Navalny, Jašyn i Kara-Murza zaklikali admovicca ad ježy 30 kastryčnika ŭ padtrymku rasijskich palitviaźniaŭ
Rasijskija apazicyjaniery, jakija adbyvajuć praciahłyja terminy pazbaŭleńnia voli ŭ kałonijach, zaklikali prajavić salidarnaść z palitviaźniami i 30 kastryčnika admovicca ad pryjomu ježy, piša Bi-bi-si.
05.10.2023 / 14:38
Kranid Lubarski (1934—1996) — viadomy rasijski astranom i astrafizik, pravaabaronca, siabra Maskoŭskaj Chielsinkskaj hrupy Jaho asudzili ŭ 1972 hodzie na piać hadoŭ. Niezvyčajnaje dla nas imia Kranid znajšli ŭ pravasłaŭnych śviatkach jaho baćki. Paśla vyzvaleńnia z łahiera ŭ 1977 hodzie vyjechaŭ z SSSR.
«30 kastryčnika 1974 hoda palitviaźni Kranid Lubarski i Alaksiej Murženka ŭ Dubraŭłahu zasnavali dzień palityčnaha źniavolenaha, kab damahčysia pryznańnia statusu palitviaźnia, admieny abmiežavańniaŭ u pierapiscy, pasyłkach i pieradačach, pavieličeńnia kolkaści spatkańniaŭ sa svajakami, atrymańnia paŭnavartasnaj miedycynskaj dapamohi, — raspaviadajecca ŭ telehram-kanale asudžanaha na 19 hadoŭ Navalnaha. — Hałoŭnym žestam salidarnaści ŭ hety dzień stała simvaličnaja adnadzionnaja haładoŭka, jakuju trymali nie tolki palitviaźni, ale i mnohija volnyja ludzi».
Paśla raspadu SSSR zamiest dnia palitviaźnia stali pravodzić Dzień pamiaci achviar palityčnych represij i akcyju «viartańnie imionaŭ», jakuju arhanizoŭvaŭ «Miemaryjał». «Miemaryjał» likvidavany pa rašeńni suda, nahadaŭ Navalny, a palitviaźni znoŭ jość — «i šmat».
«U hetaj situacyi my ličym pravilna i nam źviarnucca da karanioŭ i tradycyj», — zajaviŭ Navalny, jaki adbyvaje 19-hadovy termin. Pad zvarotam padpisalisia inšyja asudžanyja rasijskija palityki i aktyvisty — Uładzimir Kara-Murza, Vadzim Astanin, Lilija Čanyšava, Daniel Chałodny i Illa Jašyn.
U Biełarusi histaryčna Dzień palitviaźnia ŭšanoŭvajecca 29 kastryčnika. U noč z 29 na 30 kastryčnika 1937 hoda ŭ Minsku byli rasstralanyja 108 pradstaŭnikoŭ biełaruskaj intelihiencyi: paety, piśmieńniki, navukoŭcy, dziejačy kultury. Kožny hod biełarusy ładziać imprezy, pryśviečanyja hetaj trahičnaj dacie.