Турыстаў у Беларусі меншае, нават расіяне знаходзяць новыя кірункі
Уязны турызм сёлета ў параўнанні з мінулым годам скараціўся на 10-12 працэнтаў. Так ацэньваюць сітуацыю ў Рэспубліканскім саюзе турыстычнай індустрыі, у склад якога ўваходзіць больш за 160 розных арганізацый. Лічбамі падзяліўся старшыня праўлення турсаюза Філіп Гулы на Sb.by.
29.11.2023 / 16:18
Фота ілюстрацыйнае. Крыніца: сацсеткі
Філіп Гулы, праўда, падкрэсліў, што гэта суб'ектыўныя ацэнкі, заснаваныя на асабістым аналізе і назіраннях, а афіцыйная статыстыка, якая ідзе з затрымкай часу, можа даць іншыя лічбы.
Паводле назіранняў Гулага,
«мала ў каго з аб'ектаў размяшчэння сярэдняя загрузка ў гэтым годзе перавышала 75 працэнтаў. Але мы разумеем, што ў вялікай колькасці загрузка не перавышае 50 працэнтаў, у кагосьці ніжэйшая за 45 працэнтаў».
Пры гэтым ён адмыслова падкрэслівае, што не бярэ тут у разлік санаторыі, у якіх з загрузкай усё нармальна.
Прычыны змяншэння папулярнасці ў расіян беларускага кірунку Філіп бачыць у тым, што ў Расіі, адкуль у асноўным турысты ў Беларусь толькі і едуць,
«за кошт мер падтрымкі галіны расце нумарны фонд — больш чым на 15 працэнтаў у 2023 годзе ў параўнанні з 2022-м, адкрываюцца новыя выязныя напрамкі: напрыклад, Тайланд «паглынуў» 2 млн расіян».
Пры гэтым маржынальнасць і рэнтабельнасць турпрадпрыемстваў, нягледзячы на скарачэнне агульнай плыні турыстаў, нібыта нават павялічылася, то-бок іх даходы выраслі, сцвярджае Гулы.
Чытайце таксама:
Crowne Plaza Minsk закрыўся. Што адбылося і які сігнал атрымаў гатэльны бізнэс
Ад 205 да 1500 рублёў: варыянты сустрэць Новы год у «гістарычным стылі»
У мінскіх гатэлях на навагоднія святы ўжо зарэзервавалі пераважную большасць нумароў