Стала вядома, у чым вінавацяць былых супрацоўніц светлагорскага тэлеканала «Ранак»
МУС справаздачыўся аб затрыманні і завядзенні крымінальнай справы ў адносінах да былых супрацоўніц тэлеканала «Ранак», якіх затрымалі 7 снежня.
14.12.2023 / 09:32
Скрын міліцэйскага відэа
Аператыўнікі справаздачыліся, што затрымалі дзвюх жыхарак Светлагорска (39 і 41 гады). Яшчэ адзін фігурант справы — 53-гадовы мужчына, паводле МУС, «схаваўся за мяжой».
Паводле МУС, фігуранты справы «ў 2020 годзе стварылі і адміністравалі групу ў Telegram».
«У ёй друкавалася інфармацыя, накіраваная на арганізацыю, падрыхтоўку і здзяйсненне масавых беспарадкаў, супраціў супрацоўнікам праваахоўных органаў з мэтай замахаў на незалежнасць, тэрытарыяльную цэласнасць, асновы канстытуцыйнага ладу нашай краіны. Свае дэструктыўныя погляды яны прасоўвалі і праз інфармацыйныя рэсурсы тэлерадыёкампаніі», — сцвярджае МУС.
Следчымі ўзбуджана крымінальная справа за стварэнне экстрэмісцкага фарміравання.
7 снежня стала вядома пра ператрусы ў Людміла Андэнка (карэспандэнтка) і Юліі Даўлетавай (былая галоўная рэдактарка «Ранка»).
Была інфармацыя, што жанчын затрымалі ў межах крымінальнай справы па арт. 361-4 КК (садзейнічанне экстрэмісцкай дзейнасці).
11 чэрвеня ў Светлагорску былі затрыманыя восем супрацоўнікаў тэлеканалу «Ранак». Сапраўднай прычынай для затрымання мог стаць сюжэт пра выбух на Светлагорскім ЦКК, у якім загінула тры чалавекі.
У верасні тэлеканал прызналі «экстрэмісцкім фармаваннем». Былы рэдактар «Ранка» Андрэй Ліпскі, імаверна, з'ехаў з краіны.