Były pamočnik Łukašenki pradaje dom u Drazdach. Suma ŭražvaje, interjery nie asabliva

Ścipłaja zahadčyca kafiedry Biełaruskaha dziaržaŭnaha ŭniviersiteta Łarysa Korbut pradaje dom na vulicy Račnoj u Minsku za try miljony dalaraŭ. Ništo sabie zarablajuć dacenty? Nie, jaje muž — Mikałaj Korbut, były načalnik Kiraŭnictva spraŭ Alaksandra Łukašenki.

31.10.2023 / 20:12

Mikałaj Korbut uźbiŭsia na dom u Drazdach padčas pracy ŭ blizkim kole Alaksandra Łukašenki

U pačatku epochi Łukašenki Mikałaj Korbut uznačalvaŭ «Dypservis» — słužbu absłuhoŭvańnia dypłamatyčnych pradstaŭnictvaŭ, potym atrymaŭ pavyšeńnie ŭ namieśniki kiraŭnika spravami Łukašenki, paźniej staŭ tam kiraŭnikom.

Ale paśla byŭ panižany ŭ hałoŭnyja inśpiektary pa Minskaj vobłaści — pamočniki kiraŭnika dziaržavy. Pasada pamočnika Łukašenki — heta najpierš kadravaja praca, jakaja nie maje dačynieńnia da finansaŭ.

Viarnucca va ŭładu Korbutu nie ŭdałosia. U 2018-m jaho adpravili na pasadu člena Pastajannaha kamiteta Sajuznaj dziaržavy. Heta siniekura: pracy nijakaj, zarobki rasijskaha pamieru — stvoranaja dla pryviazki biełaruskaha čynavienstva da rasijskaha. Ale i tam Korbut nadoŭha nie zatrymaŭsia, apošniaja zhadka pra jaho na sajcie hetaj arhanizacyi datujecca tym ža 2018 hodam.

Mikałaj Korbut (źleva) padčas pracy ŭ Pastajannym kamitecie Sajuznaj dziaržavy. Fota: postkomsg.com

Krynicy raskazali «Našaj Nivie», što Korbut pierabraŭsia žyć u Rasiju i ŭžo nie maje patreby ŭ katedžy ŭ Drazdach.

«Kab dom u Drazdach mieŭ sens, treba žyć i pracavać u Minsku, krucicca ŭ Minsku. Kali tut u ciabie asablivych pierśpiektyŭ niama, ty ŭžo hladziš u bok Rasii, to što tabie tyja Drazdy», — skazaŭ naš surazmoŭca z aparatu Saŭmina.

Fota: realt.by

Pavodle źviestak z baz «Biełpoła», dom Korbuta, zapisany na žonku Łarysu, zahadčycu kafiedry ekanomiki i kiravańnia pradpryjemstvami APK fakulteta ekanomiki i mieniedžmientu BDEU, znachodzicca pa vulicy Račnoj, i supadaje z łakacyjaj i vyhladam doma ŭ abviestcy.

Dvuchpaviarchovy katedž biez architekturnych vymudraŭ maje płošču 437 kvadratnych mietraŭ, ź ich žyłych — 130.

Tamu, chto zachoča addać za jaho 9,5 miljona biełaruskich rubloŭ, mahčyma, pryjdziecca ŭkłaścisia i ŭ interjer, jaki nie kožnamu budzie daspadoby.

Fota: realt.by

Sam dom pabudavany ŭ 2005 hodzie z hazasilikatnych błokaŭ.

U domie jość łaźnia, saŭna, nievialiki basiejn, biljardny pakoj. Stoli vyšejšyja za try mietry.

Fota: realt.by

U abviestcy asabliva padkreślivajecca najaŭnaść «reśpiektabielnych susiedziaŭ».

Fota: realt.by

Dom Korbuta ahienctva nazyvaje «domam mary».

Fota: realt.by

Čytajcie taksama:

U Minsku pradajuć kolišniuju prybiralniu, pra jakuju ŭžo i zabylisia

Nazvanyja najlepšyja architekturnyja pracy Biełarusi apošnich hadoŭ ŠMAT FOTA

U samym starym draŭlanym budynku Biełarusi źjavicca muziej

U centry Minska pradajecca zakinuty budynak. Kaštuje jak trochpakajovaja kvatera

Nashaniva.com