio nam štości zaminaje. Moža, nie tolki vam…» — davodziŭ Łukašenka.
20 kastryčnika na naradzie pa pytańniach stratehičnych prajektaŭ Łukašenka abvinavaciŭ urad u dezynfarmacyi.
«Mianie bolš za ŭsio apošnim časam (ja ŭžo pra heta dzieści kazaŭ) chvaluje toje, što naš urad zamiest taho, kab kankretnaj spravaj zajmacca, pačynaje chłusić i dezynfarmavać prezidenta. Dla taho kab pakazać siabie ŭ lepšym śviatle», — aburyŭsia jon.
Narada ŭ Łukašenki. Ilustracyjnaje fota: belta.by
Na naradzie 14 listapada Łukašenka zakranuŭ «małočnuju spravu», pa jakoj zatrymali kiraŭnictva niekatorych zavodaŭ.
«Atrymanaja infarmacyja pakazała, što realizacyja schiemy nie mahła ažyćciaŭlacca biez udziełu słužbovych asob pradpryjemstvaŭ i dziaržorhanaŭ. Raman Alaksandravič, taksama adkažacie, kali tam buduć vašy asoby. Tam śvieciacca i siabry ŭrada. Ja nie nazyvaju proźviščaŭ, pakul idzie śledstva», — pryhraziŭ Hałoŭčanku.
19 śniežnia Łukašenka aburyŭsia situacyjaj ź mielijaracyjaj.
«Mianie ździŭlaje: usio pałamana, usio złamana, ratavać treba mielijaracyju jak halinu», — zajaŭlaŭ Łukašenka na sieminary-naradzie pa pytańniach adnaŭleńnia i vykarystańnia mielijaracyjnych ziamiel.
Na hetaj naradzie Hałoŭčanka niaśmieła spračaŭsia z Łukašenkam. U adnym z dakumientaŭ, jaki padpisaŭ Hałoŭčanka i jaki pracytavaŭ Łukašenka, havaryłasia, što ŭ Biełarusi sa 101 tranšejekapalnika 99 «całkam zamartyzavanyja».
«Skažy sumlenna, ty padpisaŭ, što tabie padsunuli, ci ty sam padličyŭ?» — źviarnuŭsia Łukašenka da staršyni ŭrada.
«Kožny, viadoma ž nie praviarali», — vinavata adreahavaŭ Hałoŭčanka.
«Dyk nie padpisvaj taho, čaho nie praviaraŭ».
Łukašenku nie zadavoliła apraŭdańnie Hałoŭčanki pra kolkaść pryciahnutych da adkaznaści za niadbajnaść słužboŭcaŭ. Jany ciapier, nastojvaŭ Łukašenka, «siadziać u pryvatnych strukturach i ŭtraja bolš zarablajuć i paśmiejvajucca».
«Ja vas užo papiaredžvaŭ. Mianie zabivaje toje, što vy pakazuchaj zajmajeciesia. Ja ž pa ŭsioj krainie lotaju i baču, dzie vy pracujecie, dzie — nie. (…) Ale vy pracujecie jak dačaśniki», — zrabiŭ vymovu Hałoŭčanku.
21 śniežnia ŭrad znoŭ trapiŭ u niamiłaść Łukašenki za rehulavańnie cen i darahija ahurki ŭ śniežni.
«Ich treba pieryjadyčna chvastać puhaju»
Ramana Hałoŭčanku Łukašenka pryznačyŭ staršynioj urada ŭ červieni 2020 hoda, kali ŭ krainie prachodziła pieradvybarčaja kampanija.
Svajo rašeńnie Łukašenka tłumačyŭ tym, što treba, kab ludzi pry hałasavańni razumieli, «chto budzie zajmacca vyrašeńniem nadzionnych pytańniaŭ, źviazanych ź ich žyćciom, sacyjalna-ekanamičnym raźvićciom našaj dziaržavy».
Palityčny ahladalnik «Radyjo Svaboda» Valer Karbalevič razvažaje: Łukašenka razumieje, što ŭ stvoranaj im dziaržaŭnaj madeli biez pastajannych i žorstkich impulsaŭ ź viaršyni administracyjnaj piramidy ŭsia sistema pracavać nie budzie.
«Tamu ich (čynoŭnikaŭ. — NN) treba pieryjadyčna chvastać niejkaj puhaju, bo inšych stymułaŭ niama», — adznačaje ekśpiert.
Valer Karbalevič. Fota: «Naša Niva»
Valer Karbalevič zaŭvažaje, što adrazu paśla 2020 hoda Łukašenka aścierahaŭsia žorstka krytykavać vysokich čynoŭnikaŭ, bo ad padtrymki namienkłatury zaležała jaho ŭłada i mienavita padtrymka namienkłatury zabiaśpiečyła jamu ŭtrymańnie va ŭładzie ŭ 2020 hodzie.
Ciapier ža jon umacavaŭ svaje pazicyi i viarnuŭsia da zvykłaj praktyki.
«Heta ž staraja, tradycyjnaja praktyka Łukašenki ad pačatku kiravańnia. Jon publična adčytvaŭ, krytykavaŭ, a to vyhaniaŭ čynoŭnikaŭ — i narodu heta padabałasia. Heta ž madel takaja: car dobry, a bajary drennyja», — davodzić ekśpiert.
Narodu Łukašenka tłumačyć, što hałoŭnyja vinoŭniki drennaha žyćcia — čynoŭniki, jakija nie vykonvajuć jaho mudrych ukazańniaŭ, havoryć dalej Valer Karbalevič.
«Ad imia naroda jon i zmahajecca z čynoŭnikami i ŭvieś čas ich pluščyć, — kaža jon. — A kamu pretenzii vykazvać? Zrazumieła, uradu. Pa ŭsich prablemach, jakija isnujuć u ekanomicy, sacyjalnaj śfiery, urad adkazvaje. Tamu na jaho hnieŭ i abrynajecca».
Ci mahčymaja bližejšym časam adstaŭka Hałoŭčanki i jaho ŭrada, Valer Karbalevič aścierahajecca prahnazavać.
«Takija rečy, jak kadravyja pieramieny — samyja nieprahnazavanyja ŭ palitycy Łukašenki».
Hladzicie taksama:
Ad palityčnych kantaktaŭ u Afrycy pakul niama tołku dla ekanomiki — Hałoŭčanka
Čynoŭnik, jaki nie pajšoŭ suprać narodu. Pavieł Łatuška — pra 2020 hod i budučyniu