«Usio idzie zhodna z płanam Dalesa». Rasijskaja śpiavačka Vika Cyhanova z mužam pryjšli da Dudzia i vykłali svaje teoryi
Śpiavačka Vika Cyhanova dy jaje muž i pradziusar Vadzim Cyhanoŭ dali vialikaje intervju Juryju Dudziu. Heta byŭ čad. I, «chutčej za ŭsio, Uładzimira Uładzimiraviča padstavili».
27.10.2023 / 19:06
Cyhanovy padčas razmovy. Skrynšot videa vdud / YouTube
Vika Cyhanova i jaje muž Vadzim u 2014 hodzie padtrymali anieksiju Kryma Rasijaj, a ŭ 2022-m — uvarvańnie Rasii va Ukrainu. U sakaviku 2022 hoda Vadzim Cyhanoŭ zajaŭlaŭ, što hatovy pajechać dobraachvotnikam na front. Jon napisaŭ pieśniu, pryśviečanuju PVK «Vahnier», jakuju vykonvaje jaho žonka. Vadzim Cyhanoŭ viadomy svaim siabroŭstvam ź Iharam Hirkinym (Strałkovym).
Cyhanovy za apošnija hady nie raz vystupali na Danbasie.
Ci patrebna była «śpiecapieracyja»
Vajnu Cyhanovy nazyvajuć «śpiecapieracyjaj».
«Ci treba było pačynać hetuju śpiecapieracyju? Ja adkažu: chutčej za ŭsio, nie. U hetaj situacyi. Chutčej za ŭsio, pamyłka. Chutčej za ŭsio, Uładzimira Uładzimiraviča padstavili. Tamu što ja asabista razmaŭlaŭ z raźviedkaj. I jany havaryli, što, jak tolki ŭvojduć sa ščytami palicejskimi, usie piarojduć na bok Rasii. Usie vajskovyja čaści», — raskazvaje Vadzim Cyhanoŭ.
Čamu nie pierajšli? «Nie pierajšli, tamu što vielmi dobra papracavała kamanda Zialenskaha, «prakačała» mazhi. Mankurty, jakija «prakačvajuć». Za siem hadoŭ «prakačali» mazhi», — upeŭnieny jon.
Cyhanoŭ zhadvaje, jak jany byli ŭ Adesie i Krymie. «Mnie kažuć: «Adesa. Dyk heta ž całkam ruski horad. Zusim nie parciesia. Sto pracentaŭ. Voś zaraz pačniecca, i ŭsio tak budzie». I pačałosia. Ale prosta pačali zabivać usich ruskich. I heta realna», — kaža jon (nasamreč, heta chłuślivaje śćviardžeńnie, u Adesie nichto nie zabivaŭ ruskich, tam dahetul bolšaść ludziej razmaŭlajuć pa-rusku i da 2014-ha, i pierad 2022-m hodam nie było nijakich mižnacyjanalnych kanfliktaŭ. — NN).
Cyhanoŭ miarkuje: «Usio treba było pačynać u 2014 hodzie. I zakančvać. Kali spalvali ludziej u Adesie (majecca na ŭvazie pažar u adeskim Domie prafsajuzaŭ, zachoplenym rasijskimi bajevikami 2 maja 2014 hoda. — NN), kali rasstrelvali ŭ Charkavie (majucca na ŭvazie padziei sakavika 2014 hoda, kali śpiecpadraździaleńni Ukrainy sarvali sprobu stvareńnia tak zvanaj «Charkaŭskaj narodnaj respubliki». — NN). Voś tady. A kali ŭžo pramyli mazhi, to tut my ŭžo trapili ŭ pastku».
Chto adkazny za vajnu
Vadzim Cyhanoŭ kaža, što byŭ u Maryupali jak vałancior. «Ja pryjechaŭ razabracca ŭ situacyi. Tabie, Jura, havorać niapraŭdu. Vajna — heta, zrazumieła, brudnaja sprava. Ale tam usio pa-inšamu. Pavier mnie», — śćviardžaje jon.
Cyhanoŭ padkreślivaje, što Pucin ničoha ciapier nie vyrašaje:
«Na siońnia ŭžo rola asoby ŭ suśvietnym pracesie nie maje ničoha. Jana nie vyrašalnaja. Užo pracuje Hospad i Satana. My ŭžo ŭstupili ŭ hetuju fazu. Tamu paćviardžeńnie — Izrail. I ŭsio. Heta pastka. Užo niama dakładnaha rašeńnia.
Ja naziraju, jak usie nazirajuć, čym usio heta moža skončycca. I Zialenski naziraje, i tam. Tam, zrazumieła, z taho boku idzie padlik vielmi surjozny. My bačym: idzie miasarubka. Što adbyvałasia ŭ Bachmucie i tut. Ruskija vajujuć z ruskimi. I z hetaha boku trochi padbaŭlajuć. I z hetaha. Zaŭsiody parytet, kab heta prakačać.
Začystka terytoryi. Zaraz, jak tolki ŭ Izraili adbudziecca jaki pierałomny momant, tudy buduć nakiravanyja ludzi žyć. Taki novy Ijerusalim budujecca», — śćviardžaje Cyhanoŭ i ŭdakładniaje, što ŭ Bachmut pajeduć ludzi ź Izraila
(heta kanśpirałahičnaja teoryja tranślavałasia i niekatorymi biełaruskimi prapahandystami. — NN).
«Kab budavać, treba źnieści. Samy tanny sposab — heta vajna. Da taho ž, kab vyzvalić terytoryi, pavinna być miasarubka. Jak maha bolš ludziej pieramałoć. I ŭsio, što adbyvałasia va Ukrainie… Samaje bolšaje hora dla jaŭrejaŭ prynieśli zapadlanskija ŭkraincy. Heta była strašnaja raźnia. Siońnia idzie śpiecyjalnaja vajennaja apieracyja…
My robim bufiernuju zonu, kab da nas rakiety nie prylatali. Nam treba rasčyścić terytoryju. Novy Ijerusalim, dzie samaja vialikaja staić sinahoha ŭ Dnieprapiatroŭsku. Ad mora da mora. Heta ŭsiudy ŭžo zajaŭlena. Heta idzie «dahavarniak». Ale ŭmiašajecca Boh — i ŭsio budzie inakš», — miarkuje jon.
Začyścić terytoryju, na pohlad Cyhanova, vyrašyŭ «suśvietny ŭrad», tamu što «Izrail ciapier nie źmiaščajecca ŭ tych miežach, i jość prablema».
«Kab było jaŭrejam dzie žyć? Takim čynam, Pucin — heta pieška suśvietnaha ŭrada?» — udakładniaje Dudź.
«Usie my pieški. I ŭsim nam treba pakajańnie», — adkazvaje Vadzim Cyhanoŭ.
Što takoje, na ich dumku, «suśvietny ŭrad», Cyhanovy nie zmahli patłumačyć.
Chto vinavaty ŭ prablemach Rasii i što rabić
Pa mierkavańni surazmoŭcaŭ, Rasija ruchajecca ŭ niapravilnym kirunku. Ale ŭ krainy jość šanc źmianić situacyju, kali ŭsie pakajucca i stanuć «na šlach z Boham».
Cyhanoŭ śćviardžaje: «My, uvieś narod. My pavialisia spačatku. Za tuju revalucyju, za zabojstva cara my ŭsie vinavatyja, što puścili siudy satanistaŭ ź siarpom i mołatam». Ciapier ža ŭsim «nieabchodna malicca i kajacca».
A prablemy Rasii buduć da čaćviortaha pakaleńnia, kali ličyć ad zabojstva cara.
«Čakać nie treba, treba malicca. Bolš u nas niama varyjantaŭ. Biez malitvy ničoha nie vyrašyć. I dzie b ty ni vykazvaŭ fakty, Jura, heta ni na što nie paŭpłyvaje. Užo nie paŭpłyvaje. Chaciełasia b, ale nie budzie», — ličyć Vika Cyhanova.
«Ja kažu: vyratujemsia dobrymi spravami. Treba rabić dobryja spravy. Usio. Sam nie vyratuješsia, to pobač šmat chto vyratujecca. Što treba nam usim pakajacca. Ad hrachoŭ ačyścicca, kali my chočam być z Boham. I Pucinu treba, i ŭradu ŭsiamu. I tady ŭ nas budzie novaja ideałohija. I tady zjavicca novaja kraina. Prybiarom usio niepatrebnaje. Zastaniecca ŭsio tolki dobraje….
Ciapier hety hłabalny miechanizm pačynaje pavolna pierabudoŭvacca. Zabaraniajuć niejkija rečy niapravilnyja. Armija lepšaj stanovicca», — raspaviadaje Cyhanoŭ i dadaje, što
kožny dzień molicca, kab Boh davaŭ «cialesnaha zdaroŭja i mudraści Uładzimiru Uładzimiraviču, kab jon paviarnuŭsia da Boha i kab jamu anioły dapamahali, kab lubiŭ bolš prosty narod».
Cyhanoŭ dadaŭ, što vieryć u toje, što «Uładzimir Uładzimiravič źmienicca (kali nie, to heta budzie zdrada)». I što źmienicca Rasija.
Što Cyhanovy rajać pačytać
Vadzim Cyhanoŭ raić usim čytać płan Dalesa i tvory fiłosafa Ivana Iljina.
Dudź zaŭvažaje, što płan Dalesa — fejk.
«Možna havaryć — isnavaŭ, nie isnavaŭ. Ale ŭsio idzie zhodna z płanam Dalesa», — piarečyć Cyhanoŭ.
«Płan nikoli nie byŭ apublikavany. Nijakich krynic, akramia ruskamoŭnych, pra jaho niama», — zaŭvažaje Dudź.
«Ty mianie nie pačuŭ. Usio idzie zhodna z hetym płanam. Možna kazać, što niama. Ale ja kažu: čytajcie ŭ internecie. Usio idzie zhodna z hetym płanam. Vy pračytali «fejk», ale ad hetaha ničoha nie pamianiałasia», — staić na svaim Vadzim Cyhanoŭ.
«Ja čytała, što heta fejk. Ale ž płan jość. Nu nie Dales [jaho napisaŭ]. Jaho ž niechta napisaŭ», — zaŭvažaje Vika Cyhanova.
Pieravioŭšy razmovu na tvory ruskaha fiłosafa i publicysta Ivana Iljina, Juryj Dudź pracytavaŭ uryvak z artykułaŭ vučonaha «Ab fašyźmie» (1948 hod) i «Nacyjanał-sacyjalizm. Novy duch» (1933 hod), u jakich Iljin uschvalaje Hitlera («Što zrabiŭ Hitler? Jon spyniŭ praces balšavizacyi Hiermanii i akazaŭ hetym samuju vialikuju pasłuhu Jeŭropie»), Musalini i fašyzm («Fašyzm mieŭ racyju, bo zychodziŭ sa zdarovaha nacyjanalna-patryjatyčnaha pačućcia, bieź jakoha ni adzin narod nie moža zaćvierdzić svajho isnavańnia, stvaryć svaju kulturu»).
«Jakaja z hetych cytat prymusiła vas, Vadzim, parekamiendavać mnie pačytać Iljina?» — spytaŭ Dudź.
«Hetyja cytaty nie. Jany mianie nie kranajuć, ale ja tym nie mienš adkažu. U «Mein kampf» jość cikavyja štuki, jakija vyrazali. Tam Hitler kaža:
«My budziem źniščać jaŭrejaŭ, tamu što jany kamunisty. Takim čynam jon stavić znak roŭna. Chiba što Iljin pra heta kazaŭ. Znak roŭna pamiž jaŭrejami i kamunistami. Tamu što ŭsiu intelihiencyju ŭ Rasii vyrazali kamunisty. Heta kaža Hitler. My nie chočam, kab heta zaraza pryjšła da nas. I my heta zrobim», — tłumačyć Vadzim Cyhanoŭ i dadaje, što jon absalutna nie fašyst i nikoli nie padtrymlivaŭ takich idej.
«Ja kankretna da hetaj frazy (Iljina, jakuju cytavaŭ Dudź. — NN) nie adsyłaŭ. Jość rečy, jakija cikavyja… Heta chutčej na jaho sumleńni, i heta dakładna pamyłka ŭ Iljina. Mnie heta častka jaho nie padabajecca», — apraŭdvajecca Cyhanoŭ.
«Kožny šukaje toje, što jamu treba. Jon piša pra mientalnaść ruskaha naroda. Pra toje, jak na nas dziejničaje pryroda, jaje maštaby, jaki ŭ nas charaktar», — dadaje Vika Cyhanova.
U kancy pieradačy Vika Cyhanova zaŭvažyła, źviartajučysia da Juryja Dudzia:
«Ja dumała, što siońniašniaja razmova budzie cikaviejšaj. Ale ty stajaŭ tolki na hetaj pazicyi. I ŭ mianie naradziłasia mierkavańnie, što za taboju vidavočna niechta staić. Toj, chto taboju manipuluje i kiruje».
«A vy nie dapuskajecie, što heta toje, što ja nasamreč adčuvaju? Što ja ščyra nie razumieju ludziej, jakija padtrymlivajuć tych, chto adpraŭlaje hramadzian majoj krainy zabivać hramadzian susiedniaj krainy? Što ŭ mianie ščyraje nierazumieńnie ahresii», — spytaŭ Juryj Dudź.
Čytajcie jašče:
«Niepobiedima, duchom silna»: u Maskvie pradstavili himn Navarosii VIDEA, AŬDYJO
«Ty realna ličyš, što Pucin zvarjacieŭ?» Intervju Dudzia z Kučeram parvała internet
Dudź: Rasijskaja ŭłada ŭsie apošnija hady staranna razmyvała hodnaść