Jaŭhien Rojzman taksama admoviŭsia vyłučacca na prezidenckija vybary ŭ Rasii jak adziny kandydat apazicyi
Raniej ad udziełu ŭ vybarach admoviŭsia były hałoŭny redaktar «Novaj haziety», nobieleŭski łaŭreat Dźmitryj Murataŭ.
26.10.2023 / 13:27
Jaŭhien Rojzman, były mer čaćviortaha pa vieličyni horada Rasii — Jekaciarynburha, adzin z samych prykmietnych i charyzmatyčnych apazicyjnych dziejačaŭ Rasii. U mai 2023 hoda jaho sudzili za «dyskredytacyju vajskoŭcaŭ». Sankcyja artykuła praduhledžvała da piaci hadoŭ turmy, ale ŭ vyniku jaho aštrafavali na 260 000 rubloŭ (3250 dalaraŭ). Fota: Vladimir Podoksyonov / AP
Były mer Jekaciarynburha Jaŭhien Rojzman admoviŭsia ŭdzielničać u prezidenckich vybarach 2024 hoda ŭ jakaści adzinaha kandydata ad apazicyi, piša The Moscow Times.
«Mianie pytajucca, ci źbirajusia ja iści na prezidenckija vybary ŭ 2024 hodzie. Adkazvaju: ja chaču być pryvatnaj asobaj, rabić toje, što ja ŭmieju, i toje, što ja lublu, žyć u svajoj krainie i nie mieć ničoha ahulnaha z hetaj uładaj», — pieradaŭ słovy Rojzmana eks-hałoŭred «Echo Moskvy» Alaksiej Vieniadziktaŭ.
Raniej ad udziełu ŭ vybarach admoviŭsia łaŭreat Nobieleŭskaj premii miru i eks-hałoŭny redaktar «Novaj haziety» Dźmitryj Murataŭ. «Heta dziŭnyja idei, jakija nie majuć pad saboj ni najmienšaj asnovy. Nie zacikaŭleny», — skazaŭ Murataŭ The Moscow Times.
Raniej palityk Alaksiej Navalny ŭklučyŭ Rojzmana i Muratava ŭ śpis mahčymych adzinych kandydataŭ ad apazicyi. Pry hetym Navalny adznačyŭ, što asabista padtrymaŭ by ŭ takoj jakaści abodvuch, i prapanavaŭ usim, chto znachodzicca ŭ apazicyi da dziejnaj rasijskaj ułady, prajści składzienaje im apytańnie.
Taksama ŭ śpisie mahčymych kandydataŭ na pasadu prezidenta ad apazicyi admoviŭsia Vieniadziktaŭ, Ksienija Sabčak, zasnavalnik partyi «Jabłoko» Ryhor Jaŭlinski i lidary parłamienckich partyj, jakija nie zajaŭlali ab admovie ad udziełu ŭ vybarach — Hienadź Ziuhanaŭ (KPRF), Leanid Słucki (ŁDPR) i Alaksiej Niačajeŭ («Novyja ludzi»).
Zasnavalnik «Jabłoka» Ryhor Jaŭlinski zajaviŭ, što razhledzić mahčymaść vyłučeńnia kandydatam u vypadku, kali za jaho vyłučeńnie budzie sabrana nie mienš za 10 młn podpisaŭ. Paźniej jon naviedaŭ Kreml adrazu paśla sustrečy prezidenta RF Uładzimira Pucina z pradstaŭnikami relihijnych abjadnańniaŭ, paviedamiŭ žurnalist kramloŭskaha puła ad «Kommiersanta» Andrej Kaleśnikaŭ.
U Kramli dapuskajuć udzieł kandydata ad libieralnych sił u budučych prezidenckich vybarach, skazali «Viedomostiam» čatyry krynicy, blizkija da Administracyi prezidenta.
Prezidenckija vybary ŭ Rasii projduć u sakaviku 2024 hoda. Pucin, jaki kiruje Rasijaj faktyčna 23 hady, aficyjna nie zajaŭlaŭ pra ŭdzieł u vybarach, ale jahony ŭdzieł vidavočny.
***
Jaŭhien Rojzman byŭ meram Jekaciarynburha z 2013 pa 2018 hod. Paśla ŭvarvańnia Rasii va Ukrainu jon nie staŭ pakidać krainu, pry hetym vystupaŭ suprać bajavych dziejańniaŭ i rezka krytykavaŭ rasijskija ŭłady.
U žniŭni 2022 hoda suprać jaho była zaviedziena kryminalnaja sprava. Nahodaj staŭ vystup u YouTube ŭ lipieni, u jakim Rojzman vykazvaŭsia pra vajnu va Ukrainie. Zhodna z abvinavaŭčym zaklučeńniem, Rojzman «dyskredytavaŭ» rasijskuju armiju siarod inšaha tym, što nazvaŭ «śpiecapieracyju» va Ukrainie vajnoj, a simvał Z — «zihaj».
Abirajučy mieru strymańnia, sud nie staŭ adpraŭlać jaho ŭ SIZA, a zabaraniŭ tolki peŭnyja dziejańni: naviedvać publičnyja mierapryjemstvy i karystacca internetam.
Sankcyja artykuła praduhledžvała da piaci hadoŭ kałonii, ale ŭ vyniku Rojzmana aštrafavali na 260 tysiač rasijskich rubloŭ (3250 dalaraŭ).
Čytajcie taksama:
«Heta dziŭnyja idei». Nobieleŭski łaŭreat Murataŭ admoviŭsia iści na prezidenckija vybary ŭ Rasii