Zialenski ŭznaharodziŭ ordenam jašče adnaho biełarusa
30-hadovy Źmicier «Hans» Rubašeŭski zahinuŭ 12 krasavika 2022 hoda padčas bajoŭ u Łuhanskaj vobłaści.
04.09.2023 / 10:56
Źmicier Rubašeŭski
Fond «Volnaja Biełaruś», zarehistravany ŭ Lvovie, paviedamiŭ, što jašče adnaho biełaruskaha dobraachvotnika, jaki zahinuŭ va Ukrainie, paśmiarotna ŭznaharodzili ordenam «Za mužnaść» treciaj stupieni, piša «Radyjo Svaboda».
«Atrymali adkaz na padadzieny nami zvarot ab uznaharodžańni zvańniem Hieroja Ukrainy (paśmiarotna) biełaruskaha dobraachvotnika Źmitra Rubašeŭskaha, pazyŭny «Hans». Ukazam prezidenta Ukrainy ad 30 červienia 2022 hoda žaŭnier Rubašeŭski Źmicier adznačany dziaržaŭnaj uznaharodaj Ukrainy — ordenam «Za mužnaść» treciaj stupieni», — adznačajecca ŭ paviedamleńni fondu.
30-hadovy Źmicier «Hans» Rubašeŭski zahinuŭ 12 krasavika 2022 hoda padčas bajoŭ u Łuhanskaj vobłaści. Byŭ u składzie rotnaj taktyčnaj hrupy, jakaja rabiła vyłazki ŭ tył praciŭnika. Pierad śmierciu «Hans» źniščyŭ kamandzira rasijskaj hrupy.
Rubašeŭski rodam ź Bieraścia. Vučyŭsia ŭ budaŭničym vučyliščy. Vajavaŭ z 2015 hoda. Pryjechaŭ u Lvoŭ na futbolny matč zbornych Biełarusi i Ukrainy, tak i zastaŭsia.
Vajavaŭ u šerahach «Pravaha siektara». Za abaronu šachty Butaŭka mieŭ hramadskuju ŭznaharodu «Narodny hieroj Ukrainy». Rubašeŭski mieŭ niekalki ranieńniaŭ. U 2019 hodzie ŭ bajach straciŭ voka. Paśla ranieńnia jaho dahladała siastra zahinułaha pabracima. U chutkim časie jany pabralisia šlubam, naradzili dačku.
Žyŭ u Lvoŭskaj vobłaści. Pazyŭny «Hans» mieŭ praź niamiecki šałom časoŭ Druhoj suśvietnaj vajny. Apošnim časam słužyŭ u składzie 24-j asobnaj miechanizavanaj bryhady imia kniazia Daniły Halickaha.
Raniej stała viadoma, što prezident Ukrainy Uładzimir Zialenski svaim ukazam ad 10 maja 2023 hoda ŭznaharodziŭ ordenami «Za mužnaść» treciaj stupieni biełaruskich dobraachvotnikaŭ Eduarda Łobava i Daniiła Lašuka.
U krasaviku 2022 hoda zvańnie Hieroja Ukrainy paśmiarotna prysvoili biełaruskamu dobraachvotniku Alaksieju Skoblu, jaki zahinuŭ 13 sakavika 2022 hoda, prykryvajučy adychod svaich bajcoŭ pad Kijevam. Jaho pachavali ŭ Kijevie.
Čytajcie taksama:
Ordenam «Za mužnaść» ukraincy ŭznaharodzili jašče adnaho biełarusa — Daniiła Lašuka
«Pryhniot z mocnych naradžaje vołataŭ». Cichanoŭskaja ŭručyła ŭ Varšavie ŭznaharody