Padryŭ «Paŭnočnych patokaŭ» ažyćciaviŭ ukrainski pałkoŭnik Raman Čarvinski. Jon ža ŭ 2020-m vymańvaŭ vahnieraŭcaŭ z Rasii ŭ Biełaruś — WP
Pavodle infarmacyi vydańnia The Washington Post, Čarvinski z sankcyi viarchoŭnaha vajennaha kamandavańnia Ukrainy kaardynavaŭ dyviersiju na rasijskich hazapravodach «Paŭnočnyja patoki 1-2». Akramia taho, jon kamandavaŭ i apieracyjaj pa zachopie vahnieraŭcaŭ, jakich aryštavali ŭ Biełarusi pierad vybarami ŭ 2020-m hodzie.
11.11.2023 / 22:57
Były pałkoŭnik SBU i HUR Ukrainy, a taksama były kamandzir adnoj z vajskovych čaściej Sił śpiecyjalnych apieracyj Uzbrojenych sił Ukrainy Raman Čarvinski. Fota: skrynšot ź videa jutub-kanała «Christia»
Były pałkoŭnik Hałoŭnaha raźviedvalnaha ŭpraŭleńnia i Słužby biaśpieki Ukrainy, a taksama były kamandzir adnoj z vajskovych čaściej Sił śpiecyjalnych apieracyj Uzbrojenych sił Ukrainy Raman Čarvinski niepasredna kamandavaŭ apieracyjaj pa źniščeńni linij rasijskich hazapravodaŭ «Paŭnočnyja patoki 1-2» u minułym hodzie, paviedamiła vydańnie The Washington Post sa spasyłkaj na krynicy, blizka znajomyja ź situacyjaj.
Vydańnie taksama dadaje, što 48-hadovy ŭkrainski aficer dziejničaŭ pa zahadzie inšych vysokapastaŭlenych čynoŭnikaŭ Ukrainy, jakija dakładvali ab chodzie apieracyi Hałoŭnakamandujučamu USU Valeryju Załužnamu.
«Raman Čarvinski kiravaŭ łahistykaj i padtrymkaj kamandy z šaści čałaviek, jakaja, dziakujučy padroblenym dakumientam, arandavała paruśnik i vykarystała hłybakavodnaje vadałaznaje abstalavańnie dla raźmiaščeńnia vybuchovych zaradaŭ na hazapravodach.
Ale Čarvinski płanavaŭ apieracyju nie adzin. Aficer prymaŭ zahady ad bolš vysokapastaŭlenych ukrainskich čynoŭnikaŭ, jakija ŭ kančatkovym vyniku dali spravazdaču hienierał-majoru Valeryju Załužnamu», — raspaviali na ŭmovach ananimnaści krynicy vydańnia The Washington Post.
Sam Čarvinski abviarhaje svoj udzieł u kaardynacyi padryvaŭ «Paŭnočnych patokaŭ».
Pry hetym, jak adznačaje The Washington Post, Raman Čarvinski kamandavaŭ jašče adnoj apieracyjaj. U 2020-m hodzie jon sprabavaŭ vymanić najmitaŭ PVK «Vahnier» z Rasii ŭ Biełaruś, kab potym złavić ich na šlachu ŭ inšyja krainy. Adnak apieracyja pravaliłasia, kali ŭ spravu ŭmiašalisia KDB i siłaviki Łukašenki, jakija aryštavali vahnieraŭcaŭ pieršymi i potym adpuścili ich u Rasiju.
U dadzieny momant Raman Čarvinski znachodzicca va ŭkrainskim SIZA za toje, što letam 2022 hoda padčas apieracyi pa vymańvańni piłota rasijskaha źniščalnika na terytoryju Ukrainy raskryŭ kaardynaty adnaho z ukrainskich aeradromaŭ, pa jakim Rasija zatym naniesła rakietny ŭdar, zabiŭšy adnaho i paraniŭšy 17 ukrainskich vajskoŭcaŭ.
Čarvinskamu staviać u vinu pieravyšeńnie słužbovych paŭnamoctvaŭ, što moža paciahnuć ad 8 da 12 hadoŭ pazbaŭleńnia voli. Ukrainskaje kiraŭnictva zajaŭlaje, što aficer padčas apieracyi z rasijskim samalotam dziejničaŭ biez apaviaščeńnia kamandavańnia, adnak Čarvinski naadvarot śćviardžaje, što zahad dziejničać byŭ i jaho prosta chočuć prybrać.
Čytajcie taksama:
U źlitych sakretnych dakumientach ZŠA tłumačycca dyviersija ŭ Mačuliščach