Дзе ў Беларусі можна актыўна адпачыць зімой
Сезон масавых катанняў на лыжах, санках і цюбінгах ужо стартаваў у Беларусі. У якіх месцах можна заняцца зімовым актыўным адпачынкам і колькі гэта каштуе, пералічыла БелТА.
02.12.2023 / 19:50
Фота з сацсетак
Традыцыйна адным з першых у краіне працу пачаў гарналыжны курорт у Лагойску. Пакуль для адпачывальнікаў адкрытыя дзве трасы: чацвёртая і навучальны схіл. Што тычыцца цэнаў, то поўны камплект для катання даросламу абыдзецца ў 25 рублёў у будні і да 30 рублёў у выходныя. Дадаткова можна арандаваць шлем або маску.
У сталічным цэнтры «Сонечная даліна» ў мікрараёне Курасоўшчына працуе толькі атракцыён «Альпійскія горкі» і навучальны схіл. Калі снегу стане больш, адкрыюцца і іншыя лакацыі. Тут арэнда лыжаў у будні абыдзецца ў 27 рублёў. У выхадныя цана падымаецца да 41 рубля.
Дарэчы, недалёка адсюль можна «легальна» пакатацца на цюбінгу. А ўсяго ў Мінску вызначана некалькі дзясяткаў такіх пляцовак.
Спецыялісты нагадваюць, што схіл у такім выпадку не павінен перавышаць ухіл у 20 градусаў, а на спуску не павінна быць дрэў ці іншых аб'ектаў, якія могуць прывесці да траўмаў.
У Мінску працуе і лыжная траса ў мікрараёне Вяснянка. Цяпер яе даўжыня складае 1 кіламетр, але паступова працягласць будзе павялічвацца. Тут жа размешчаны пункт пракату неабходнага абсталявання.
Першых гасцей ужо прыняў і спартыўны комплекс «Раўбічы», пакуль яшчэ на лыжнай трасе даўжынёй 1,8 кіламетра. Падабраць неабходную экіпіроўку можна на месцы. З улікам арэнды лыж гадзіна катання абыйдзецца ад 10 да 12 рублёў. Дзіцячы камплект будзе каштаваць 7 рублёў.
У Мазыры да катанняў рыхтуюць трасу мясцовай гарналыжнай базы. Назваць дату яе адкрыцця ў адміністрацыі сказаць пакуль не змаглі:
«Арыентуемся на ўмовы надвор'я і доўгатэрміновы прагноз. Балазе ў найбліжэйшы час прагназуецца ўстойлівы мінус і снег, таму, хутчэй за ўсё, сезон катанняў адкрыем найбліжэйшым часам».
У Мазыры можна пакатацца на лыжах, снаўбордзе і іншых прыстасаваннях. Ёсць тут і свой пункт арэнды зімовага абмундзіравання. Актуальныя цэны з'явяцца на афіцыйнай старонцы гарналыжнай базы бліжэй да яе адкрыцця.
Рыхтуюць снежныя схілы да прыходу аматараў экстрыму і каля Гродна. Як расказалі ў парку актыўнага адпачынку «Каробчыцкі Алімп», там ствараюць прыдатнае для катання покрыва чатыры снегавыя гарматы:
«Гэта не самы хуткі працэс, аднак робім усё, каб прыняць гасцей як мага хутчэй. Па нашых разліках, ужо праз некалькі дзён. З радасцю чакаем адкрыцця сезона».
Што тычыцца папулярных «Сілічаў», то комплекс ужо пачаў працу. З 1 снежня госці атрымалі доступ да трас пад нумарамі 1, 3, 6. Для нявопытных аматараў зімовага адпачынку запрацуе навучальны схіл.
Рыхтуюцца да новага сезона і ў Магілёве, у прыватнасці ў аздараўленча-забаўляльным комплексе «Пячэрск». Тут можна пакатацца як на звычайных лыжах, так і на снаўбордзе, цюбінгах і снегаходзе.
«Пакуль пра дакладны час адкрыцця сказаць складана праз умовы надвор'я. Тым не менш, на ўсю моц рыхтуем наш схіл і трасы. Будзе працаваць і пункт пракату, дзе адпачывальнікі змогуць узяць неабходную экіпіроўку», — расказалі ў прыёмнай комплексу.
Акрамя таго, плануецца арганізаваць трасы на тэрыторыі Брэсцкага вяслярнага канала, а таксама ў аграгарадку Руба каля Віцебска.
Узімку таксама адкрываюцца каткі, прычым не толькі стацыянарныя, але і на адкрытых пляцоўках. Іх, як правіла, арганізуюць на школьных лёгкаатлетычных стадыёнах альбо ў хакейных каробках каля ўстаноў адукацыі. Адрасы можна знайсці на сайтах мясцовых адміністрацый.
Чытайце таксама:
Галоўная гераіня тэксту пра адпачынак расіянак у Мінску прыйшла ў каменты да «Нашай Нівы»
Ад 205 да 1500 рублёў: варыянты сустрэць Новы год у «гістарычным стылі»
Як самастойна спланаваць авіяпадарожжа і не прагадаць? Беларусы падзяліліся лайфхакамі