Vosiem filmaŭ, jakija dapamohuć lepš zrazumieć araba-izrailski kanflikt
Hetyja stužki dapamohuć vam nablizicca da sutnaści araba-izrailskaha kanfliktu, a taksama lepš zrazumieć ludziej, jakim vypała žyć u epicentry składanych padziej.
21.10.2023 / 19:46
Kadr ź filma Zijada Duejry «Ataka» (2012). Fota: en.unifrance.org
«Miunchien», 2005
Siužet filma Styviena Śpiłbierha pačynaje razhortvacca ŭ 1972 hodzie, kali ŭ Miunchienskim aeraporcie paleścinskija terarysty zachapili ŭ zakładniki i zabili delehacyju izrailskich spartsmienaŭ-alimpijcaŭ. Śviet zdryhanuŭsia ad žorstkaści i cynizmu. Zło pavinna być pakarana. Na rasparadžeńnie premjer-ministra Izraila hrupa ahientaŭ «Masada» pačynaje apieracyju adpłaty. Ale hvałt sparadžaje jašče bolšy hvałt: hinuć ludzi, ljucca reki kryvi, i ŭ hetaj kryvi — ruki abodvuch bakoŭ, jakija varahujuć…
«Raj — ciapier», 2005
Psichałahičnaja drama paleścinskaha režysiora Chani Abu-Asada pieranosić hledačoŭ u śviadomaść radykalnych ekstremistaŭ. Stužka, naminavanaja na premiju «Oskar», raskazvaje historyju dvuch paleścinskich terarystaŭ-śmiarotnikaŭ, jakija praviali razam apošnija dni pierad tym, jak ździejśnić zapłanavany terakt u Tel-Avivie.
«Hety film ujaŭlaje saboj mastacki punkt hledžańnia na hetuju palityčnuju prablemu. Palityki chočuć bačyć u joj čorna-biełaje, dobraje i złoje, a mastactva choča bačyć u joj čałaviečuju istotu», — skazaŭ režysior haziecie The Guardian padčas uručeńnia ŭznaharod za film u Amierycy.
«Vals z Bašyram», 2008
Animacyjnaja dakumientalnaja drama režysiora Ary Folmana pryśviečana posttraŭmatyčnamu stresavamu razładu, ad jakoha pakutujuć tyja, chto pieražyŭ vajenny kanflikt. Film razhladaje Livanskuju vajnu 1982 hoda i sumnaviadomuju raźniu ŭ Sabry i Šacile — łahierach paleścinskich biežancaŭ. Padziei pakazanyja vačyma izrailskich sałdat, jakim było daručana ździajśniać hetyja złačynstvy.
«Limonnaje dreva», 2008
U filmie apisvajucca jurydyčnyja sproby paleścinskaj udavy pieraškodzić ministru abarony Izraila, jaje susiedu, źniščyć limonnyja drevy na jaje siamiejnaj fiermie. Paralelna z hetym u žančyny naładžvajucca čałaviečnyja stasunki z žonkaj ministra. Film zasnavany na realnaj historyi, kali limonnyja drevy byli vyrvanyja z koraniem u intaresach Šaula Mofaza — ministra abarony Izraila ŭ 2002-2006 hadach.
«Nie žartuj z Zochana», 2008
Badaj, adziny kamiedyjny film z usiaje padborki. Jon raspaviadaje pra toje, jak były izrailski śpiecnazaviec (Adam Sendler) insceniruje śmierć, kab realizavać svaju maru — źjechać u ZŠA i stać cyrulnikam.
«Adžami», 2009
Film byŭ napisany i źniaty Skandaram Kopci (paleścincam) i Jaranam Šani (izrailskim habrejem).
«Adžami» raskazvaje piać roznych historyj, dziejańnie jakich adbyvajecca ŭ biednym chryścijanska-musulmanskim arabskim rajonie Tel-Aviva, jaki nazyvajecca Adžami.
Šmatlikija piersanažy, syhranyja nieprafiesijnymi akciorami, nadajuć historyi adčuvańnie dakumientalnaha filma. Arabskija piersanažy havorać pamiž saboj pa-arabsku, habrejskija — na iŭrycie, kali ž araby i jaŭrei razmaŭlajuć miž saboj — jany vykarystoŭvajuć abiedźvie movy, tak, jak heta dziejecca ŭ realnym žyćci.
Krytyčny kansensus kinaznaŭčaha sajta Rotten Tomatoes abviaščaje: «Hetaja šmatmiernaja drama spałučaje pakaz intymnych vobrazaŭ i šyrokich palityčnych nastupstvaŭ, kab namalavać žyvy i kranalny partret blizkaŭschodniaha kanfliktu».
«Piać złamanych kamier», 2011
Musić, samy čałaviečny film, pryśviečany araba-izrailskamu kanfliktu. Poŭnamietražnaja dakumientalnaja stužka «Piać złamanych kamier», źniataja paleścincam Emadam Burnatam i izrailcianinam Hajem Davidzi, ujaŭlaje saboj apovied pra žyćcio ŭ siektary Haza ad pieršaj asoby.
Historyja raskazvajecca z punkta hledžańnia Biernata — miascovaha žychara, jaki dakumientuje baraćbu svajoj abščyny padčas izrailskich uvarvańniaŭ. U naźvie zhadvajucca piać kamier, jakija jon vykarystoŭvaje na praciahu mnohich hadoŭ, kab zachavać svaje pieražyvańni ad kanfliktu, jaki zabraŭ žyćci siabroŭ i siamji Biernata.
«Ataka», 2012
U hetaj stužcy sumiesnaj vytvorčaści Livana, Francyi, Katara, Bielhii i Jehipta abjadnalisia palityčny tryler i historyja pra kachańnie. U paśpiachovaha izrailskaha chirurha Amina Džafary było ŭsio, što treba: vysoki prafiesijny status, harmaničnaje siamiejnaje žyćcio ź lubimaj žonkaj Zicham i šmatlikimi siabrami. Adnak usio źmianiłasia, kali palicyja paviedamiła jamu, što terarystyčny vybuch u restaranie, u vyniku jakoha zahinuli 17 čałaviek, u tym liku 11 dziaciej, byŭ arhanizavany jaho žonkaj. Sprabujučy razabracca, što prymusiła jaje ździejśnić taki žudasny akt, Amin adpraŭlajecca ŭ paleścinskuju aŭtanomiju, kab sustrecca sa svajakami i siabrami Zicham.
Režysior arabskaha pachodžańnia stvaraŭ hety film admysłova dla taho, kab daśledavać karani izrailska-paleścinskaha kanfliktu. Jon sprabavaŭ pakazać, jak ludzi z abodvuch bakoŭ stavilisia da svajho «voraha» i jak pytańnie pomsty ŭ imia siamji ci honaru i prapahanda mohuć pieratvaryć ludziej u złačyncaŭ.
Bolš pra kino:
«Zabojcy kvietkavaha miesiaca» — epičny film Marcina Skarseze pra kryvavaje naradžeńnie Amieryki
Režysior Kašpierski — pra novy sieryjał, «Biełaruśfilm» jak chorar i žonak kitajskich ministraŭ
Fiestyval «Paŭnočnaje źziańnie» projdzie z 13 da 26 listapada