Пад Барысавам пачалі ствараць дзіцячы рэабілітацыйны цэнтр Аляксея Талая
Пачалося стварэнне рэабілітацыйнага цэнтра для дзяцей, якія страцілі канцавіны. Ён будзе пабудаваны пад Барысавам на месцы колішняй сядзібы князёў дома Раманавых. Пра гэта паведаміў паралімпіец Аляксей Талай. Як піша «Мінская праўда», адначасова праходзіць рэабілітацыю ў цэнтры змогуць ад 6 да 17 дзяцей.
21.11.2023 / 18:19
Праект рэабілітацыйнага цэнтра ў Старабарысаве. Фота: mlyn.by
«Гэта дазволіць у рамках гадавога цыклу дапамагчы больш як сотні дзяцей з Беларусі і Расіі здабыць усе навыкі жыцця з пратэзам або сродкам мабільнасці, заняцца паралімпійскім плаваннем, вызначыцца з прафесіяй, аздаравіцца», — піша Мінская праўда».
Праект рэабілітацыйнага цэнтра ў Старабарысаве. Фота: mlyn.by
Талай разлічвае, што грошы на гэты цэнтр могуць даць улады некаторых расійскіх рэгіёнаў і чакае, што цэнтр будзе пабудаваны цягам некалькі гадоў.
Праект рэабілітацыйнага цэнтра ў Старабарысаве. Фота: mlyn.by
Нагадаем, што пасля пачатку поўнамаштабнай вайны ва Украіне фонд Аляксея Талая збірае дапамогу для самаабвешчаных «ДНР» і «ЛНР» і прывозіць у Беларусь на «аздараўленне» дзяцей з акупаваных тэрыторый, што прызнана Міжнародным крымінальным судом ваенным злачынствам.
Раней, у чэрвені гэтага года, стала вядома, што невядомы расіянін перадаў закінутую дом-сядзібу князёў Раманавых у Старабарысаве дабрачыннаму фонду Талая.
Дом-сядзіба вялікіх князёў царскага дому Раманавых у аграгарадку Старабарысаў ужо шмат гадоў разбуралася. Тут мянялася шмат гаспадароў, былі спробы аднаўлення і рэканструкцыі, але яны не мелі поспеху.
Чытайце таксама:
Што сабой уяўляе і з каго складаецца сетка расейскага ўплыву ў Беларусі
У Беларусі ўкраінскіх дзяцей вучаць: «Тут ты паслужыш вялікай Расіі»