Žančyna čuła ŭ vuchu dziŭnyja huki: «bieśpierapynny šum, pstrykańnie i šorhat». Voś što heta było
Cikavaja miedyčnaja historyja zdaryłasia na Tajvani. Pavodle spravazdačy, apublikavanaj u The New England Journal of Medicine, 64-hadovaja pacyjentka naviedała kliniku otałarynhałohii paśla taho, jak ciaham čatyroch dzion zapar čuła dziŭnyja huki ŭ levym vuchu. Hetyja huki jana apisvała jak «bieśpierapynny šum, pstrykańnie i šorhat». Huki nie dazvalali žančynie dobra vyspacca.
30.10.2023 / 10:30
Fota: Liyin Weng and Tengchin Wang / The New England Journal of Medicine
Žančyna taksama ŭspomniła, jak pračnułasia ad «adčuvańnia, što niešta ruchajecca ŭ levym vuchu» ŭ pieršy dzień, kali źjavilisia simptomy.
I sapraŭdy, kali lekary ahledzieli pacyjentku, jany chutka zaŭvažyli maleńkaha pavuka, jaki prosta zajmaŭsia svaimi spravami ŭ vušnym kanale.
Na žal, nasiakomyja i pavukapadobnyja, jakija traplajuć u čałaviečyja vušy, — heta nie niešta nadzvyčajnaje. I choć, zdajecca, niama niejkich analityčnych danych pra toje, jak časta zapaŭzajuć žyvyja istoty ŭ vušy, heta davoli častaja situacyja, ź jakoj sutykajucca lekary. Naprykład, u 2018 hodzie łor-lekar z kliniki pry Ałabamskim univiersitecie ŭ Birminhiemie raspaviadaŭ, što ŭ jahonaj praktycy nazirajecca kala čatyroch-piaci takich vypadkaŭ za hod, zhadvaje Gizmodo.
Hety ž kankretny vypadak na Tajvani byŭ sapraŭdy cikavym jašče i tym, što pavuk pakinuŭ paśla siabie. Adzin z daktaroŭ pryznaŭsia, što da hetaha nie bačyŭ i pavuka, i jaho skinuty ekzaškilet u vuchu adnačasova.
Dumać pra takoje časam žachliva, ale kazurki ŭ vušach zvyčajna nie vyklikajuć surjoznych miedyčnych prablem (choć ich treba vydalać jak maha chutčej, kab paźbiehnuć ryzyki paškodžańnia vucha abo infiekcyi). U apošnim vypadku lekary vykarystali aśpiracyjnuju kaniulu (śpiecyjalnuju trubku, jakaja ŭsmoktvaje) praz ataskop, kab vysmaktać pavuka i jaho «skinutuju vopratku». U vyniku žančyna «ščaślivaja pajšła dadomu». Pra dalejšy los pavuka, na žal, ničoha nie viadoma.
Što rabić, kali takoje zdaryłasia
Kali vam kali-niebudź nie pašancavała mieć spravu z ułasnym vušnym paŭzunom, samaje važnaje, što treba mieć na ŭvazie, — heta nie panikavać.
Kateharyčna nie rekamiendujecca ŭtykać što-niebudź jašče ŭnutr, sprabujučy dastać žuka: naprykład, vatnaja pałačka moža tolki zašturchnuć istotu hłybiej, dzie jana moža prakałoć barabannuju pieraponku.
Časam u vušy zalivajuć alej ci hatavanuju vadu, tady žučok i muraška pačynajuć instynktyŭna vypłyvać. Ale tak nie rekamiendujecca rabić, kali jość padazreńnie na paškodžańnie barabannaj pieraponki.
Najlepš ža ŭ takim vypadku — jak maha chutčej źviarnucca da doktara, chacia b užo tolki dla taho, kab pierakanacca, što vaša vucha nie paškodžana i ŭ im nie zastajecca praduktaŭ žyćciadziejnaści čužoj istoty.
Čytajcie taksama:
Novy srodak ad prablem z erekcyjaj — jad pavuka