«Pieršaje, što skazali na dopycie ŭ KDB: raspaviadziom usim, što ty hiej». Viadučy Siarhiej Padsasonny — pra asabistaje žyćcio
Viadučy «Biełsata» Siarhiej Padsasonny ščyra raspavioŭ u vypusku jutub-kanała «Žyćcio-malina» pra svoj kaminh-aut u vioscy, žyćcio z partnioram i cisk KDB.
02.10.2023 / 11:17
Žurnalist Siarhiej Padsasonny. Skrynšot videa: malina_by | YouTube
Što značyć być adkrytym hiejem u Biełarusi
Siarhiej Padsasonny adznačaje, što nie chavaŭ svajoj aryjentacyi padčas žyćcia ŭ Biełarusi. Pa jaho słovach, jon zaŭsiody viedaŭ pra jaje: «Heta nie toje, što ŭźnikaje raptam». Jon ličyć prapahandysckim stereatypam pohlad, što na aryjentacyju moža paŭpłyvać kultura ci adukacyja, bo «ty prosta naradžaješsia takim čałaviekam».
Siarhiej zhadvaje: «Kali byŭ u vioscy, jašče ŭ škole ja razumieŭ, što heta inšy pohlad. Ale ty tady nie maješ seksualnaj adukacyi. I ŭ ciabie ŭźnikaje takaja prablema i pytańnie: «Ja adzin taki? I što z hetym usim rabić? Mianie hetaje hramadstva dakładna nie prymie. I heta vialikaja trahiedyja i drama. Ja viedaju, jak mienavita ŭ hetyja hady padletki prachodziać praz samazabojstvy, praź vielmi surjoznyja kryzisnyja stany, psichałahičnyja prablemy.
Na ščaście, u mianie atrymałasia dačakacca majho ŭniviersiteta i sustreć tych ludziej, jakija pakazali, što moža być inšy šlach. Što ŭsio ŭ paradku. Ty ničym nie adroźnivaješsia. My ciabie prymajem. Ale heta doŭhi šlach. Kali b była dobraja siamiejnaja adukacyja albo školnaja seksualnaja adukacyja, to hety šlach moh by być praściejšy, nie taki pakručasty, miescami balučy. I pryvieści da hetaha razumieńnia chutčej».
Samapryniaćcie, pa słovach žurnalista, u jaho adbyłosia paśla zakančeńnia univiersiteta. «Heta razumieńnie taho, što heta moj šlach i ja budu žyć z hetym. A mianie buduć atačać tyja ludzi, jakija iduć pobač sa mnoj. A z tymi, chto nie choča, my raźvitalisia».
Siarhiej zhadvaje, što zrabiŭ kaminh-aut padčas siamiejnaj viačery. Tady jamu było 22-23 hady. Hety ŭčynak pryvioŭ da prablem z rodnymi: «Častka siamji kaža: albo ty budzieš dumać pra inšyja rečy, albo ty nie budzieš z nami kantaktavać. I ty kažaš: «Nu dobra, tady nie budu kantaktavać». Była vialikaja paŭza. Ja syšoŭ. A potym usie vyrašyli rabić vyhlad, što ničoha nie adbyłosia».
Na dumku Siarhieja, adkrytaść — piersanalny vybar kožnaha.
«Niechta ženicca, zavodzić dziaciej. A na baku maje kachanka. Mnie padajecca, heta hłyboka niaščasnyja ludzi. Bo jany nie mohuć być tymi, kim jany jość. I žyć tak, jak jany chočuć, realizoŭvać svaje patreby. Bo ja realizuju siabie tak, jak ja chaču. Ty adkryta možaš stvarać siamju, budavać adnosiny, dom, być ščaślivym. I nie prydumlać taho, čaho prosta niama».
Biełaruskaje vojska i homaseksualizm
Padsasonny pryhadvaje, što nie chacieŭ iści ŭ vojska. «Adzin z maich siabroŭ skazaŭ pra toje, što kali ty skažaš, što ty homa, to ciabie nie voźmuć. Treba heta skazać psichijatru na vajskovaj kamisii. Ja heta zrabiŭ. Psichijatr mnie kaža: «Dyk heta ž nie chvaroba». A ja kažu: «A vy ŭ aktach pahladzicie». Voś jon adkryŭ svaje natatki. Tam akazałasia, što jość niejki punkt u ich instrukcyjach dla ŭnutranaha karystańnia, dzie havaryłasia, što niešta treba rabić z hetym.
Tady mianie nakiravali na dadatkovuju ekśpiertyzu ŭ psichijatryčnuju lakarniu ŭ Navabielicy ŭ Homieli. Ja prychodziŭ tudy, mnie davali vitaminy, bo psichijatry ŭsio-taki razumiejuć, što heta absurd i što ja prosta nie chaču iści ŭ vojska. Ale jany musili taksama vykonvać svaju pracu. Na noč mianie adpuskali dachaty. Ale a 6-j ranicy, kali byŭ abchod, ja musiŭ tudy prychodzić i siadzieć u kalidory, pa jakim pieramiaščalisia pacyjenty. Tak było niekalki dzion».
KDB i hiei
Padsasonny adznačaje, što kadebešnikam vielmi ciažka pracavać z adkrytymi hiejami, bo ŭ takim vypadku jany nie majuć srodku cisku na čałavieka.
«Pieršaje, što mnie skazali na dopycie ŭ KDB u Homieli, była zajava ab tym, što jany ŭsim raspaviaduć, što ja hiej. Ja skazaŭ: «Słuchajcie, chłopcy, vy spaźnilisia na paru hadoŭ. Tamu što ja ŭžo daŭno ŭsim raspavioŭ. Heta sakret polišynela. Vy možacie hetym cisnuć na tych, dla kaho heta sapraŭdy tajamnica. I takija ludzi byli. U tym liku adzin z maich siabroŭ, jaki prosta admoviŭsia ad siabroŭstva, tamu što na jaho cisnuli mienavita voś hetym».
Siarhiej zhadvaje adzin cikavy vypadak. «Mnie padsyłali adnaho. Ja dumaju, što heta byŭ supracoŭnik KDB, jaki chacieŭ mianie spaić i vyciahvać infarmacyju. Tolki pramachnulisia ŭ tym sensie, što ja mahu taksama šmat vypić, kali treba. I ničoha nie atrymałasia z hetaj infarmacyjaj. Ale jon nie byŭ hiejem. Mahčyma, jany dumali, što jon taki simpatyčny, prystojny i ja paviadusia na heta i niejkim čynam pačnu, flirtujučy ź im, vydavać infarmacyju. Ale ja taksama heta baču. Takija ludzi, mahčyma, kali na ich majuć kručki, patrebnyja orhanam dziela taho, kab ich vykarystoŭvać».
Pra asabistaje žyćcio
Ciapier Siarhiej Padsasonny žyvie sa svaim partnioram, kamunikacyja ź jakim adbyvajecca na miašancy:
«Jon pieršapačatkova viedaŭ ruskuju movu, bo jon pierakładčyk. Ale pieravažna heta była kamunikacyja pa-polsku. Kali što było niezrazumieła, to vykarystoŭvałasia ruskaja mova. Ale ŭ čakańni mianie z pracy jon pačaŭ hladzieć «Biełsat». I ŭsio bolš razmaŭlaje na biełaruskaj movie. Ja vielmi ździŭleny, što jon cudoŭna pačynaje razmaŭlać pa-biełarusku. I navat pračytaŭ pieršuju knihu ŭ aryhinale, ale łacinkaj, — «Dzikaje palavańnie karala Stacha».
Siarhiej z partnioram pabudavali ŭ Polščy dom. Majuć sabaku. Ale ŭ Polščy nie dazvolenyja hiej-šluby. «Ja zaŭsiody kažu, što čakaju piarścionak, bo jaho mama skazała, što ŭ jaje jość piarścionak ad babuli, jaki pieradajecca z pakaleńnia ŭ pakaleńnie», — žartuje Padsasonny.
Čytajcie jašče:
Haspadar pieršaha minskaha hiej-kłuba raskazaŭ pra atmaśfieru, naviednikaŭ i kanflikty z uładaj
Kandytar-biznesoviec z Žodzina pačaŭ vieści adkryty hiej-błoh: «Chaču pakazać, što my — zvyčajnyja»