Орбан заявіў, што хоча кіраваць Венгрыяй яшчэ 11 гадоў
Раней ён казаў пра 2030 год.
11.09.2023 / 14:11
Прэм'ер Італіі Джорджа Мелоні і Віктар Орбан. Фота: Thierry Monasse / Getty Images
Прэм’ер Венгрыі заявіў аб жаданні заставацца кіраўніком нацыянальнага ўрада цягам яшчэ 11 гадоў, піша Радыё Свабода.
Пасля выбараў 2018 года Орбан заяўляў аб намеры застацца прэм’ерам толькі да 2030 года. Змену планаў ён патлумачыў тым, што поўнамаштабнае расійскае ваеннае ўварванне ва Украіну і пандэмія каранавірусу «забралі» чатыры гады з дзейнасці ўрада.
Цяпер Орбан заявіў, што вырашыў застацца кіраўніком урада да 2034 года. Як паведаміла выданне Telex, пра гэта Віктар Орбан заявіў на традыцыйным пікніку ў вёсцы Кетчэ.
Палітык таксама сказаў, што Венгрыя «хоча быць вялікай, моцнай і багатай». Ён марыць аб тым, каб свет паважаў Венгрыю, і агучыў план для дасягнення гэтых жаданняў.
Сярод такіх 15 прыярытэтных крокаў —дэмаграфічны паварот, стварэнне заснаванай на працы эканомікі, пераход з пазычальнікаў у крэдыторы, развіццё арміі, укараненне лічбавага пашпарта і іншае.
Віктар Орбан чарговы раз заявіў, што бачыць сур’ёзную небяспеку ў ісламізацыі Еўропы і што ў будучыні хрысціянскія грамады будуць уцякаць з Захаду ў Венгрыю.
Віктар Орбан працаваў на пасадзе прэм’ер-міністра з 1998 па 2002 год і з 2010 года да цяперашняга часу. Яго крытыкуюць за цесныя сувязі з Масквой і адмову перадаваць Украіне вайсковую дапамогу для супрацьстаяння расійскай агрэсіі.
Венгрыя адзіная з Еўрасаюза не падтрымала даклада АБСЕ аб парушэннях правоў чалавека ў Беларусі. Таксама Венгрыя дамагаецца, каб з будучага пакету санкцый Еўрасаюза прыбралі трох чалавек, у тым ліку кіраўніка Беларускай чыгункі Уладзімера Марозава.
Адносіны Венгрыі з Еўрасаюзам дасягнулі найбольшай напружанасці ў 2015 годзе ў пытанні аб міграцыі, калі прэм’ер-міністр краіны Віктар Орбан пабудаваў памежную агароджу і выступіў супраць прыёму ўцекачоў. Прыкладна ў той жа час агенцтва ЕС у барацьбе з махлярствам OLAF падняло трывогу з нагоды нямэтавага выкарыстання грошай, якія выдзяляюцца Венгрыі з агульнага бюджэту.
У лютым 2023 года кіраўнік МЗС Венгрыі Петэр Сіярта наведваў Мінск.
Чытайце таксама:
Орбан: Прыйдзе час, калі слабыя народы загінуць, а моцныя выжывуць