U Indaniezii pry vyviaržeńni vułkana zahinuli 11 čałaviek
U rajonie vułkana znachodziłasia 75 čałaviek. 49 čałaviek udałosia evakujavać. Mnohim ź ich spatrebiłasia miedycynskaja dapamoha z-za apiokaŭ.
04.12.2023 / 09:20
Fota: Ardhy Fernando / AP
U vyniku vyviaržeńnia vułkana Marapi ŭ zachodniaj častcy indaniezijskaha vostrava Sumatra zahinuli jak minimum 11 čałaviek. Ratavalniki znajšli taksama traich vyžyłych, piša Bi-bi-si.
Jašče 12 čałaviek, jakija znachodzilisia ŭ rajonie stychijnaha biedstva, ličacca źnikłymi bieź viestak. Ich pošuki pakul prypynienyja z-za mierkavańniaŭ biaśpieki.
«Zanadta niebiaśpiečna ciapier praciahvać pošuki», — skazaŭ pradstaŭnik vyratavalnaj kamandy Džodzi Charjavan, kamientujučy novaje nievialikaje vyviaržeńnie, jakoje adbyłosia ŭžo siońnia.
Maštabnaje vyviaržeńnie vułkana Marapi na Sumatry adbyłosia ŭ niadzielu dniom 3 śniežnia.
Pa danych vyratavalnych słužbaŭ, u rajonie vułkana znachodziłasia 75 čałaviek. 49 čałaviek udałosia evakujavać. Mnohim ź ich spatrebiłasia miedycynskaja dapamoha z-za apiokaŭ.
Vułkan vykinuŭ słup popiełu na vyšyniu 3 km. Popieł nakryŭ niekalki viosak. Vyšynia vułkana składaje 2 891 mietr.
Ułady Indaniezii abviaścili druhi ŭzrovień niebiaśpieki ŭ suviazi z vyviaržeńniem i zabaranili žycharam padychodzić bližej čym na 3 km da kratara.
Marapi — adzin z samych aktyŭnych vułkanaŭ na vostravie Sumatra, jaho samaje razburalnaje vyviaržeńnie adbyłosia ŭ krasaviku 1979 hoda, kali zahinuła 60 čałaviek.
Indaniezijski archipiełah, jaki składajecca z 18 tys. astravoŭ, raźmieščany ŭ tak zvanym Cichaakijanskim vułkaničnym vohniennym kalcy. Siejśmičnaja aktyŭnaść u hetaj zonie amal nikoli nie spyniajecca.
Čytajcie taksama:
Vułkan Etna znoŭ aktyŭna vyviarhaje łavu
Biełaruski fatohraf prylacieŭ u Isłandyju zdymać viasielle — a tam čakajuć vyviaržeńnia vułkana