Na aŭkcyjonie možna nabyć karcinu Jazepa Drazdoviča. Ale cana kusajecca
Staličny sałon žyvapisu i antykvaryjatu «Raritiet'» vystaviŭ na sajcie ay.by łot z karcinaj Jazepa Drazdoviča. Za parny partret pendźla znakamitaha biełaruskaha mastaka papiarednie prosiać 5980 biełaruskich rubloŭ.
23.08.2023 / 17:50
Parny partret «Maładyja» pendźla Jazepa Drazdoviča. Fota: ay.by
Karcina pamieram 50ch85 sm vykananaja alejnymi farbami na pałatnie. Na partrecie adlustravany žančyna i mužčyna, trochi paviernutyja adno da adnaho, praz heta, vidać, karcinie dali nazvu «Maładyja». U nižnim pravym kucie zachavaŭsia aryhinalny podpis mastaka.
Na advarotnym baku źmieščany nadpis, jaki raskryvaje peŭnyja akaličnaści pravienansu tvora. Karcina, jak śćviardžajecca, była namalavanaja ŭ 1930-ja hady i znojdzienaja na zakinutym chutary pablizu Padśvilla. U toj čas hetaja miascovaść uvachodziła ŭ skład Polskaj Respubliki i adnosiłasia da Dzisienskaha pavieta Vilenskaha vajavodstva.
Advarotny bok pałatna z tłumačalnym nadpisam. Fota: ay.by
Z 1930-ch i da samaj śmierci ŭ 1954 hodzie Drazdovič stała žyŭ na Dzisienščynie. Heta byŭ nialohki pieryjad u žyćci mastaka: jon nie moh znajści pracu, nie mieŭ doma, tamu chadziŭ ad vioski da vioski i prapanoŭvaŭ namalavać karciny i dyvany, čaściej za ŭsio za ježu i prytułak. Vidać, što hetaja karcina ŭźnikła anałahičnym čynam.
Na aŭkcyjon ža karcina patrapiła, miarkujučy pa ŭsio tym ža nadpisie na advarotnym baku, sa zboru biełaruskaha mastaka Alaksieja Maračkina, pieršaha kiraŭnika supołki «Pahonia» pry Biełaruskim sajuzie mastakoŭ, jaki jašče za savieckim časam pačaŭ viartać amal stračanuju spadčynu Jazepa Drazdoviča.
Podpis Jazepa Drazdoviča. Fota: ay.by
Mastactvaznaŭcy, da jakich my źviarnulisia, adznačajuć, što karcina vidavočna naležyć pendźlu Drazdoviča. Jany taksama vykazali sumnieńni nakont taho, što chtości budzie rabić padrobki Drazdoviča i vystaŭlać z takoj vysokaj canoj.
Mastacki ŭzrovień, blizki da naiŭnaha mastactva, śpiecyjalisty tłumačać tym, što Drazdovič — najpierš hrafik, a jak žyvapisiec dosyć słaby. Da taho ž zakazčyki, biełaruskija sialanie, jaŭna nie patrabavali ad jaho bolšaha. Tak što takuju vysokuju canu za karcinu prosiać vyklučna za słavutaje imia, ale na aŭkcyjonie jość mahčymaść prapanavać i svaju canu.
Čytajcie taksama:
U Vilni pradaduć pieršaje vydańnie «Apostała» bratoŭ Mamoničaŭ
Bieraściejskuju Bibliju i inšyja biełaruskija kaštoŭnaści raspradaje były ministr?