Šejman sustreŭsia z prezidentam Zimbabve. Biełaruskija dziaržaŭnyja ŚMI pra heta nie paviedamili
Vizit aśviatlali zimbabvijskija dziaržorhany.
01.11.2023 / 16:26
Fota: twitter.com/DeptCommsZW
Śpiecpasłańnik Alaksandra Łukašenki Viktar Šejman, jaki kuryruje afrykanski kirunak, adpraviŭsia ź vizitam u Zimbabve. 30 kastryčnika jon pravioŭ šerah sustreč u hetaj krainie, piša Reform.by.
30 kastryčnika Šejman sustreŭsia ź ministram zamiežnych spraŭ Zimbabve Frederykam Šavaj i prezidentam Emiersanam Mnanhahva. Vizit aśviatlali zimbabvijskija dziaržorhany. Biełaruskija dziaržaŭnyja ŚMI pra jaho ničoha nie paviedamlali.
«Prezident Mnanhahva vitaŭ hienierała Viktara Šejmana, śpiecyjalnaha pradstaŭnika prezidenta Biełarusi, u Dziaržaŭnym pałacy. Baki abmierkavali status pahadnieńniaŭ, padpisanych padčas vizitu Alaksandra Łukašenki ŭ Zimbabve sioleta», — paviedamlaje MZS Zimbabve.
Kancylaryja zimbabvijskaha prezidenta paviedamiła, što Mnanhahva i Šejman razhledzieli chod realizacyi pahadnieńniaŭ, padpisanych padčas vizitu Łukašenki ŭ Zimbabve ŭ studzieni hetaha hoda. Taksama paviedamlałasia, što Šejman źbirajecca sustrecca z pradstaŭnikami ministerstvaŭ sielskaj haspadarki i hornazdabyŭnoj pramysłovaści.
Jak paviedamlaje zimbabvijskaje vydańnie The Herald, biełaruskaja delehacyja abmiarkoŭvała supracoŭnictva ź Zimbabve ŭ sielskaj haspadarcy. U pryvatnaści, razmova išła ab małočnaj pramysłovaści i budaŭnictvie sučasnaha małočnaha kompleksu ŭ Zimbabve.
«U nas dobryja adnosiny. Jak vy viedajecie, u našych krainach pracujuć pasolstvy, i my supracoŭničajem u sielskaj haspadarcy, asabliva ŭ małočnaj pramysłovaści. My dumajem, ich technałohii vyjaviacca dla nas karysnymi. U Biełarusi fantastyčnyja małočnyja zavody», — zajaviŭ ministr zamiežnych spraŭ Zimbabve.
Čytajcie taksama:
Biznesoŭca Zinhmana zaŭvažyli na pieramovach Łukašenki i Mbasoha FOTAFAKT
Na inaŭhuracyju prezidenta Zimbabve adpravili vice-premjera Parchomčyka