«Пачала прымаць упрыкуску з лімонам, для вітамінаў». У Слонімскім раёне дзве жанчыны атруціліся мухаморамі
Дзве жанчыны ў Слонімскім раёне трапілі ў бальніцу пасля «лячэння» мухаморамі, піша БелТА на падставе сведчання загадчыцы аддзялення гігіены харчавання Гродзенскага абласнога цэнтра гігіены і эпідэміялогіі Марыя Руфкіна.
16.11.2023 / 18:16
Фота: Iuliia Zavalishina / vecteezy.com
«Адна з іх, 44-гадовая жыхарка раёна, знайшла ў інтэрнэце рэцэпт лячэння рэўматызму шапачкамі мухамораў. Сабрала атрутныя грыбы, высушыла іх на батарэі ацяплення ў кватэры і прыступіла да курсу «аздараўлення». Праўда, працягнуўся ён нядоўга. З атручваннем жанчына трапіла ў бальніцу і засталася жывая толькі дзякуючы аператыўнай дапамозе медыкаў.
Другая жанчына, 45 гадоў, прачытала ў сеціве, што шапачкі мухамораў здымаюць дэпрэсію, і, высушыўшы грыбы ў духоўцы і затым на батарэі, здрабніла і пачала прымаць упрыкуску з лімонам, «для вітамінаў». Вынік той жа — атручэнне і бальніца. Балазе, маці жанчыны своечасова зарыентавалася і выклікала хуткую», — расказала загадчыца аддзялення.
Спецыялістаў санітарна-эпідэміялагічнай службы турбуе факт, што нават адукаваныя людзі давяраюць рэцэптам з інтэрнэту, многія з якіх не толькі бескарысныя, але і небяспечныя.
Чытайце таксама:
22-гадовая беларуска атруцілася сушанымі мухаморамі ў прэстыжным маскоўскім гатэлі
Ці ведаеце вы, што з вамі будзе, калі вам пададуць недастаткова правараныя грыбы шыітаке?
У Бярозаўскім раёне пенсіянерка атруцілася апенькамі. Як так сталася?