Найлепшым кандытарам у свеце ўпершыню прызнаная жанчына
Імя францужанкі Ніны Мэтаер цяпер назаўсёды ўпісана ў гісторыю кулінарнага мастацтва: яна стала першай у гісторыі жанчынай, якую прызналі найлепшым кандытарам у свеце.
31.10.2023 / 21:10
Ніна Мэтаер. Фота: Euronews
Тытул «Найлепшы кандытар у свеце ў 2023 годзе» 35-гадовая францужанка Ніна Мэтаер атрымала на выставе Міжнароднага аб’яднання пекараў і кандытараў у Мюнхене. Пра гэта піша Euronews.
Ніна нарадзілася ў горадзе Ля-Рашэль на захадзе Францыі, вучылася ў прэстыжнай кулінарнай школе Ferrandi ў Парыжы, якая лічыцца адной з самых аўтарытэтных школ кулінарнага мастацтва ў свеце і пачынае сваю гісторыю ў 1920 годзе.
Пасля атрымання адукацыі Мэтаер працавала ў рэстаране Le Meurice, а ў 2015 годзе далучылася да каманды шэф-кухара Жана-Франсуа П’ежа, які хацеў атрымаць дзве зоркі Мішлен для свайго Grand Restaurant. Ніна Мэтаер працавала там на пасадзе шэф-кандытаркі, а праз год рэстаран атрымаў-такі запаветныя мішленаўскія зоркі.
Узнагарода «Найлепшы кандытар у свеце ў 2023 годзе» не першая ў скарбонцы кандытаркі. У 2016-м Ніна атрымала званне «Шэф-кандытар года» па версіі папулярнага кулінарнага часопіса Le Chef, а ў 2017-м такое ж званне прысвоіў ёй рэстаранны гід Gault et Millau, які спаборнічае па ўплывовасці з сусветна вядомым Мішлен.
У сваім інстаграме Ніна выказала падзякі сваім настаўнікам і калегам па працы.
«Гэта ўзнагарода важная для мяне таму, што мая кар’ера пачалася з выпечкі. Я радая прадстаўляць Францыю і ўносіць свой уклад у павышэнне якасці працы пекараў і кандытараў па ўсім свеце», — напісала жанчына.
Міжнароднае аб’яднанне пекараў і кандытараў, на выставе якога Мэтаер атрымала ўзнагароду, было створана ў 1931 годзе. З тых часоў арганізацыя падтрымлівае розныя асацыяцыі хлебабулачных і кандытарскіх вырабаў, а таксама прасоўвае працу кандытараў і пекараў у свеце.
Чытайце таксама:
Слойкі з сырам бры і журавінамі. Рэцэпт
Ірландзец тэсціруе беларускія сталоўкі. Вось якой з іх прапаноўвае даць мішленаўскую зорку