Byłoha palitviaźnia Andreja Kudzika pakarali za vinšavańnie Ukrainy z Dniom niezaležnaści
Byłomu palitviaźniu Andreju Kudziku pryznačyli 15 sutak aryštu za vinšavańnie Ukrainy z Dniom niezaležnaści ŭ tyktoku. Pra heta jon paviedamiŭ na svajoj staroncy ŭ fejsbuku.
19.10.2023 / 16:52
Andrej Kudzik
Spravu Kudzika 19 kastryčnika ŭ sudzie Vilejskaha rajona razhladała sudździa Alena Achmietava. Andreja abvinavacili ŭ tym, što 24 žniŭnia jon raźmiaściŭ na svajoj staroncy ŭ tyktoku svaje fotazdymki z podpisam «Z Dniom Niezaležnaści, Ukraina». Heta paličyli «niesankcyjanavanym pikietavańniem».
Kudzik na sudzie viny nie pryznaŭ i raspavioŭ, što ŭbačyŭ 24 žniŭnia vinšavańnie Ukrainy z Dniom niezaležnaści Łukašenkam i taksama vyrašyŭ pavinšavać susiedni narod.
U vyniku sudździa Achmietava pryznačyła byłomu palitviaźniu 15 sutak aryštu. Jak adznačyŭ na svajoj staroncy Andrej, paśla suda jaho adpuścili damoŭ.
Aktyvista ź Vilejki Andreja Kudzika nieadnarazova pieraśledavali za pikietavańnie i vykazvańnie svajoj hramadzianskaj pazicyi na praciahu 2020 i 2021 hadoŭ: zatrymlivali, štrafavali, aryštoŭvali. 9 žniŭnia 2021 hoda jaho znoŭ zatrymali i ahułam asudzili na 90 sutak administracyjnaha aryštu, jakija jon adbyvaŭ u nievynosnych umovach izalataraŭ Vilejki i Smalavičaŭ. Paśla adbyvańnia aryštu Andrej na volu tak i nie vyjšaŭ.
U sudzie Zavodskaha rajona Minska 16 lutaha 2022 hoda Andreju Kudziku prysudzili 2 hady kałonii pavodle č. 1 art. 342 KK. Na sudzie aktyvist nie pryznaŭ viny i admoviŭsia ad dačy pakazańniaŭ. Na volu jon vyjšaŭ 18 lipienia 2023 hoda.
Čytajcie taksama:
Andrej Parotnikaŭ zamoviŭ sabie ŭ SIZA KDB padručnik ispanskaj movy
Unuka lehiendy minskaha «Dynama» buduć sudzić pa kryminalnaj spravie
Zatrymali troch supracoŭnikaŭ «Biełśpiecenierha»
«Jašče adzin pakutlivy hod pa ŠIZA, karcarach i izalatarach». Vyniesieny prysud Źmitru Daškieviču