Jak deananimizujuć uładalnikaŭ kryptakašalkoŭ i što zrabić, kab zaścierahčysia?
Viadoma pra niekalkich biełarusaŭ, jakija achviaravali hrošy biełaruskim inicyjatyvam praz kryptavaluty i byli za heta zatrymanyja. Raspaviadajem, jak ich mahli vyličyć i što rabić, kab zaścierahčysia.
29.10.2023 / 16:45
Kałaž «Našaj Nivy»
Jak pracujuć kryptavalutnyja pieravody?
Bolšaść kryptavalutaŭ pracujuć tak — vy abirajecie sumu, jakuju źbirajeciesia pieravieści inšamu čałavieku, a taksama ŭznaharodžańnie za pieravod płaciažu, jakoje atrymaje majninhavaja sietka. Hetaj apieracyi, kali vy jaje zajavili, prysvojvajecca, hruba kažučy, numar, pa jakim vy možacie adsočvać toje, na jakim etapie jana znachodzicca — prajšła jana ci nie, i kali nie, to kali prykładna jana moža prajści.
Luby čałaviek moža stvaryć sabie kašalok u luboj z kryptavalutaŭ. Pryčym dla bolšaści kryptavalutaŭ zrabić heta možna ananimna.
Prablemy pačynajucca na etapie apłaty. Kali vy robicie apieracyju ŭ sietcy bitkojn, to pakidajecie davoli šmat śladoŭ. U bolšaści kryptavalutaŭ pryncyp toj ža.
Usie apieracyi ŭ sietcy bitkojn padzielenyja na błoki, i kožny błok prachodzić prykładna za 10 chvilin. Toje, ci prajšła kankretnaja tranzakcyja, a taksama toje, jaki abjom srodkaŭ byŭ pieraviedzieny, kudy i adkul, vidać usim achvotnym. Taksama možna pahladzieć, jakaja kolkaść srodkaŭ na lubym z kašalkoŭ u sietcy bitkojn, adkul jany pryjšli i kudy vychodzili.
Jość kryptavaluta Monero, jakaja vykarystoŭvaje ałharytmy, što mocna ŭskładniajuć daśledavańnie tranzakcyjaŭ. Faktyčna, u jaje ŭbudavany «miksier», jaki pieramiešvaje tranzakcyi padčas pieravodaŭ. Ałharytmy Monero pastajanna ŭdaskanalvajucca, i deananimizacyja ŭładalnikaŭ kašalkoŭ u Monero — heta nietryvijalnaja zadača.
Jak na praktycy šukajuć uładalnikaŭ kryptavalutnych kašalkoŭ?
Pieršy i samy vidavočny sposab — pošuk pa adkrytych danych. Naprykład, śpiecsłužbisty mohuć uziać luby z kašalkoŭ, na jakija prymaje hrošy Połk Kalinoŭskaha abo «Bajpoł», i atrymać usie kašalki, ź jakich tudy pryjšli hrošy.
Paśla hetaha možna prosta prajścisia roznymi pošukavymi sistemami pa kožnym z kašalkoŭ roznymi šlachami. I kali jon zhadvaŭsia ŭ telehram-čacie, na asabistym sajcie, u sacsietcy abo błohu niejkaha čałavieka, to vidavočna, što heta jahony kašalok.
Druhi sposab — heta vypadki, kali klučy ad kašalkoŭ abo akaŭnty na biržach znachodziać užo paśla zatrymańnia čałavieka. Tady ŭsia historyja tranzakcyjaŭ budzie bačnaja siłavikam. Taksama jany mohuć «uspłyć» u supolnych razmovach u miesiendžarach, kali zatrymlivajuć inšaha čałavieka, hetak ža, jak i fakty achviaravańniaŭ.
Treci sposab — atrymańnie źviestak pra čałavieka ŭ samim abmieńniku. Heta mahčyma, kali abmieńnik rasijski abo biełaruski. U takim vypadku lohka stvaryć łancužok abmieńnik-kašalok-achviaravańnie i zapytać hetyja źviestki tam.
Tamu važna pryniać miery abarony. My raili karystacca kryptavalutami dla kupli virtualnych numaroŭ, ale vielmi važna zarehistravać akaŭnt na časovy mejł, a paśla vydalić akaŭnt ź virtualnym numaram abo vydalić ad jaho parol, kab i vy sami nie mahli atrymać da jaho dostup. Navat kali vas zatrymajuć, to nie budzie zrazumieła, jakija mienavita numary vy kuplali i dla kaho.
Čaćviorty sposab — heta atrymańnie infarmacyi praz analiz błakčejnu. Ahułam, błakčejn bitkojn užo davoli dobra praanalizavany. Naprykład, ustanoŭlenaja bolšaść kašalkoŭ, jakimi karystajucca bujnyja kryptaabmieńniki i biržy, jość puł «čornych» kašalkoŭ, jakimi karystajucca narkahandlary, jość puł adrasoŭ, jakija naležać kankretnym hrupam asobaŭ ci hrupoŭkam.
Heta davoli składany šlach, jaki patrabuje šmat času. Śpiecsłužbisty stanuć takim zajmacca tolki kali treba budzie adšukać uładalnika niejkaha kankretnaha kašalka.
My nie budziem padrabiazna raśpisvać ałharytmy, pa jakich heta robicca, ale, da prykładu, jany davoli dastupna i karotka apisanyja ŭ hetym artykule.
Kaho ŭžo zatrymali za achviaravańni kryptavalutaj?
Heta Dźmitryj Słuk, jakomu prysudzili vosiem z pałovaj hadoŭ turmy za achviaravańni ŭ arhanizacyju, pryznanuju «terarystyčnaj», u pamiery kala dźviuch tysiač dalaraŭ.
Alaksandr Zijazetdzinaŭ, jakomu prysudzili try hady kałonii za achviaravańni ŭ roznyja arhanizacyi. Jon pieraličyŭ užo bolš za 750 tysiačaŭ dalaraŭ «źvierchu» na patreby biełaruskich RNPC i napisaŭ zajavu ab pamiłavańni ŭ spadzievie, što jaho vypuściać.
Alaksandr Fikaŭ, jaki ciapier znachodzicca za kratami. Nieviadomyja abstaviny, pry jakich jon achviaravaŭ, ale viadoma, što jon byŭ prarektaram minskaha «HAZ-Instytuta».
Jak paźbiahać deananimizacyi?
- Kali vy chočacie achviaravać, to najlepšy sposab — paprasić heta zrabić čałavieka, jaki žyvie za miažoj, a paśla pieradać jamu hrošy najaŭnymi. Vydalajcie pierapiski, jakija datyčać achviaravańniaŭ.
- Nie karystajciesia kryptavalutnymi biržami, źviazanymi ź Biełaruśsiu abo Rasijaj, dla pieravodu hrošaŭ abo kupli kryptavalutaŭ na niešta adčuvalnaje — naprykład, dla achviaravańniaŭ abo kupli virtualnych numaroŭ. Taksama pry rehistracyi lepš nie paznačać vaš asnoŭny e-mail.
- Pry pieravodzie hrošaj karystajciesia «miksierami» — servisami, jakija ŭskładniajuć identyfikacyju nakiravańnia płaciažu. To-bok pieravodźcie hrošy ź biržaŭ na svoj kašalok, a paśla praz kryptamiksier (naprykład, hety, jaki maje jašče i ONION-viersiju) adrasata. U Kibierpartyzanaŭ jość nakont hetaha davoli padrabiaznaja instrukcyja.
- Znajdzicie biržu abo abmieńnik, jakija nie patrabujuć vašych źviestak pry rehistracyi. Śpis takich jość u siervisie KYCNot.
- Kali vy chočacie dla niejkich patrebaŭ nabyć kryptavalutu ź biełaruskaj padsankcyjnaj kartki, to abirajcie na Bestchange servisy, jakija nie patrabujuć identyfikacyi asoby — tak budzie vidać, što vy kuplali kryptavalutu, ale nie budzie bačna, kudy vy jaje adasłali.
- Nie karystajciesia adnym i tym ža kašalkom dla zachoŭvańnia hrošaj i dla achviaravańniaŭ, navat kali vy za miažoj. Pažadana stvarać novy kašalok dla kožnaha achviaravańnia, a taksama rehularna vydalać ich, lepš — adrazu paśla achviaravańnia.
- Nie publikujcie nidzie toj adras, ź jakoha vy budziecie ździajśniać achviaravańni, navat kali vy za miažoj. Kali vy majecie publičny kryptavalutny kašalok, to nie pieravodźcie ź jaho hrošy na kašalok dla achviaravańniaŭ.
- Pry mahčymaści pry apłatach zamiest bitkojna abirajcie kryptavalutu Monero, jakaja ŭskładniaje identyfikacyju karystalnika kašalka.
- Kali vy zachoŭvajecie hrošy ŭ kašalku i žyviacie ŭ Biełarusi, to nie zachoŭvajcie ŭ siabie klučy ad jaho i seed-frazu. Pieradajcie ich nadziejnym siabram nie ŭ Biełarusi i prasicie ich samastojna rabić pieravody.
- Kali vy achviarujecie praź biržy, spačatku pieravodziačy na ŭłasny kašalok, to stvarajcie novy kašalok dla kožnaha asobnaha pieravodu, što dazvalaje rabić bolšaść papularnych servisaŭ-kašalkoŭ. Heta ŭskładnić pracu śpiecsłužbistaŭ.
- Nie achviarujcie adnu i tuju ž sumu štoraz — heta ŭskładnić analiz dla śpiecsłužbaŭ.
- Kali vy zachoŭvajecie hrošy na kryptabiržy, to pieradajcie klučy ad jaje niekamu za miažoj, a na samu biržu zachodźcie ź inkohnita-režymu braŭziera i, kali birža dazvalaje, to i praz VPN.
Čytajcie taksama:
Jak nabyvać kryptavaluty — padrabiazny hajd
Jak ułasnymi rukami stvaryć VPN-siervier, jaki ciažka budzie zabłakavać — padrabiazny hajd
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć