«Калі вам стала зразумела, што Захаранку збіраюцца забіць?» — «Калі Паўлічэнка стрэліў у яго». Гараўскі дае паказанні
Былы сахравец Юрый Гараўскі пачаў даваць паказанні ў судзе кантона Санкт-Галлен у Швейцарыі. Ён пад шчыльнай аховай паліцыі. Гараўскага абвінавачваюць у датычнасці да знікненняў у Беларусі вядомых палітыкаў.
19.09.2023 / 12:38
Юры Гараўскі ў сіняй байцы пад шчыльнай аховай. Фота: volhaklas / Telegram
Як піша «Новы час», Юрыя Гараўскага прывезлі ў суд пад аховай швейцарскіх спецслужбаў. Яго ахоўваюць вельмі шчыльна, падагнаўшы бус літаральна да дзвярэй суда. Сам Гараўскі быў пад капюшонам, ён хаваў твар. Здымаць у будынку суда нельга.
«Гараўскі гаворыць вельмі ціха, выглядае падаўленым, у суд ён прыйшоў з мыліцай. На пытанне суддзі, як ён сябе адчувае, падсудны адказаў, што нармальна», — перадае карэспандэнт з суда.
Гараўскі адмовіўся адказваць на некаторыя пытанні суддзі. Суддзя запытаўся пра САХР і Дзмітрыя Паўлічэнку і некаторых іншых камандзіраў часткі.
— Якім чынам вы пазнаёміліся з палкоўнікам Смірновым? — запытаўся суддзя.
— Я не буду адказваць на гэтае пытанне.
— Чаму? Вы ж казалі пра гэта ў часе папярэдняга следства.
— Так. Але я прасіў пракурора не апублічваць гэтую інфармацыю.
Пошукавік выдае, што палкоўнік Смірноў быў кіраўніком вайсковай часткі 5525, а гэтая частка — 6-я асобная спецыяльная міліцэйская брыгада ўнутраных войскаў МУС Рэспублікі Беларусь.
На судзе Гараўскі распавёў пра выкраданне і забойства Юрыя Захаранкі:
— Калі, па загадзе Паўлічэнкі мы паклалі Захаранку ў багажнік, я ўжо тады хацеў з'ехаць.
— Ці ведалі вы, што гэты чалавек — Захаранка? — пытаецца суддзя.
— На момант, калі я служыў, Захаранка быў міністрам МУС, канешне, я ведаў, хто гэта такі.
Гараўскі распавёў, што Юрый Захаранка быў застрэлены са спіны. Ён дадаў, што думаў, што Захаранку проста завязуць за горад, і з ім «будет проводиться беседа», і не ведаў, куды яго вязуць.
Суддзя спытаў:
— Пісталет, якім быў застрэлены Захаранка, ім праводзяцца ў Беларусі растрэлы?
— Так.
— Адкуль вы ведаеце? Вы ўжо трымалі яго ў руках?
Гараўскі пасля паўзы:
— Трымаў падобны.
— Калі вам стала зразумела, што Захаранку збіраюцца забіць?
— Калі Паўлічэнка стрэліў у яго.
Суд працягваецца.
Пракуратура Швейцарыі абвінаваціла экс-байца САХР у датычнасці да гвалтоўных знікненняў. Ацэньваць сапраўднасць яго слоў будуць суддзя і два прысяжных засядацеля. Калі яны прызнаюць Гараўскага вінаватым, гэта стане абвінаваўчым прысудам і для беларускага рэжыму, лічаць юрысты.
Чытайце таксама:
Як выглядае месца магчымага забойства Ганчара і Красоўскага пад Бягомлем ФОТА
«Машына была на глыбіні аднаго метра». Як у 2001 годзе раскапалі джып Красоўскага
Экс-спецназавец Юрый Гараўскі адказаў на абвінавачванні ад Паўлічэнкі ў хлусні
Дзмітрый Паўлічэнка выступіў з афіцыйнай заявай наконт абвінавачванняў у забойствах палітыкаў
«Я не даваў такой каманды». Лукашэнка пракаментаваў справу зніклых палітыкаў
«Яны стралялі ў спіну»: дачка Захаранкі сустрэлася з экс-байцом спецназу Юрыем Гараўскім