У «Востраве чысціні» перастала працаваць дастаўка. Што там адбываецца
Таксама прыпынілі працу некаторыя крамы сеткі.
25.10.2023 / 14:32
«Востраў чысціні» прадае не толькі бытавую хімію, але і прадукты, і алкаголь. Фота: «Наша Ніва»
Сетка крам «Востраў чысціні і смаку» спыніла прымаць заяўкі на дастаўку тавараў. Office Life патэлефанаваў у кампанію, каб зразумець, што адбываецца.
У кантакт-цэнтры кампаніі пацвердзілі, што дастаўка прадуктаў сапраўды прыпыненая, бо ідзе «тэхнічнае абнаўленне, працуем над сайтам».
Чытачы паведамілі пра непрацуючыя крамы сеткі, адна з такіх размешчана на вуліцы Сурганава ў Мінску. Як удакладнілі ў кампаніі, гэты аб'ект зачынены «па рашэнні кіраўніцтва, часова».
У пачатку ліпеня ў інтэрнэт патрапілі звесткі 730 тысяч пакупнікоў рознічнай сеткі. Па гэтым факце кампанію правяраў Нацыянальны цэнтр абароны персанальных звестак.
А ў канцы верасня стала вядома, кампанія «Ромакс», якая кіруе «Востравам чысціні і смаку» ды «Востравам здароўя», сутыкаецца з фінансавымі цяжкасцямі.
Кіруе крамамі і брэндамі група кампаній «Ромакс». Яе асноўныя бенефіцыяры — сям'я Віктара Рамука. На Рамукоў працуюць больш за 7000 чалавек.
Як раней паведамляла «Наша Ніва», Рамука арыштоўвалі ў 2022-м. За выхад тады давялося заплаціць вялікую суму ў некалькі мільёнаў даляраў. Фінансавыя праблемы ў сеткі ўзніклі таксама праз хібы ў бізнэс-мадэль і эканамічныя шокі на рынку: скарачэнне купчай здольнасці, рост цаны імпарту праз падзенне рубля, абмежаванне максімальнай нацэнкі па 713-м указе, падаражэнне крэдытаў.
Чытайце таксама:
«Знялі з яго няслаба». Банкруцтва пагражае «Востраву чысціні»
Хакеры зноў узламалі буйную краму — звесткі трапілі ў сеціва