«Było adčuvańnie, što paśla buntu jon drenna skončyć». Blizkija da Kramla krynicy — pra mahčymuju hibiel Pryhožyna
Vydańnie «Mieduza» daviedałasia, što pra mahčymuju hibiel kiraŭnika PVK «Vahnier» havorać jaje krynicy, blizkija da Kramla.
23.08.2023 / 23:31
Jaŭhien Pryhožyn. Fota: Wagner / Anadolu Agency via Getty Images
Adna z krynic «Mieduzy», blizkich da Administracyi prezidenta RF, pryznałasia, što samo krušeńnie samalota Jaŭhiena Pryhožyna «nie vielmi ździviła»: «Było adčuvańnie, što paśla buntu jon drenna skončyć, takoha [ŭ Kramli] nie darujuć».
Pavodle acenki krynicy, paśla sproby buntu Uładzimir Pucin «zrabiŭ vysnovy» i pierastaŭ ličyć Pryhožyna «nadziejnym i kiravanym čałaviekam».
«Pa ŭsioj łohicy siłavy resurs u rukach nienadziejnaha čałavieka nie pavinien być. Ni ŭ Rasii, ni za jaje miežami, ale pad jaje ehidaj», — padkreśliła krynica.
Surazmoŭca, blizki da kiraŭnictva Maskoŭskaj vobłaści, u svaju čarhu, raspavioŭ, što niezadoŭha da krušeńnia, dniom 23 žniŭnia, Pryhožyn nibyta sustrakaŭsia z pradstaŭnikami administracyi Padmaskoŭja i meryi Maskvy «nakont pytańniaŭ charčavańnia [ŭ biudžetnych ustanovach]». Kampanii, źviazanyja sa stvaralnikam PVK «Vahnier», šmat hadoŭ pastaŭlajuć ježu ŭ roznyja biudžetnyja ŭstanovy pa dziaržkantraktach.
Dźvie krynicy «Mieduzy», blizkija da Kramla, adznačyli, što ich ździŭlaje toj fakt, što Pryhožyn navat paśla buntu praciahvaŭ hety biznes u Rasii — i «nie zrabiŭ vysnoŭ». «U jaho šmat čaho jość u Afrycy, jon sam viadzie biznes z kiraŭnictvam afrykanskich dziaržaŭ. Jamu pakul u hetym nie pieraškadžaŭ nichto, nichto nie vyciaśniaŭ.
Navošta jamu kantrakty na školnaje charčavańnie tut, jašče i z takoj ryzykaj? Jon ža nie durań, usio razumieŭ byccam by», — dadaŭ adzin z surazmoŭcaŭ «Mieduzy».
Pavodle jaho acenki, takimi dziejańniami Pryhožyn pakazvaŭ, što nie vykonvaje «palitesu» i praktyčna adkryta praciahvaje pracavać u Rasii, choć paśla buntu vyšejšaje kiraŭnictva krainy zajaŭlała, što jon «adydzie ŭ Biełaruś».
Prama kazać pra toje, chto mienavita moh być zacikaŭleny ŭ mahčymym zabojstvie Pryhožyna, surazmoŭcy admovilisia.
Raniej (jašče da sproby buntu) krynicy «Mieduzy», blizkija da Kramla, nie vyklučali, što aktyŭnaść stvaralnika PVK «spyniać siłaviki». Ciapier surazmoŭcy, blizkija da AP, upeŭnienyja, što navat kali hibiel Pryhožyna paćvierdzicca, to na ŭnutrypalityčnaj situacyi jana surjozna nie adabjecca.
«Na radarach [sacyjałahičnych słužbaŭ] jaho ŭžo niama faktyčna. Byŭ hierojem momantu», — adznačyŭ adzin ź ich.
Sapraŭdy, pavodle źviestak apytańniaŭ «Levada-centra», Pryhožyn užo vypaŭ ź dziasiatki palitykaŭ, pra davier da jakich zajaŭlali rasijanie.
Zrešty, adna z krynic abmoviłasia, što ŭ «armii i roznych atradach na froncie» situacyja z padtrymkaj Pryhožyna (i reakcyjaj na jaho hipatetyčnuju śmierć) moža być inšaj.
Zrešty, surazmoŭcy, blizkija da Kramla, nie vyklučyli, što Pryhožyn moh zastacca žyvy: «Jon — trykstar, trol. U jaho jość infarmatary ŭ roznych strukturach, tamu treba čakać».
Pry hetym jany padkreślili, što kali hibiel paćvierdzicca, to ŭ joj, chutčej za ŭsio, abvinavaciać ukrainskija śpiecsłužby (Kreml užo nieadnarazova rabiŭ hety manieŭr): «Viadoma, ukraincy chacieli da jaho dabracca, kali drony dalatajuć da Kramla i Sici — to čamu da Pryhožyna dabracca nie mahli».
Čytajcie taksama:
Raniej Pryhožyn užo «pamiraŭ» u avijakatastrofie. Tłumačym
Rasavijacyja apublikavała poŭny śpis pasažyraŭ «Embrajera» i paćvierdziła hibiel Pryhožyna i Utkina
«Usio narmalna, lacim na hastroli ŭ Minsk». Navina ab śmierci Pryhožyna ŭzarvała bajnet i nie tolki
U Ćviarskoj vobłaści Rasii ŭpaŭ biznes-džet «Embrajer», usie zahinuli. Jon naležyć Pryhožynu