Na leciščy la Hrodna susiedski sabaka zahryz pamieranskaha špica
Cieła špica znajšli daloka ad chaty ŭ kukuruznym poli. Haspadary źviarnulisia ŭ milicyju, ale vyniesienaja pastanova ich ździviła, paviedamlaje błoh s13.ru.
02.11.2023 / 18:28
Pamieranski špic
23 vieraśnia na leciščy ŭ sadovym tavarystvie «Aŭtamahnitoła» vialiki susiedski sabaka napaŭ na ich pamieranskaha špica:
— Ryčy byŭ siamiejnikam, šeść hadoŭ žyŭ u kvatery z baćkami i byŭ ulubioncam usich, asabliva našych dziaciej, — raspaviadaje haradzienka. — Na našym učastku byli źniatyja varoty na ramont, i da nas prybieh susiedski sabaka. Zrazumieła, što naš špic uskočyŭ achoŭvać terytoryju, a susiedski sabaka schapiŭ za šyju Ryčy i pačaŭ uciakać ź im.
Kala kiłamietra haspadary biehli za sabakami, sprabujučy vyratavać špica. Ale potym susiedski sabaka schavaŭsia ź im u kukuruznym poli:
— My vyklikali milicyju. Pryjechaŭ učastkovy i aformiŭ pratakoł. Skazaŭ, što haspadar sabaki atrymaje, chutčej za ŭsio, «administracyjku» i štraf za ŭtrymańnie. Paźniej, jak źjechaŭ učastkovy, my pajšli pračesvać pole, i znajšli našaha sabaku…
U pačatku kastryčnika haspadary špica atrymali papieru ab vynikach pravierki milicyi, dzie paznačana, što «sprava ab administracyjnym pravaparušeńni spynienaja». Haspadary vyzvalenyja ad administracyjnaj adkaznaści, u dačynieńni da ich vyniesiena papiaredžańnie.
— Haspadary — piensijaniery. Žyvuć na leciščy ceły hod, učastak u ich — krajni. Jak skazała haspadynia, sabaku jany ŭziali dla achovy ŭčastka ad lis. Ale sabaka ich nie zarehistravany, pryščepak, nakolki mnie viadoma, jany nie zrabili. Dahetul asabista navat nichto ź ich nie prychodziŭ da nas. Tolki dva razy telefanavali i pytalisia pra kampiensacyju, a jak atrymali list ź milicyi — tak i zusim źnikli.
Ciapier haspadary Ryčy płanujuć iści ŭ sud.
***
Za parušeńnie ŭstanoŭlenych praviłaŭ praduhledžana administracyjnaja adkaznaść, pry hetym kali parušeńnie praviłaŭ utrymańnia žyvioł paciahnuła pryčynieńnie škody zdaroŭju ludziej albo majomaści, adkaznaść budzie bolš strohaj, pakolki zychodziačy z charaktaru i stupieni hramadskaj škodnaści takoje administracyjnaje pravaparušeńnie pryznajecca hrubym.
Parušeńnie praviłaŭ utrymańnia žyvioł ciapier moža paciahnuć nakładańnie štrafu ad 1 da 15 bazavych vieličyń (37-555 rubloŭ). U vypadkach, kali parušeńnie paciahnuła pryčynieńnie škody zdaroŭju ludziej abo majomaści, na ŭładalnika moža być nakładzieny štraf ad 10 da 30 bazavych vieličyń (370-1100 rubloŭ), abo pryznačanyja hramadskija pracy, abo prymienieny administracyjny aryšt.
Asoba, jakaja ŭčyniła parušeńnie praviłaŭ utrymańnia žyvioł, moža być vyzvalena ad administracyjnaj adkaznaści z vyniasieńniem jamu papiaredžańnia pry vykanańni adnačasova nastupnych umoŭ:
— asoba pryznała fakt ździajśnieńnia im administracyjnaha pravaparušeńnia i vykazała zhodu na vyzvaleńnie ad administracyjnaj adkaznaści z vyniasieńniem papiaredžańnia;
— na praciahu adnaho hoda da ździajśnieńnia administracyjnaha pravaparušeńnia na asobu nie nakładałasia administracyjnaje spahnańnie i asoba nie vyzvalałasia ad administracyjnaj adkaznaści z vyniasieńniem papiaredžańnia za takoje ž administracyjnaje pravaparušeńnie;
— pry najaŭnaści škody, naniesienaj navakolnamu asiarodździu ŭ vyniku ździajśnieńnia dadzienaha administracyjnaha pravaparušeńnia, asoba dobraachvotna kampiensavała takuju škodu da abviaščeńnia pastanovy pa spravie ab administracyjnym pravaparušeńni.