Bolš za 3100 hruzavikoŭ čakajuć na biełaruskaj miažy ŭjezdu ŭ ES
Pryčym na adzinym pamiežnym punkcie z Polščaj — «Kazłovičy—Kukuryki» — staić 1000 mašyn.
05.12.2023 / 14:38
Ilustracyjnaje fota «Naša Niva»
Čerhi hruzavych aŭtamabilaŭ, jakija čakajuć ujezdu ź Biełarusi ŭ krainy Jeŭrasajuza, praciahvajuć pavialičvacca, na miažy pa stanie na 14:00 sabrałasia 3100 mašyn, paviedamiŭ Dziaržaŭny pamiežny kamitet.
«1 000 hruzavikoŭ fiksujecca pierad samym zahružanym polskim pamiežnym pierachodam «Kukuryki» (sumiežny biełaruski — «Kazłovičy»), jaho supracoŭniki za sutki aformili kala 60% aŭto ad normy», — havorycca ŭ DPK.
Na miažy ź Litvoj u Bieniakoniach staić 830 vielikahruzaŭ, u Kamiennym Łohu — 490, Katłoŭcy — 310, najmienš zahružanaja blizkaja da Hrodna Pryvałka, tam staić usiaho 190 mašyn.
Što da miažy z Łatvijaj, to ŭ Hryharaŭščynie staić 310 mašyn.