Raskryli miechanizm, jaki ŭžyvajuć śpiecsłužby roznych krain dla sačeńnia za karystalnikami. Raskazvajem, što za jon
«Usia sprava ŭ push-apaviaščeńniach», — aficyjna pryznali kampanii Apple i Google.
08.12.2023 / 19:20
Kałaž: «Naša Niva»
Člen kamiteta pa vyviedcy pry Sienacie ZŠA Roj Uajden dniami adpraviŭ aficyjny list u Ministerstva justycyi krainy z prośbaj publična raskryć adzin ź miechanizmaŭ sačeńnia za karystalnikami smartfonaŭ «z boku ŭrada ZŠA i niekatorych inšych krain».
Havorka idzie pra pieradaču śpiecsłužbam asabistaj infarmacyi karystalnikaŭ praz push-apaviaščeńni na ich telefonach, pieradaje partał Android Authority.
Pa infarmacyi sienatara Uajdena, jaki pravioŭ ułasnaje rasśledavańnie, pieradačaj asabistych danych praz push-apaviaščeńni «niepublična i daŭno» zajmajucca kampanii Apple i Google.
«Apple i Google niepublična pieradajuć śpiecsłužbam asabistyja danyja svaich karystalnikaŭ praz push-apaviaščeńni na ich telefonach.
Vyjaviłasia, što hetyja apaviaščeńni prychodziać nie niepasredna ad raspracoŭščykaŭ peŭnych dadatkaŭ, a praź śpiecyjalnyja prahramy ŭ našych telefonach, jakimi kirujuć stvaralniki apieracyjnych sistem iOS i Android. Heta dazvalaje zachoŭvać usie danyja z hetych apaviaščeńniaŭ na siervierach kampanij i pieradavać ich pa zapytach śpiecsłužbaŭ.
Prašu źniać abmiežavańni z technałahičnych kampanij na papiaredžańnie karystalnikaŭ pra padobny typ sačeńnia», — napisaŭ u svaim zvarocie da Miniusta ZŠA sienatar Roj Uajden.
Śpiecyjalnyja prahramy, pra jakija idzie havorka ŭ liście — heta Push Notification Service (Apple) i Firebase Cloud Messaging (Google). Hetyja słužby zabiaśpiečvajuć svoječasovuju i efiektyŭnuju dastaŭku apaviaščeńniaŭ, ale heta taksama aznačaje, što Apple i Google vystupajuć u jakaści pasiarednikaŭ u pracesie pieradačy, napisaŭ Roj Uajden.
Jon dadaŭ, što ŭ raspracoŭščykaŭ dadatkaŭ asabliva i niama inšaha varyjantu, akramia jak tolki karystacca hetymi aficyjnymi słužbami, bo heta harantuje nadziejnuju dastaŭku apaviaščeńniaŭ karystalnikam. Ale ŭ toj ža čas heta nadaje Apple i Google manapoliju na pasiarednictva i adsočvańnie trafiku infarmacyi.
«Infarmacyja, jakuju atrymlivajuć kampanii praz push-apaviaščeńni, źmiaščaje asabisty telefon i miescaznachodžańnie karystalnika, a taksama danyja pra sam dadatak, jakim jon karystajecca (razam z dakładnym časam vykarystańnia dadatku).
Taksama kampanii mohuć atrymlivać poŭny abo častkovy dostup da tekstu apaviaščeńniaŭ (u zaležnaści ad šyfravańnia) i ich kolkaści. Hetyja danyja ŭžo pieradajucca ŭradam niekatorych krain pa niepubličnych zapytach», — adznačyŭ sienatar ZŠA.
Jak piša partał Android Authority, kampanii Apple i Google adhuknulisia na list sienatara Uajdena i pryznali fakt adsočvańnia karystalnikaŭ praz push-apaviaščeńni.
Pradstaŭniki Apple zajavili, što ŭrad ZŠA zabaraniŭ kampanii dzialicca luboj infarmacyjaj pra hety typ sačeńnia. Adnak ciapier, paśla adkrytaha lista sienatara, jaki staŭ jurydyčnym precedentam dla publičnaha raskryćcia hetaj tajamnicy, Apple zmoža paviedamlać karystalnikam pra sproby atrymańnia ich asabistych danych praz push-apaviaščeńni.
Toje ž samaje zajavili i ŭ kampanii Google, «vykazaŭšy ŭdziačnaść» Uajdenu za infarmavańnie hramadskaści ab padobnym miechaniźmie sačeńnia.
Čytajcie taksama:
Jak vyznačyć ahienta ŭ svaim atačeńni
Prajekt «Piehas» — revalucyja ŭ špijanažy
Kala traciny biełarusaŭ sutykalisia z uzłomam staronak u sacyjalnych sietkach
Miesiendžary, kamiery, žučki. Jak śpiecsłužby mohuć prasłuchoŭvać biełarusaŭ i čaho aścierahacca?
Raspaznavańnie tvaraŭ: što heta takoje, jak jano pracuje i jakija zdolnaści biełaruskich siłavikoŭ