«Вогненны шар» пад Оксфардам. З-за ўдару маланкі выбухнуў газ на заводзе па перапрацоўцы адкідаў
У тушэнні пажару бралі ўдзел шэсць пажарных машын і 40 пажарных.
03.10.2023 / 06:55
Скрыншот відэа
У англійскім графстве Оксфардшыр удар маланкі прывёў да магутнага выбуху газу на заводзе па перапрацоўцы адкідаў, піша Бі-бі-сі.
Газ выбухнуў у рэзервуары, дзе харчовыя адкіды перапрацоўваюцца ў біягаз. Завод знаходзіцца ў вёсцы Касінгтан побач з Оксфардам, на паўночны захад ад яго.
Пры выбуху і пажары ніхто не пацярпеў. У тушэнні пажару бралі ўдзел шэсць пажарных машын і 40 пажарных.
У прылеглых раёнах з-за выбуху адключылася электрычнасць; на час тушэння пажару паліцыя перакрыла шашу ад паўночнай ускраіны Оксфарда да суседняга гарадка Айншам.
«Я сядзеў на кухні, і раптам усё памяшканне асвятлілася яркім белым святлом, а потым пачуўся магутны трэск, як ад вельмі магутнай маланкі, — распавёў Бі-бі-сі супрацоўнік Оксфардскага ўніверсітэта Джэк Фраўд. — Я выглянуў у акно і ўбачыў, што неба быццам пульсуе аранжавым святлом. Я выбег на двор, каб зняць гэта аранжавае святло, а яно праз 20 секундаў пагасла».
«Я спачатку падумаў, што сонца сядае, пакуль не ўбачыў мігценне і дым, — распавёў іншы мясцовы жыхар Сцюарт Хоскінг. — А потым прагрымеў быццам удар падчас навальніцы, але толькі адзін удар».
Як правіла, навальніцы ў Англіі ў кастрычніку — вялікая рэдкасць. Сёлета метэаролагі звязваюць іх з нетыпова высокімі тэмпературамі. Па іх прагнозах, навальніцы на паўднёвым усходзе і поўдні Англіі будуць працягвацца яшчэ некалькі дзён.