U Hrodnie źnikli turystyčnyja stendy pra Elizu Ažešku
U Hrodnie prybrali turystyčnyja stendy pra žyćcio Elizy Ažeški. Heta vydańniu Hrodna.life paćvierdziŭ adzin z hrodzienskich krajaznaŭcaŭ.
08.09.2023 / 18:07
Stend ź infarmacyjaj pra Elizu Ažešku. Fota: Hrodna.life
Pavodle krynic Hrodna.life, tablički prybrali nie na ramont, i nazad jany mohuć nie viarnucca.
Turystyčnyja stendy ź infarmacyjaj pra Elizu Ažešku ŭstalavali na vulicach Hrodna letam 2021 hoda. Ich adkryćcio prymierkavali da 180-hodździa z dnia naradžeńnia piśmieńnicy.
Usiaho ŭ horadzie było 10 stendaŭ:
- kala domika i pomnika piśmieńnicy;
- na vulicach Vasilka i Marksa, dzie Ažeška žyła ŭ roznyja časy;
- kala Biernardynskaha kaścioła, u jakim piśmieńnica viančałasia sa Stanisłavam Nahorskim;
- u Rumloŭskim parku, dzie byŭ majontak jaje siamji;
- na starych katalickich mohiłkach, dzie Ažeška pachavanaja.
Infarmacyja na stendach była raźmieščanaja na troch movach: biełaruskaj, anhlijskaj i polskaj.
Raspracoŭkaj prajekta zajmaŭsia Hrodzienski dziaržaŭny ŭniviersitet imia Janki Kupały. Finansy na heta vydzialaŭ Jeŭrasajuz.
Raniej, u lipieni 2023 hoda, z budynka hrodzienskaha čyhunačnaha vakzała źnik pamiatny znak paŭstancam 1863 hoda. Zamiest jaho ŭstalavali došku, pryśviečanuju savieckim padpolščykam časoŭ Druhoj suśvietnaj vajny. U hrodzienskim harvykankamie na zapyt hrodziencaŭ adkazali, što nie viedajuć, kudy źnikła šylda.
Čytajcie taksama:
«Eliza Ažeška i jaje recepty jadnańnia dla biełarusaŭ». Novaje videa na kanale Andreja Chadanoviča