BiełAES abyšłasia ŭ 5,36 miljarda dalaraŭ — Minfin RF
Raniej praduhledžvałasia, što pahašeńnie biełaruskim bokam kredytu pačynajecca praz šeść miesiacaŭ z daty ŭvodu ŭ ekspłuatacyju atamnaj elektrastancyi, ale nie paźniej za 1 krasavika 2024 hoda, i ažyćciaŭlajecca 30 roŭnymi dolami kožnyja 6 miesiacaŭ.
01.11.2023 / 09:43
Biełaruskaja AES. Fota: Reform.by
Ahulny abjom vykarystańnia kredytu na budaŭnictva BiełAES składzie 5,36 miljarda dalaraŭ, u tym liku ŭ 2023 hodzie — kala 100 miljonaŭ dalaraŭ, havorycca ŭ tłumačalnaj zapiscy Minfina Rasii), piša Reform.by.
Zapiska była padrychtavana ŭ pačatku hoda dla abhruntavańnia źmianieńniaŭ u Pahadnieńnie pamiž uradami Rasii i Biełarusi ab pradastaŭleńni dziaržaŭnaha ekspartnaha kredytu dla budaŭnictva AES na terytoryi Biełarusi ad 25 listapada 2011 hoda. Urad RF 25 lutaha 2023 hoda ŭchvaliŭ źmieny, a ŭ kancy vieraśnia prezident RF Uładzimir Pucin padpisaŭ zakon ab ratyfikacyi pratakoła.
Zhodna z abnoŭlenym pahadnieńniem, «Kredyt vykarystoŭvajecca biełaruskim bokam u 2011-2023 hadach», a «pahašeńnie biełaruskim bokam kredytu pačynajecca praz 6 miesiacaŭ z daty ŭvodu ŭ ekspłuatacyju atamnaj elektrastancyi, ale nie paźniej za 1 krasavika 2024 hoda, i ažyćciaŭlajecca 30 roŭnymi dolami kožnyja 6 miesiacaŭ». Płaciažy pa kredycie pravodziacca vyklučna ŭ rasijskich rublach.
U tłumačalnaj zapiscy Minfina RF śćviardžałasia, što, pa infarmacyi dziaržkarparacyi «Rasatam», ź lutaha 2022 hoda hrafik vykanańnia rabot pa ŭvodu ŭ ekspłuatacyju błoka № 2 BiełAES «źviedaŭ źmieny, hałoŭnym čynam, z-za dziejańniaŭ biełaruskich subpadradčykaŭ, z pryčyny čaho prahnozny termin uvodu AES u ekspłuatacyju pieranosicca na žnivień 2023 hoda (kala 90% prajekta realizavana)».
Tam ža nazyvajecca vynikovaja suma kredytu na budaŭnictva BiełAES — blizu 5,36 młrd dalaraŭ ZŠA, u tym liku ŭ 2023 hodzie — blizu 100 młn dalaraŭ.
«Stanam na 15 sakavika 2023 hoda vykarystana srodkaŭ kredytu na sumu 5,28 młrd dalaraŭ ZŠA», — havorycca ŭ tłumačalnaj zapiscy.
U Minfinie RF adznačali, što biełaruski bok źviarnuŭsia z prośbaj ab pradaŭžeńni pieryjadu vykarystańnia kredytu da 31 śniežnia 2023 hoda i pieranosie terminu jaho pahašeńnia na adzin hod u vieraśni 2022 hoda.
Učora Alaksandr Łukašenka zajaviŭ, što Biełaruś zapatrabavała ad rasijskaha boku kampiensacyju za zrušeńnie terminaŭ uvodu BiełAES u ekspłuatacyju (terminy pieranosilisia niekalki razoŭ, druhi enierhabłok usio jašče nie ŭviedzieny ŭ ekspłuatacyju).
Rasiejski bok, sa słoŭ Łukašenki, prapanavaŭ košt na śviežaje jadziernaje paliva na ŭzroŭni rasijskich koštaŭ i harantyjny termin na asnoŭnyja vuzły na piać hadoŭ. Paźniej «Rasatam» patłumačyŭ zruch terminaŭ budaŭnictva BiełAES pandemijaj i zamiežnapalityčnym stanoviščam i zajaviŭ, što siońnia ź biełaruskim bokam niavyrašanych pytańniaŭ niama.
Čytajcie taksama: