«Экстрэмісцкую» літаратуру ў Беларусі будуць выдаваць пасля спецдазволу
На БТ прызналі, што ўсе «экстрэмісцкія» кнігі складана знішчыць, да таго ж спецыялістам яны часам патрэбныя для напісання навуковых прац або расследаванняў.
14.09.2023 / 09:25
Фота: reform.by
У Беларусі збіраюцца навесці парадак з «экстрэмісцкай» літаратурай у бібліятэках і выдаваць яе па спецыяльным дазволе. Пра гэта распавялі ў эфіры тэлеканала «Беларусь 1», піша Reform.by.
У тэлесюжэце прызналі, што ўсе «экстрэмісцкія» кнігі складана знішчыць, да таго ж спецыялістам яны часам патрэбныя для напісання навуковых прац або расследаванняў. У Нацыянальнай бібліятэцы такія кнігі захоўваюцца ў спецыяльным сховішчы, але ў законе не прапісана ў якіх выпадках можна выдаваць іх чытачам. У Нацбібліятэцы спадзяюцца, што парадак выдачы будуць вызначаны заканадаўча.
«Мы працуем над гэтым пытаннем. І будзем спадзявацца, што ў найбліжэйшы час гэты заканадаўчы прабел будзе ўдакладнены. Тэарэтычна абмежаванаму колу карыстальнікаў пры спецыяльным дазволе можна будзе гэтымі дакументамі скарыстацца», — заявіў Віктар Пшыбытка, намеснік гендырэктара Нацыянальнай бібліятэкі.
Тым часам пракуратура працягвае сачыць, каб прызнаная экстрэмісцкай літаратура не прадавалася ў крамах і ў інтэрнэце. У першую чаргу пракурораў цікавяць гістарычныя кнігі.
«Цікавіць наогул уся літаратура. Але, вядома, першачарговую ўвагу ўдзяляем гістарычнай літаратуры, бо цяпер такія тэмы на лязо, значныя. Гэта рэабілітацыя нацызму, які часам сустракаецца ў друкаванай прадукцыі. Таму менавіта на такую літаратуру мы звяртаем увагу», — заявіла Марына Запрудская, начальнік аддзела пракуратуры Віцебскай вобласці.
У тэлесюжэце таксама патлумачылі, чаму «экстрэмісцкія» кнігі друкаваліся ў Беларусі.
«Гэтая сітуацыя не ўзнікла цяпер. Яна ўзнікла ў 2013-м, 2014-м, у 2017 годзе. Нейкія кніжкі друкаваліся, якія да падзей 2020 года выглядалі нейкімі спрэчнымі. Але ў прынцыпе яны не неслі нейкі характар, не ўзгоднены з агульнай лініяй руху. Пасля 2020 года ў гэтых кніжках узніклі пытанні», — заявіў намеснік дырэктара аднаго з выдавецтваў.
Чытайце таксама: